ପୁରୀ,୧୦/୦୨: ଆଜି ଶ୍ରୀବିଗ୍ରହଙ୍କ ପଦ୍ମମୁଖ ବେଶ ଅନୁଷ୍ଠିତ ହେବ । ରତ୍ନସିଂହାସନ ପାଲଟିବ ସଦ୍ୟ ପଦ୍ମ ପ୍ରସ୍ଫୁଟିତ ପୁଷ୍କରିଣୀ । ସେଥିରେ ହଂସରାଳି ଖେଳୁଥିବେ । ବିଶାଳ ପଦ୍ମର କେଶର  ଭାଗରେ ଶୋଭାପାଉଥିବ ଦାରୁବ୍ରହ୍ମଙ୍କ ଶ୍ରୀମୁଖ । ପଦ୍ମ ବେଶରେ ଥାଇ ଶ୍ରୀବିଗ୍ରହଙ୍କ ପହୁଡ଼ ନୀତି  ଅନୁଷ୍ଠିତ ହେବ । 

ରବିବାର ସକାଳେ ବେଶରେ ଥାଇ ଠାକୁରଙ୍କ ମଙ୍ଗଳାଳତି ବଢିବ । ଖିରି ଅମାଲୁ  ଭୋଗ ଲାଗିବ । ଭକ୍ତମାନେ ଠାକୁରଙ୍କ ପଦ୍ମମୁଖ ବେଶ ଦର୍ଶନ ସହ ଆନନ୍ଦବଜାରରୁ ଖିରି ଅମାଲୁ  ଭୋଗ ପାଇ ଧନ୍ୟ ହେବେ । 

ମାଘମାସ ଅମାବାସ୍ୟାଠାରୁ ବସନ୍ତ ପଞ୍ଚମୀ ମଧ୍ୟରେ ଶନିବାର କିମ୍ବା ବୁଧବାର ଦିନ ଏହି ବେଶ ଅନୁଷ୍ଠିତ ହେବାର ପରମ୍ପରା ରହିଛି । ମହାପ୍ରଭୁଙ୍କ ଦୟଣାମାଳି ସେବକ  ବସନ୍ତ କୁମାର ରଣାଙ୍କ ତତ୍ତ୍ୱାବଧାନରେ ଠାକୁରଙ୍କ ବେଶ ପ୍ରସ୍ତୁତ ହୋଇଛି । ପରମ୍ପରା ଅନୁସାରେ ଦୋଳମଣ୍ଡପ ସାହିସ୍ଥିତ ବଡ଼ଛତା ମଠରୁ ଏହି ବେଶ ସାମଗ୍ରୀ ଶ୍ରୀମନ୍ଦିରକୁ ଆସିଥାଏ ।