ରାଜଗାଙ୍ଗପୁର, ୩/୧୧ ; ରାଗିଗଲେ ବୃଷଭ। ଯୁବକଙ୍କୁ ଶିଙ୍ଘରେ ଟେକି ଦେଲେ କଚାଡ଼ି। ଉଡ଼ିଗଲା ପ୍ରାଣବାୟୁ। ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ଥାନା କୁଣ୍ଡୁପଡା ଅଞ୍ଚଳରେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି। 

ସୂଚନାନୁଯାୟୀ, ଶୁକ୍ରବାର ସକାଳ ପ୍ରାୟ ସାଢ଼େ ୭ଟାରେ କୁଣ୍ଡୁପଡ଼ାରେ ରହୁଥିବା ରାକେଶ ନାଗ (୩୯ ବର୍ଷ ) ଘର ଆଗରେ ଏକ ମଣ୍ଡପ ଠାରେ ଠିଆ ହୋଇଥିଲେ। ଏହି ସମୟରେ ଏକ ବୁଲା ଷଣ୍ଢ ତାଙ୍କୁ ଆକ୍ରମଣ କରିଥିଲା। ରାକେଶ କିଛି ବୁଝିବା ପୂର୍ବରୁ ତାଙ୍କୁ ଶିଙ୍ଘ ସାହାଯ୍ୟରେ ଟେକି କଚାଡ଼ି ଦେଇଥିଲା। ଆହତ ରାକେଶଙ୍କୁ ତୁରନ୍ତ ଗୁରୁତର ଅବସ୍ଥାରେ ସ୍ଥାନୀୟ ସିଏଚସିକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ରାଜଗାଙ୍ଗପୁର ପୌର ପାଳିକାର ବିଭିନ୍ନ ଅଞ୍ଚଳରେ ବୁଲା ଗାଈ ଓ ଷଣ୍ଢଙ୍କ ଦୌରାତ୍ମ୍ୟ ବଢି ଚାଲିଥିବା ବେଳେ ଆଜିର ଘଟଣାରେ ଲୋକେ ଆତଙ୍କିତ ଅବସ୍ଥାରେ ରହିଥିବା ଜଣାପଡିଛି।