ପୁରୀ,୨୪/୦୨: ବିଳମ୍ବିତ ରାତିରେ କୁମ୍ଭାରପଡ଼ା ଥାନା ଅଧୀନ ରେଡକ୍ରସ ରୋଡରେ ସଶସ୍ତ୍ର ଡକାୟତି ହୋଇଛି । ଗୁଳି ଓ ଛୁରା ମାଡ଼ କରି ଏସ୍ଆର ଜୁଏଲର୍ସରୁ ଟଙ୍କା ଓ ଅଳଙ୍କାର ଲୁଟିନେଇଛନ୍ତି ଦୁର୍ବୃତ୍ତ । ଶୁକ୍ରବାର ରାତିରେ ଏହି ଅଘଟଣ ଘଟିଥିବା ବେଳେ ତିନିଜଣ ରକ୍ତାକ୍ତ ହୋଇଛନ୍ତି । ଜଣେ ଯୁବତୀ ଅଳ୍ପକେ ବର୍ତ୍ତିଯାଇଛନ୍ତି । ଆହତ ୩ଜଣ ହେଲେ ଜୁଏଲର୍ସ ମାଲିକ ଶଙ୍କରଲାଲ୍ ପଞ୍ଚ୍, ତାଙ୍କ ପୁଅ ବିକାଶ କୁମାର ପଞ୍ଚ ଓ ଅନ୍ୟ ଜଣେ କର୍ମଚାରୀ ପ୍ରତୀକ ଦାସ ।
ରାତି ପ୍ରାୟ ୯ଟା ୪୫ । ଜୁଏଲର୍ସକୁ ବନ୍ଦ କରୁଥିଲେ କର୍ମଚାରୀ । ହଠାତ୍ ୪ ଜଣ ଯୁବକ ସଟର ଟେକି ଜୁଏଲର୍ସ ଭିତରେ ପଶିଯାଇଥିଲେ । ଲଗାତାର ଦୁଇ ରାଉଣ୍ଡ ଗୁଳି ଚଳାଇଥିଲେ । ଏହାପରେ କର୍ମଚାରୀଙ୍କୁ ଛୁରା ମାଡ଼ କରିଥିଲେ । ଛୁରାମାଡ଼ରେ ରକ୍ତାକ୍ତ ହୋଇଥିବା କର୍ମଚାରୀମାନେ ଆହତ ଅବସ୍ଥାରେ ଜୁଏଲର୍ସର ଗୋଟିଏ କୋଣରେ ଛିଡ଼ା ହୋଇଥିଲେ । ଜଣେ ଦୁର୍ବୃତ୍ତ ତାଙ୍କୁ ଜଗି ରହିଥିଲା । ଅନ୍ୟ ତିନିଜଣ ପ୍ରାୟ ୩୫ ହଜାର ଟଙ୍କା କ୍ୟାସ ବକ୍ସରୁ ଲୁଟି ନେଇଥିଲେ । ଏହାପରେ ପ୍ରାୟ ୫୦ ହଜାର ଟଙ୍କାର ରୁପା ଅଳଙ୍କାର ଏବଂ ପ୍ରାୟ ୩୦ ହଜାର ଟଙ୍କାର ଇମିଟେସନ ଲୁଟ କରିଥିଲେ ବୋଲି ଶଙ୍କର କହିଛନ୍ତି । ତେବେ ସେମାନେ କେଉଁ ଦିଗରୁ ଆସିଲେ ଓ ଲୁଟ୍ ପରେ କେଉଁ ଦିଗକୁ ଖସିଗଲେ ତାହା ସିସିଟିଭିରେ ରେକର୍ଡ ହୋଇଛି । ସିସିଟିଭି ଯାଞ୍ଚ ପରେ ସମସ୍ତ ତଥ୍ୟ ଜଣାପଡ଼ିବ ଓ ହିସାବ କରିବା ପରେ ଜୁଏଲର୍ସରୁ କେତେ ଲୁଟ୍ ହୋଇଛି ଜଣାପଡ଼ିବ ବୋଲି ମାଲିକ ଶଙ୍କର କହିଛନ୍ତି ।
ଅନ୍ୟପଟେ ଏସ୍ପି ପିନାକ୍ ମିଶ୍ର ସହରର ତିନିଟି ପ୍ରବେଶ ପଥକୁ ବ୍ଲକିଂ କରିବାକୁ ନିର୍ଦ୍ଦେଶ ଦେଇଛନ୍ତି । ସିଟି ଡିଏସ୍ପି ପ୍ରଶାନ୍ତ କୁମାର ସାହୁ ଓ କୁମ୍ଭାରପଡ଼ା ଥାନା ଆଇଆଇସି ଜୟଦୀପ ମହାନ୍ତିଙ୍କ ସହ ତିନିଟି ପୁଲିସ ଟିମ୍ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛନ୍ତି । ବିଳମ୍ବିତ ରାତି ସୁଦ୍ଧା କୌଣସି ଦୁର୍ବୃତ୍ତଙ୍କ ପତ୍ତା ମିଳିନାହିଁ । ତେବେ ମନ୍ଦିରରୁ ମୂର୍ତ୍ତି ଚୋରି, ସହରରେ ଏକାଧିକ ଲୁଟ୍ପାଟ୍ ଘଟଣା ପରେ ଜୁଏଲର୍ସରେ ଗୁଳି ଓ ଛୁରାମାଡ଼ କରି ଲୁଟ୍ ଘଟଣା ସହରକୁ ଅସୁରକ୍ଷିତ କରି ପକାଇଛି ।