ନୂଆଦିଲ୍ଲୀ ୦୨/୧୨: ମଧୁମେହ, ରକ୍ତଚାପର ଚିକିତ୍ସା ପାଇଁ ଅନେକ ପ୍ରକାର ଔଷଧ ମିଳୁଛି । କିନ୍ତୁ ଜାଣନ୍ତି? ବିଶ୍ୱର କିଛି ସ୍ଥାନରେ ଚାପୁଡ଼ା ମାରି ଏହି ଘାତକ ରୋଗର ଚିକିତ୍ସା କରାଯାଏ । ହଁ, ଆଶ୍ଚର୍ଯ୍ୟ ଲାଗିଲେ ବି ଏହା ସତ ।
ବିଶେଷଜ୍ଞଙ୍କ ଅନୁସାରେ, ଏହା ଅନ୍ଧବିଶ୍ୱାସ ନୁହେଁ । ଏହା ପଛରେ ଚିକିତ୍ସା ବିଜ୍ଞାନ ରହିଛି । ଏହାକୁ ସ୍ଲାପିଂ ଥେରାପି କୁହାଯାଏ । ଚୀନ୍, କୋରିଆ ସମେତ ଅନେକ ଦେଶରେ ଏହି ଥେରାପି ଲାଗି କର୍ମଶାଳା ଆୟୋଜିତ ହୁଏ ଏବଂ ରୋଗୀଙ୍କୁ ଚାପୁଡ଼ା ମାରି ଚିକିତ୍ସା କରାଯାଏ । ଇଂଲଣ୍ଡ ବାସିନ୍ଦାଙ୍କ ପାଇଁ ଏହା ସାଧାରଣ କଥା । ଏହି ଥେରାପିରେ ରୋଗୀଙ୍କୁ ବାରମ୍ବାର ଚାପୁଡ଼ା ମାରି ଚିକିତ୍ସା କରାଯାଏ । ରୋଗୀ ନିଜେ ମଧ୍ୟ ନିଜକୁ ବାରମ୍ବାର ଚାପୁଡ଼ା ମାରିପାରିବେ ।
ତେବେ ଏ ବିଷୟରେ ଚିକିତ୍ସକମାନେ କହନ୍ତି, ସ୍ଲାପିଂ ଥେରାପି ଚୀନ୍ ଓ କୋରିଆରେ ଆରମ୍ଭ ହୋଇଥିଲା । କେବଳ କୌଣସି ପ୍ରକାର ରୋଗରେ ପୀଡ଼ିତ ବ୍ୟକ୍ତିଙ୍କୁ ହିଁ ଏହି କର୍ମଶାଳାରେ ସାମିଲ କରାଯାଏ । ରୋଗୀ ନିଜ ଶରୀରର ବିଭିନ୍ନ ଅଙ୍ଗ, ବିଶେଷ କରି ଖଞ୍ଜା ଓ ମୁଣ୍ଡରେ ଜୋର ଜୋରରେ ଚାପୁଡ଼ା ମାରନ୍ତି । ତ୍ୱଚା ଲାଲ୍ ପଡ଼ିବା ଓ କଷ୍ଟ ଲାଗିବା ଯାଏ ଚାପୁଡ଼ା ଜାରି ରହେ ।
କିଛି ଲୋକ ଚଉକି, ଚଟାଣ, କିମ୍ବା କାନ୍ଥ ସାମ୍ନାରେ ଶୋଇ ଶରୀରକୁ ପ୍ରସାରିତ କରନ୍ତି । ବିଶ୍ୱାସ ରହିଛି, ଚାପୁଡ଼ା ମାରିବା ଦ୍ୱାରା ରକ୍ତ ବାହିକାଗୁଡ଼ିକ ଫାଟେ ଏବଂ ରକ୍ତରେ ଥିବା ବିଷାକ୍ତ ପଦାର୍ଥ ଶରୀରରୁ ବାହାରକୁ ଚାଲିଯାଏ । ମଧୁମେହ ଓ ରକ୍ତଚାପ ଭଳି ସମସ୍ୟାର ମଧ୍ୟ ସମାଧାନ ହୁଏ । ଔଷଧରେ ଠିକ୍ ହେଉନଥିବା ଅନେକ ଅସାଧ୍ୟ ରୋଗକୁ ଏହି ଥେରାପି ଜରିଆରେ ଠିକ୍ କରାଯାଇପାରେ ।
ବିଶେଷଜ୍ଞଙ୍କ ଅନୁସାରେ, ଶରୀରର ଯେଉଁ ସ୍ଥାନରେ ରକ୍ତ ଜମାଟ ବାନ୍ଧିଥାଏ, ସେଠାରେ ଜୋର୍ରେ ଚାପୁଡ଼ା ମରାଯାଏ । ଅନେକ ସମୟରେ ରୋଗୀ ଜୋର ଜୋର ଚିତ୍କାର କରନ୍ତି । ତଥାପି ଚାପୁଡ଼ା ମାରୁଥିବା ବ୍ୟକ୍ତି ଅଟକି ନଥାନ୍ତି । ଲୋକେ କାନ୍ଦିଲେ ବି ଚାପୁଡ଼ା ବନ୍ଦ ହୁଏନା ।
ଅଧିକାଂଶ ଲୋକ କହନ୍ତି, ଏହା ଯୋଗୁ ସେମାନେ ସୁସ୍ଥ ହୋଇଛନ୍ତି । ସେଥିପାଇଁ ଏହି ଥେରାପି ଖୁବ୍ ଲୋକପ୍ରିୟ ହୋଇଛି । କର୍ମଶାଳାର ଟିକେଟ୍ ଚାହୁଁ ଚାହୁଁ ବିକ୍ରି ହୋଇଯାଏ । ଚୀନ୍, ହଂକଂ, ତାଇୱାନ୍, ମାଲେସିୟା ଓ ସିଙ୍ଗାପୁରରେ ଏହି କର୍ମଶାଳା ବେଶ ଲୋକପ୍ରିୟତା ପାଇଛି । ଏଠାରେ ଥଣ୍ଡା, ଶରୀର ଯନ୍ତ୍ରଣା, ଅଲ୍ଝାଇମର, ଷ୍ଟ୍ରୋକ୍, ପକ୍ଷାଘାତ, କିଡ୍ନୀ ବିଫଳତା,ଏମିତିକି କର୍କଟ ଓ ଅଟିଜମ୍ର ଚିକିତ୍ସା କରାଯାଉଥିବା ଦାବି ହୁଏ । ଡାକ୍ତରଙ୍କ କହିବା ଅନୁସାରେ, ଚାପୁଡ଼ା ମରାଯାଇଥିବା ସ୍ଥାନରେ ରଙ୍ଗବେରଙ୍ଗ ଚିହ୍ନ, ଗଣ୍ଠି ଓ ଫୁଲା ଦେଖି ଭୟଭୀତ ହେବା ଆବଶ୍ୟକ ନାହିଁ । ଏହା ଭଲ ଉପଚାରର ପ୍ରତିକ୍ରିୟା ।
