ଝାରସୁଗୁଡ଼ା,୨୯/୦୧: ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ସ୍ୱର୍ଗତ ନବ କିଶୋର ଦାସଙ୍କ ହତ୍ୟାକୁ ବର୍ଷେ ପୂରିଲା । ବ୍ରଜରାଜନଗର ଥାନା ଗାନ୍ଧୀଛକ ଠାରେ ଏକ ଦଳୀୟ କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିବା ସମୟରେ ତାଙ୍କୁ ଜଣେ ପୁଲିସ୍ ଏଏସ୍ଆଇ ଗୁଳି କରି ହତ୍ୟା କରିଥିଲେ । ଘଟଣାକୁ ବର୍ଷେ ପୂରିଥିଲେ ହେଁ ଆଜି ବି ହତ୍ୟା ପଛର କାରଣକୁ ନେଇ ଜନମାନସରେ ଅନେକ ପ୍ରଶ୍ନ ବଞ୍ଚି ରହିଛି । ଜଣେ କ୍ୟାବିନେଟ ମନ୍ତ୍ରୀଙ୍କୁ କେଉଁ କାରଣରୁ ଜଣେ ପୁଲିସ୍ କର୍ମୀ ହତ୍ୟା କଲେ ତାହାର ଉତ୍ତର ଏଯାଏଁ ଲୋକଙ୍କୁ ସନ୍ତୁଷ୍ଟ କରିପାରି ନାହିଁ । ଅନ୍ୟପକ୍ଷରେ ଏହି ମାମଲାର ମୁଖ୍ୟ ଅଭିଯୁକ୍ତ ବହିଷ୍କୃତ ପୁଲିସ୍ ଏଏସ୍ଆଇ ଗୋପାଳ ଦାସ ଏବେ ବି ଚୌଦ୍ୱାର ଜେଲରେ ବିଚାରାଧୀନ ବନ୍ଦୀ ଭାବେ ରହିଥିବା ବେଳେ ଝାରସୁଗୁଡ଼ା ଅତିରିକ୍ତ ଜିଲ୍ଲା ଓ ଦୌରାଜଜଙ୍କ ଅଦାଲତରେ ମାମଲାର ଶୁଣାଣି ଜାରି ରହିଛି ।
ସ୍ୱର୍ଗତ ନବ କିଶୋର ଦାସ ଜଣେ ପରାକ୍ରମୀ ରାଜନେତା ଭାବେ ଖ୍ୟାତ ଥିଲେ । ତାଙ୍କର ରାଜନୈତିକ ଜୀବନରେ ସେ ପାଇଥିବା ଈର୍ଷଣୀୟ ସଫଳତା ବାସ୍ତବିକ ତାଙ୍କୁ ବିରଳ ବ୍ୟକ୍ତିତ୍ୱର ଅଧିକାରୀ କରିଥିଲା । କ୍ୟାବିନେଟ ମନ୍ତ୍ରୀ ଭାବେ ସେ କୋଭିଡ୍ ମହାମାରୀ ସମୟରେ ବି ସ୍ୱାସ୍ଥ୍ୟ ବିଭାଗ ଭଳି ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ତୁଳାଇଥିଲେ । ରାଜ୍ୟରେ କୋଭିଡ୍ ପରିଚାଳନା କ୍ଷେତ୍ରରେ ସରକାରଙ୍କ ଭୂମିକାକୁ ଜାତୀୟ ସ୍ତରରେ ପ୍ରଶଂସା ମିଳିଥିଲା ।
ଏଥିସହ ନିଜର କମ ଦିନର ମନ୍ତ୍ରୀତ୍ୱ କାଳରେ ସେ ଅନେକ ବିକାଶମୂଳକ କାର୍ଯ୍ୟ କରି ଚର୍ଚ୍ଚାରେ ରହିବା ସହ ରାଜନୈତିକ ପତିଆରା ବେଶ ବୃଦ୍ଧି ପାଇ ଚାଲିଥିଲା । ଏଭଳି ଏକ ସମୟରେ ତାଙ୍କର ହତ୍ୟାକୁ ଲୋକେ ସହଜରେ ହଜମ କରି ପାରି ନ ଥିଲେ । ହତ୍ୟାକାଣ୍ଡ ପରେ ଶାସକ ବିରୋଧୀ ମଧ୍ୟରେ ପରସ୍ପର ବିରୋଧରେ ବୟାନବାଜୀ ହେବା ସହ ବହୁ ବିତର୍କ ସୃଷ୍ଟି ହୋଇଥିଲା । ହେଲେ ଏହାରି ଭିତରେ ଝାରସୁଗୁଡ଼ା ବିଧାନସଭା ନିର୍ବାଚନରେ ତାଙ୍କର ଉତ୍ତରାଧିକାରୀଙ୍କ ବିପୁଳ ଭୋଟରେ ବିଜୟ ତାଙ୍କର ଲୋକପ୍ରିୟତାକୁ ବେଶ ପ୍ରମାଣିତ କରିଥିଲା ।
ପ୍ରଥମ ଶ୍ରାଦ୍ଧ ବାର୍ଷିକୀ ଅବସରରେ ତାଙ୍କର ସ୍ମୃତି ରକ୍ଷା ଲାଗି ତାଙ୍କର ଅନୁଗାମୀ, ସହଯୋଗୀ ତଥା ସମର୍ଥକମାନେ ଅଣ୍ଟା ଭିଡ଼ିଛନ୍ତି । ଝାରସୁଗୁଡ଼ା ଜିଲ୍ଲା ପୁଲିସ କାର୍ଯ୍ୟାଳୟ ସମ୍ମୁଖ ଛକ ଠାରେ ଏକ ପୂର୍ଣ୍ଣାବୟବ ପ୍ରତିମୂର୍ତ୍ତିକୁ ଉନ୍ମୋଚନ କରାଯିବ । ଯେଉଁଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି ।
ବିଧାୟିକା ଦୀପାଳି ଦାସ କହିଛନ୍ତି ଜନ ସାଧାରଣଙ୍କ କରକମଳରେ ଜନନେତାଙ୍କ ପ୍ରତିମୂର୍ତ୍ତି ଉନ୍ମୋଚିତ ହେବ । ନବ ଦାସଙ୍କ ଶ୍ରାଦ୍ଧବାର୍ଷିକୀ ଅବସରରେ ଝାରସୁଗୁଡ଼ା ମନମୋହନ ପଡ଼ିଆରେ ସ୍ମୃତି ସଭା ସହ ସର୍ବଧର୍ମ ପ୍ରାର୍ଥନା, ସ୍ମରଣିକା ଉନ୍ମୋଚନ ସାଙ୍ଗକୁ ସକାଳେ ମନମୋହନ ପଡ଼ିଆରୁ ପୁରୁଣା ବସଷ୍ଟାଣ୍ଡ ପାଖ ଗାନ୍ଧୀ ପ୍ରତିମୂର୍ତ୍ତି ପର୍ଯ୍ୟନ୍ତ ଏକ ମାରାଥନର କାର୍ଯ୍ୟକ୍ରମ ରଖାଯାଇଛି।