ନୂଆଦିଲ୍ଲୀ: ଭାରତ ଏବଂ ଇଂଲଣ୍ଡ ମଧ୍ୟରେ ୫ ଟେଷ୍ଟ ମ୍ୟାଚ୍ ବିଶିଷ୍ଟ ସିରିଜ୍ ଖେଳାଯାଉଛି । ବିରାଟ କୋହଲି ପ୍ରଥମ ଦୁଇଟି ଟେଷ୍ଟ ମ୍ୟାଚ୍ରୁ ନିଜ ନାମ ପ୍ରତ୍ୟାହାର କରିନେଇଥିଲେ । ସେପଟେ ହାଇଦ୍ରାବାଦ ଟେଷ୍ଟରେ କେଏଲ ରାହୁଲ ଆହତ ହୋଇଥିଲେ । ଓ୍ବିକେଟ କିପର ବ୍ୟାଟର ରାହୁଲ ବିଶାଖାପାଟନମ୍ ଟେଷ୍ଟ ମ୍ୟାଚ୍ରେ ଭାରତୀୟ ଟିମରେ ସାମିଲ ହୋଇପାରି ନାହାନ୍ତି । ହେଲେ ଇଂଲଣ୍ଡ ବିପକ୍ଷରେ ତୃତୀୟ ଟେଷ୍ଟ ମ୍ୟାଚ୍ରେ ଟିମ୍କୁ ଫେରିବେ କେଏଲ ରାହୁଲ ।
ତୃତୀୟ ଟେଷ୍ଟ ମ୍ୟାଚ୍ ଫେବୃଆରୀ ୧୫ରେ ଖେଳାଯିବ । କିନ୍ତୁ ତୃତୀୟ ଟେଷ୍ଟରେ ବିରାଟ କୋହଲି ଫେରିବେ କି ? ଏନେଇ ସସପେନ୍ସ ଜାରି ରହିଛି । ବିରାଟ କୋହଲିଙ୍କୁ ଚୟନକର୍ତ୍ତା ମଧ୍ୟ ଅପେକ୍ଷା କରିଛନ୍ତି । ବିରାଟ କୋହଲି ଖେଳିବେ କି ନାହିଁ, ସେନେଇ ନିଜେ ବିରାଟ ହିଁ ନିଷ୍ପତ୍ତି ନେବେ । ବ୍ୟକ୍ତିଗତ କାରଣ ଦର୍ଶାଇ ନାମ ପ୍ରତ୍ୟାହାର କରିଥିବା କୋହଲି ତୃତୀୟ ମ୍ୟାଚ୍ରେ ଫେରିବେ କି ନାହିଁ ତା ଉପରେ ସମସ୍ତଙ୍କ ନଜର ରହିଛି ।
ଭାରତ ଏବଂ ଇଂଲଣ୍ଡ ମଧ୍ୟରେ ୫ ଟେଷ୍ଟ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଜାରି ରହିଛି । ପ୍ରଥମ ମ୍ୟାଚ୍ ହାଇଦ୍ରାବାଦରେ ଖେଳାଯାଇଥିଲା । ପ୍ରଥମ ଟେଷ୍ଟରେ ଟିମ୍ ଇଣ୍ଡିଆ ପରାସ୍ତ ହୋଇଥିଲା । ଇଂଲଣ୍ଡ ରୋହିତ ଶର୍ମାଙ୍କ ନେତୃତ୍ବାଧୀନ ଭାରତୀୟ ଟିମ୍କୁ ୨୮ ରନ୍ରେ ହରାଇଥିଲା । ଆଉ ଏବେ ଦ୍ବୀତିୟ ଟେଷ୍ଟ ମ୍ୟାଚ ବିଶାଖାପାଟନମରେ ଖେଳାଯାଉଛି । ସେହିଭଳି ତୃତୀୟ ଟେଷ୍ଟ ମ୍ୟାଚ୍ ଫେବୃଆରୀ ୧୫ରେ ରାଜକୋଟରେ ଖେଳାଯିବ । ଚତୁର୍ଥ ମ୍ୟାଚ୍ ରାଞ୍ଚିରେ ଫେବୃଆରୀ ୨୩ରେ ଖେଳାଯିବାକୁ ଥିବା ବେଳେ ଶେଷ ମ୍ୟାଚ୍ ମାର୍ଚ୍ଚ ୭ରେ ଧର୍ମଶାଳାରେ ଖେଳାଯିବ ।
