ଭଞ୍ଜନଗର, ୩୧/୦୧ : ପ୍ରି ବୋର୍ଡ ମାଟ୍ରିକ୍ ପରୀକ୍ଷା ବନ୍ଦକୁ ବିରୋଧ। ବଦାଙ୍ଗୀ ସରକାରୀ ନୋଡାଲ ହାଇସ୍କୁଲ ଆଗରେ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ବିକ୍ଷୋଭ ପ୍ରଦର୍ଶନ। ବିଦ୍ୟାଳୟ ଫାଟକରେ ତାଲା ପକାଇ ପ୍ରତିବାଦ କଲେ ଛାତ୍ରଛାତ୍ରୀ।
ସୂଚନାନୁଯାୟୀ, ବଦାଙ୍ଗୀ ସରକାରୀ ନୋଡାଲ ହାଇସ୍କୁଲରେ ଏବେ ମାତ୍ର ୨ ଜଣ ଶିକ୍ଷକ ଓ ୨ ଜଣ ପିଅନ ସହ ଜଣେ ଅତିଥି ଶିକ୍ଷକ କାର୍ଯ୍ୟ କରୁଛନ୍ତି। ଆଜି ସରକାରୀ କାର୍ଯ୍ୟକ୍ରମରେ ପ୍ରଧାନ ଶିକ୍ଷକ ଓ ଅନ୍ୟ ଜଣେ ସହଯୋଗୀ ଶିକ୍ଷକ ବ୍ରହ୍ମପୁର ଚାଲି ଯାଇଥିବା କୁହାଯାଉଛି। ଏପଟେ ପୂର୍ବରୁ ବୁଧବାର ବିଦ୍ୟାଳୟରେ ପ୍ରି ବୋର୍ଡ ମାଟ୍ରିକ ପରୀକ୍ଷା ହେବ ବୋଲି ଛାତ୍ରଛାତ୍ରୀଙ୍କୁ ନୋଟିସ ଦିଆଯାଇଥିଲା। ଏଣୁ ଛାତ୍ରଛାତ୍ରୀମାନେ ନିର୍ଦ୍ଧାରିତ ସମୟରେ ବିଦ୍ୟାଳୟକୁ ଆସିଥିଲେ। ହେଲେ ଶିକ୍ଷକ ଆସିନଥିବା କାରଣରୁ ଉକ୍ଷିପ୍ତ ହୋଇ ବିଦ୍ୟାଳୟ ଫାଟକରେ ତାଲା ପକାଇ ବାହାରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଅତିଥି ଶିକ୍ଷକ ପହଞ୍ଚି ଥିଲେ ମଧ୍ୟ ପିଲାଏ ବିଦ୍ୟାଳୟ ବାହାରେ ବସି ରହିଥିବାରୁ ଏକ ପ୍ରକାର ଅପ୍ରୀତିକର ସୃଷ୍ଟି ହୋଇଛି। ଛାତ୍ରଛାତ୍ରୀଙ୍କ ବିକ୍ଷୋଭ ପ୍ରଦର୍ଶନ ଜାରି ରହିଛି।