ଇସ୍‌ଲାମାବାଦ,୧୮/୦୯: ଜଷ୍ଟିସ୍‌ କାଜି ଫୌଜ ଇସା ପାକିସ୍ତାନର ୨୯ତମ ପ୍ରଧାନ ବିଚାରପତି ନିଯୁକ୍ତ ହୋଇଛନ୍ତି । ରବିବାର ରାଷ୍ଟ୍ରପତି ଭବନରେ ଆୟୋଜିତ ଶପଥ  ଗ୍ରହଣ ସମାରୋହରେ ରାଷ୍ଟ୍ରପତି ଆରିଫ ଆଲ୍‌ଭି ତାଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି । କାର୍ଯ୍ୟକ୍ରମରେ  କାମଚଳା ସରକାରର ପ୍ରଧାନମନ୍ତ୍ରୀ ଅନୱାର ଉଲ୍‌ ହକ୍‌  କକର ଏବଂ ସେନାମୁଖ୍ୟ  ଜେନେରାଲ ଅସୀମ ମୁନିର  ପ୍ରମୁଖ ଉପସ୍ଥିତ ଥିଲେ ।  ପ୍ରଧାନ ବିଚାରପତି ଭାବେ  ୬୩ ବର୍ଷୀୟ ଜଷ୍ଟିସ ଇସା  ୧୩ ମାସ ରହିବେ । ସବୁଠାରୁ  ବଡକଥା ହେଉଛି ବିଦାୟୀ ପ୍ରଧାନ ବିଚାରପତି ଅମର ଉତା ବନ୍ଦିୟାଲ ଜଷ୍ଟିସ୍‌ ଇସାଙ୍କୁ  ଆଦୌ ଗୁରୁତ୍ୱ ଦେଉନଥିଲେ । ତାଙ୍କୁ କୌଣସି ଖଣ୍ଡପୀଠରେ  ସାମିଲ କରିନଥିଲେ । ୨୦୧୯ରେ ଇମ୍ରାନ ଖାନ୍‌ ପ୍ରଧାନମନ୍ତ୍ରୀ  ଥିଲା ବେଳେ ଜଷ୍ଟିସ ଇସା ଓ ତାଙ୍କ ପତ୍ନୀ ସରୀନା ଇସାଙ୍କ  ଉପରେ ଦୁର୍ନୀତି ମାମଲା ଅଣାଯାଇଥିଲା । ଏପରିକି  ସରୀନାଙ୍କୁ ଗିରଫ କରି ଜେଲ୍‌କୁ ପଠାଯାଇଥିଲା । ଇମ୍ରାନ  ସରକାର ଜଷ୍ଟିସ ଇସାଙ୍କୁ ମଧ୍ୟ ଗିରଫ କରିବାକୁ ଉଦ୍ୟମ  କରିଥିଲେ । କିନ୍ତୁ ଏଥିରେ ସଫଳ ହୋଇପାରି ନଥିଲେ।