ଭୁବନେଶ୍ଵର, ୨୧/୦୮ : ନାମାଙ୍କନ ଭରିଲେ ବିଜେପି ରାଜ୍ୟସଭା ପ୍ରାର୍ଥୀ ମମତା ମହାନ୍ତ। ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ସଭାପତି ମନମୋହନ ସାମଲଙ୍କ ଉପସ୍ଥିତିରେ ବିଧାନସଭା ସଚିବଙ୍କ ନିକଟରେ ସେ ନାମାଙ୍କନ ଦାଖଲ କରିଛନ୍ତି। କୁଡ଼ୁମୀ ସମାଜର ବରିଷ୍ଠ ନେତ୍ରୀ ହେଉଛନ୍ତି ମମତା ମହାନ୍ତ। 

ବିଜେଡି ଛାଡ଼ି ଆସିଥିବା ପୂର୍ବତନ ସାଂସଦ ମମତାଙ୍କୁ ଗତକାଲି ଓଡ଼ିଶାରୁ ରାଜ୍ୟସଭା ପ୍ରାର୍ଥୀ ଘୋଷଣା କରିଥିଲା ବିଜେପି। ବିଧାନସଭାରେ ସଂଖ୍ୟା ଦୃଷ୍ଟିରୁ ଏକାକୀ ବିଜେପି ବଳରେ ହିଁ ମମତା ରାଜ୍ୟସଭା ଯିବା ଏକପ୍ରକାର ପକ୍କା । ବିରୋଧୀ ଦଳ କୌଣସି ପ୍ରାର୍ଥୀ ନ ଦେଲେ ମମତା ନିନ୍ଦ୍ୱନ୍ଦ୍ୱର୍ରେ ନିର୍ବାଚିତ ହେବେ । ଗତ ଜୁଲାଇ ୩୧ରେ ରାଜ୍ୟସଭା ସାଂସଦ ପଦ ସହ ବିଜେଡିରୁ ଇସ୍ତଫା ଦେଇଥିଲେ ମମତା । ବିଜେଡି ଛାଡ଼ିବା ପରେ ତତ୍କାଳ ସେ ବିଜେପିରେ ମିଶିଥିଲେ । ମମତାଙ୍କ ଇସ୍ତଫା ଗ୍ରହଣ ହେବା ସହ ଓଡ଼ିଶାରେ ଗୋଟିଏ ରାଜ୍ୟସଭା ଆସନ ଖାଲି ହୋଇଥିଲା । ଖାଲି ପଡ଼ିଥିବା ଓଡ଼ିଶାର ଏହି ପଦବି ସମେତ ୯ ରାଜ୍ୟର ୧୨ ଆସନରେ ଉପନିର୍ବାଚନ ହେବାକୁ ଯାଉଛି। 

ରାଜନୈତିକ ସମୀକ୍ଷକଙ୍କ କହିବାନୁସାରେ, ମମତାଙ୍କୁ ରାଜ୍ୟସଭା ପଠାଇ ବିଜେପି ମହିଳା କାର୍ଡ ଖେଳିବା ସହ ବିଜେଡିର ଅନ୍ୟ ସାଂସଦମାନଙ୍କ ପାଇଁ ବି ଦ୍ୱାର ଖୋଲି ଦେଇଛି। ମମତାଙ୍କ ଭଳି ବିଜେଡିର ଯେଉଁ ସାଂସଦ ଦଳ ଓ ପଦ ଛାଡ଼ି ବିଜେପିକୁ ଆସିବେ, ସେମାନଙ୍କୁ ପୁଣି ଥରେ ବିଜେପି ରାଜ୍ୟସଭା ପଠାଇପାରେ । ଏହାସହ ମମତାଙ୍କୁ ରାଜ୍ୟସଭା ପଠାଇ କୁଡୁମୀ ସମ୍ପ୍ରଦାୟକୁ ଖୁସି କରାଇବାକୁ ବିଜେପି ଚେଷ୍ଟା କରିଛି । 

ଖାଲି ପଡ଼ିଥିବା ଓଡ଼ିଶାର ଏହି ରାଜ୍ୟସଭା ଆସନ ପାଇଁ ବର୍ତ୍ତମାନ ଉପନିର୍ବାଚନ ହେବ । ଏ ନେଇ ଗତ ବୁଧବାର ବିଜ୍ଞପ୍ତି ପ୍ରକାଶ ପାଇଥିଲା । ଅଗଷ୍ଟ ୨୧ ତାରିଖ ନାମାଙ୍କନ ଦାଖଲର ଶେଷ ଦିନ । ୨୨ରେ ନାମାଙ୍କନ ପତ୍ର ଯାଞ୍ଚ ସହ ଚୂଡ଼ାନ୍ତ ପ୍ରାର୍ଥୀ ତାଲିକା ଘୋଷଣା କରାଯିବ । ୨୭ ତାରିଖ ସୁଦ୍ଧା ପ୍ରାର୍ଥୀମାନେ ନାମାଙ୍କନ ପ୍ରତ୍ୟାହାର କରିପାରିବେ । ଏକାଧିକ ପ୍ରାର୍ଥୀ ରହିଲେ ଆସନ୍ତା ସେପ୍ଟେମ୍ବର ୩ରେ ଭୋଟ ହେବ । ସେହିଦିନ ସନ୍ଧ୍ୟା ୫ଟାରେ ଭୋଟ ଗଣତି ସହ ନିର୍ବାଚନ ଫଳାଫଳ ଘୋଷଣା କରାଯିବ ।