ଭୁବନେଶ୍ୱର,୨୫/୦୨: ମାଟ୍ରିକ୍‌ ଓ ଯୁକ୍ତ ୨ପରୀକ୍ଷା ପାଇଁ ସବୁବେଳେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ମାଳ ମାଳ ପଦକ୍ଷେପ ନିଆଯାଉଛି । ପରୀକ୍ଷା ସୁପରିଚାଳନା ହେଉ କି ପରୀକ୍ଷା ପ୍ରସ୍ତୁତି ପାଇଁ ଟିପ୍ସ ସବୁ କ୍ଷେତ୍ରରେ କାର୍ଯ୍ୟ କରାଯାଉଛି । ହେଲେ ସବୁ ଫେଲ୍‌ ମାରୁଛି । ମାଟ୍ରିକ୍‌ ଓ ଯୁକ୍ତ ୨ ପରୀକ୍ଷା ପାଇଁ ଗଣଶିକ୍ଷା ବିଭାଗ ପକ୍ଷରୁ ହୋଇଥିବା ଟେଲିମାନସ ସେବା ଫେଲ୍‌ ମାରିଛି ।  ପରୀକ୍ଷାର୍ଥୀଙ୍କୁ ଚାପମୁକ୍ତ କରିବାକୁ  ପାଇଁ ଟେଲିମାନସ ସେବାର ଶୁଭାରମ୍ଭ  ହୋଇଥିଲା । ପିଲାମାନେ ଏହି ନମ୍ବରରେ  ଯୋଗାଯୋଗ କରି କିପରି ଚାପମୁକ୍ତ  ହେବେ ତାର ଟିପ୍ସ ନେବାର ବ୍ୟବସ୍ଥା  ରହିଥିଲା । ଏଥିରେ କାଉନ୍‌ସେଲିଂର  ବ୍ୟବସ୍ଥା ମଧ୍ୟ ଥିଲା । ଏତେ ସବୁ ପ୍ରୟାସ  ପରେ ମଧ୍ୟ ପରୀକ୍ଷା ଆରମ୍ଭର ସପ୍ତାହ  ମଧ୍ୟରେ ୩ ଛାତ୍ର ଜୀବନ ହାରିଛନ୍ତି । କିଏ ପରୀକ୍ଷା ଖରାପ ହେବାରୁ ଆଉ କିଏ ପରୀକ୍ଷା ଦେବା ପୂର୍ବରୁ ଭୟରେ ଆତ୍ମହତ୍ୟା କରିଥିବା  ଅଭିଯୋଗ ସାମ୍ନାକୁ ଆସିଛି । ଅଭିଭାବକଙ୍କ ଅଭିଯୋଗ, ଗଣଶିକ୍ଷା  ବିଭାଗ ପକ୍ଷରୁ ନିଆଯାଉଥିବା ବିଭିନ୍ନ ପଦକ୍ଷେପ କେବଳ ନାଁକୁ ମାତ୍ର । 

ସାଧାରଣତଃ ପରୀକ୍ଷା ପ୍ରସ୍ତୁତି ପାଇଁ  ଶିକ୍ଷାର୍ଥୀମାନେ ବିଶେଷ ଭାବେ ଚାପରେ ରହିଥାନ୍ତି । ଏହାକୁ ଦୂର କରିବାକୁ  ଟେଲିମାନସ୍‌ କାଉନ୍‌ସେଲିଂ ବ୍ୟବସ୍ଥା କରାଗଲା । ଏଥିପାଇଁ ପାଇଁ ଏକ ଟୋଲ୍‌  ଫ୍ରି ନମ୍ବର ଜାରି ହେଲା । ପରୀକ୍ଷାର୍ଥୀମାନେ ୧୪୪୧୬ ନମ୍ବରରେ ଫୋନ୍‌ କରି ସମସ୍ୟା ଜଣାଇବାକୁ ପରାମର୍ଶ ଦିଆଗଲା । ଟେଲି  ମାନସ କାଉନସେଲିଂ ବାବଦରେ କିପରି ସ୍କୁଲ୍‌ ସ୍ତରରେ ପିଲାଙ୍କ ପାଖରେ ପହଞ୍ଚିବ  ସେନେଇ ବିଭାଗ ପକ୍ଷରୁ ସମସ୍ତ ସମସ୍ତ  ଜିଲ୍ଲା ଶିକ୍ଷା ଅଧିକାରୀଙ୍କୁ ସୂଚନା ପ୍ରସାରିତ ପାଇଁ ନିର୍ଦ୍ଦେଶ ଦିଆଯାଇଥିଲା । ତେବେ ଏ ବ୍ୟବସ୍ଥା ସଂପର୍କରେ ଖବର ପିଲାଙ୍କ ପାଖରେ ପହଞ୍ଚିଛି କି ନାହିଁ ତାହା  ପ୍ରଶ୍ନ ଉଠୁଛି । ଗଣଶିକ୍ଷା ବିଭାଗ କେବଳ  ଯୋଜନା କରୁଛି, ଏହାକୁ କାର୍ଯ୍ୟକାରୀ କରୁନାହିଁ ବୋଲି ଅଭିଯୋଗ ହେଉଛି । 

ସୂଚନାଯୋଗ୍ୟ, ଗତକାଲି  ବ୍ରହ୍ମପୁରର ଏକ ଯୁକ୍ତ ୨  ପରୀକ୍ଷାର୍ଥୀ ପରୀକ୍ଷାରେ କପି କରି ଧରାପଡ଼ିବାରୁ ଆତ୍ମହତ୍ୟା କରିଥିବାର ଅଭିଯୋଗ ଆସିଥିଲା । ଭଦ୍ରକ ଜିଲ୍ଲା ଧାମନଗରର ଜଣେ ପରୀକ୍ଷାର୍ଥୀ ଇଂରାଜୀ ପରୀକ୍ଷା ଦେବା ପୂର୍ବରୁ ଚାପଗ୍ରସ୍ତ ହୋଇ  ଆତ୍ମହତ୍ୟା କରିଛନ୍ତି । ସେହିପରି  ମୟୂରଭଞ୍ଜ ଜିଲ୍ଲାରେ ଜଣେ ମାଟ୍ରିକ୍‌ ପରୀକ୍ଷାର୍ଥୀ ଆତ୍ମହତ୍ୟା କରିଥିବା ନେଇ ଅଭିଯୋଗ ସାମ୍ନାକୁ ଆସିଥିଲା । ଗୋଟିଏ ସପ୍ତାହ ମଧ୍ୟରେ ୩ଜଣ ପରୀକ୍ଷାର୍ଥୀ  ଆତ୍ମହତ୍ୟା କଲେଣି । ବିଭାଗ ପକ୍ଷରୁ  ହୋଇଥିବା ଟେଲି ମାନସ ସେବା କେତେ  ଦୂର ପିଲାଙ୍କୁ ଚାପମୁକ୍ତ ପାଇଁ ସହଯୋଗୀ  ହେଉଛି ତାହା ଏଥିରୁ ସ୍ପଷ୍ଟ ଜଣାପଡ଼ୁଛି।