ଭୁବନେଶ୍ୱର,୨୯/୦୧: ମାତ୍ର ଆଠ/ନଅ ବର୍ଷରେ ଚେସ୍ରେ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଚମତ୍କାର ପ୍ରଦର୍ଶନ କରି ରାଜ୍ୟକୁ ଗୌରବାନ୍ୱିତ କରିବା ସହ ବେଶ ଚର୍ଚ୍ଚାରେ ରହି ଆସିଛନ୍ତି ପଦ୍ମିନୀ ରାଉତ । ଗୋଟିଏ ପରେ ଗୋଟିଏ ଫିଡେ ଟାଇଟଲ ସହ ସେ ଏବେ ଇଣ୍ଟରନ୍ୟାସନାଲ ମାଷ୍ଟର (ଆଇଏମ୍) । ସଫଳ ଖେଳ ଜୀବନ ପରେ ପଦ୍ମିନୀ ଆଜି ବୈବାହିକ ଜୀବନରେ ଛନ୍ଦି ହୋଇଛନ୍ତି । ସେ ମୁମ୍ବାଇର ଇଞ୍ଜିନିୟର ଜୟକିଷିନ ମନକାନିଙ୍କୁ ବିବାହ କରିଛନ୍ତି । ପଟିଆର ଏକ ଘରୋଇ ହୋଟେଲରେ ରବିବାର ପୂର୍ବାହ୍ନରେ ତାଙ୍କର ବିବାହ ସମ୍ପନ୍ନ ହୋଇଛି ।
ପଦ୍ମିନୀଙ୍କ ଖେଳ ଜୀବନ ବେଶ ସଫଳ ।ଜାତୀୟ ମହିଳା ଚେସ୍ରେ ସେ ଜଣେ ଆଗ ଧାଡ଼ିର ଖେଳାଳି । ପଦ୍ମିନୀଙ୍କ ରେଟିଂ ୨୩୫୩ ରହିଛି । ଜାନୁଆରୀ ମାସରେ ପ୍ରକାଶ ପାଇଥିବା ଜାତୀୟ ମହିଳା ଚେସ୍ ମାନ୍ୟତାରେ ସେ ୧୦ତମ ସ୍ଥାନରେ ରହିଛନ୍ତି । ଗତ ବର୍ଷ ପଦ୍ମିନୀ ଜାତୀୟ ମହିଳା ଚେସ୍ରେ ଚାମ୍ପିଅନ ହେବାର ଗୌରବ ଲାଭ କରିଥିଲେ । ଏହାପୂର୍ବରୁ ୨୦୧୪, ୨୦୧୫, ୨୦୧୬ ଓ ୨୦୧୭ ସଂସ୍କରଣରେ ଟାଇଟଲ ଜିତିଥିଲେ । ମୋଟ ୫ ଥର ଜାତୀୟ ଟାଇଟଲ ଜିତିବାର ଗୌରବ ଲାଭକରିଛନ୍ତି ।
ପଦ୍ମିନୀଙ୍କ ଜନ୍ମ ୧୯୯୪ ମସିହା ଜାନୁଆରୀ ୫ ତାରିଖରେ । ୨୦୦୫ରେ ସେ ପ୍ରଥମ ଜାତୀୟ ଟାଇଟଲ ଜିତିଥିଲେ । ତାହା ଥିଲା ୧୧ ବର୍ଷରୁ କମ୍ ବାଳିକା ବର୍ଗରେ । ଏହାପରେ ସେ ଆଉ ପଛକୁ ଫେରି ନାହାନ୍ତି । ଆଇଏମ୍ ଏବଂ ମହିଳା ଗ୍ରାଣ୍ଡମାଷ୍ଟ୍ ଟାଇଟଲ ଜିତିବା ପରେ ସେ ଏବେ ଗ୍ରାଣ୍ଡମାଷ୍ଟର ଟାଇଟଲକୁ ଅପେକ୍ଷା କରି ରହିଛନ୍ତି ।
