ନୂଆଦିଲ୍ଲୀ ୧୩/୧୧ : ଦକ୍ଷିଣୀ ସୁପରଷ୍ଟାର୍ ପ୍ରଭାସ ଓ କୃତି ସାନନ୍ ଅଭିନୀତ ଫିଲ୍ମ ‘ଆଦିପୁରୁଷ’ ଥିଲା ରାମାୟଣ ଉପରେ ଆଧାରିତ। ଫିଲ୍ମଟି ତିଆରି ହେବାରେ ଯେତେ ଟଙ୍କା ଖର୍ଚ୍ଚ ହୋଇଥିଲା ସେହି ଅନୁସାରେ ବକ୍ସ ଅଫିସ୍ କଲେକ୍ସନ୍ ଥିଲା ଖୁବ୍ ନୈରାଶ୍ୟଜନକ। ଏମିତି ଏକ ବିଗ୍ ବଜେଟ୍ ମୁଭି ଦର୍ଶକଙ୍କୁ ପସନ୍ଦ ହୋଇନଥିବା ବେଳେ ରାମାୟଣ ଉପରୁ ବଲିୁଡ୍ର ମନ ଛାଡୁନି। ଏବେ ପୁଣି ନୀତେଶ ତିୱାରି ‘ରାମାୟଣ’ ତିଆରିରେ ବ୍ୟସ୍ତ। ଏହି ଫିଲ୍ମରେ ରଣବୀର କପୁର ଶ୍ରୀରାମଙ୍କ ଚରିତ୍ରରେ ଅଭିନୟ କରିଛନ୍ତି। ଏବେ ଖବର ମିଳିଛି ରୋହିତ ସେଟ୍ଟି ବି ରାମାୟଣରେ ମଜ୍ଜି ଯାଇଛନ୍ତି। ଅର୍ଥାତ ସେ ମଧ୍ୟ ଏହି ପୌରାଣିକ କାହାଣୀ ଅବଲମ୍ବନରେ ସିନେମା ତିଆରି କରିବେ ବୋଲି ମୈଦାନକୁ ଓହ୍ଲାଇଛନ୍ତି।
ଏତେ ଦିନ ଧରି ଚୋର-ପୁଲିସ ଖେଳରେ ମାତିଥିଲେ ରୋହିତ। ବଲିଉଡ୍ର ‘କପ୍ ୟୁନିଭର୍ସ’ର ସ୍ରଷ୍ଟା ବୋଲି ଯଦି କାହାକୁ କୁହାଯାଏ ତେବେ ସେ ହେଉଛନ୍ତି ରୋହିତ ସେଟ୍ଟି। ତେବେ ରୋହିତ ଏଥର ନିଜର ଚିରାଚରିତ ଶୈଳୀରୁ ଟିକେ ଭିନ୍ନ ଦିଗରେ ଯିବାକୁ ଇଚ୍ଛା କରିଛନ୍ତି। ସେଥିପାଇଁ ରାମୟଣ ଆଡକୁ ଢଳିଛନ୍ତି। ଯଦିଓ ନିଜର ପରିଚିତ ପରିସର ବାହାରକୁ ଯିବାକୁ ଚାହାନ୍ତି ନାହିଁ। ସେହି ଢାଞ୍ଚାରେ ସେ ରାମାୟଣର ଗଳ୍ପ ବୁଣିବାକୁ ଚେଷ୍ଟା କରୁଛନ୍ତି। ଫିଲ୍ମର ନାଁ ‘ସିଂହମ ୩’। ଶୁଣିବାକୁ ମିଳୁଛି ରାମଙ୍କ ଆଦର୍ଶରେ ଅନୁପ୍ରାଣିତ ଏକ ଚରିତ୍ରରେ ଦେଖାଯିବେ ଅଜୟ ଦେବଗନ। ଲକ୍ଷ୍ମଣଙ୍କ ବ୍ୟକ୍ତିତ୍ୱ ଅନୁସାରେ ଅଭିନୟ କରିବେ ଅକ୍ଷୟ କୁମାର। ହନୁମାନଙ୍କ ଗୁଣ ସହିତ ମେଳ ଖାଉଥିବ ରଣବୀର ସିଂହଙ୍କ ଚରିତ୍ର। କେବଳ ଏତିକି ନୁହେଁ, ଏକଥା ବି ଶୁଣିବାକୁ ମିଳିଛି ‘ସିଂହମ ୩’ ରେ କରିନା କପୁର ଖାନଙ୍କ ଚରିତ୍ରଟିକୁ ଦେବୀ ସୀତାଙ୍କ ବ୍ୟକ୍ତିତ୍ୱ ସହ ମେଳ ଖାଉଥିବାର ଦେଖିବାକୁ ମିଳିବ।
