ନୂଆଦିଲ୍ଲୀ,୧୭।୯: ଭାରତରେ ଖୁବ୍ ଶୀଘ୍ର ହେବାକୁ ଯାଉଛି ଜନଗଣନା। ମଙ୍ଗଳବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଦେଇଛନ୍ତି ସଙ୍କେତ। ତେବେ ସେ ତାରିଖ ସମ୍ପର୍କରେ କିଛି ସ୍ପଷ୍ଟ ସୂଚନା ଦେଇ ନାହାନ୍ତି। ଏହା ସହ ସେ ଜାତିଗତ ଜନଗଣନା ପ୍ରସଙ୍ଗ ଉପରେ ମଧ୍ୟ ଚର୍ଚ୍ଚା କରିଛନ୍ତି। ନିକଟରେ  ଖବର ଆସିଥିଲା ଯେ, ଦେଶ ଜନଗଣନା ପାଇଁ ପ୍ରସ୍ତୁତି କରୁଛି। ୨୦୧୧ ପରେ ଦେଶରେ ଜନଗଣନା ହୋଇ ନାହିଁ।

ଜାତିଗତ ଜନଗଣନାକୁ ନେଇ ପଚରା ଯାଇଥିବା ପ୍ରଶ୍ନରେ ଶାହ କହିଛନ୍ତି, ଯେତେବେଳେ ବି ଆମେ ଜନଗଣନାର ଘୋଷଣା କରିବୁ, ସେତେବେଳେ ସବୁ ସୂଚନା ସାର୍ବଜନୀନ କରାଯିବ। ଏହା ପୂର୍ବରୁ ୨୦୨୧ ରେ ଜନଗଣନା ହେବାର ଥିଲା, କିନ୍ତୁ କରୋନା ମହାମାରୀ କାରଣରୁ ପକ୍ରିୟା ଆରମ୍ଭ ହୋଇପାରିନଥିଲା। ଜନଗଣନାର ପ୍ରଥମ ପର୍ଯ୍ୟାୟ ୧ ଏପ୍ରିଲ ୨୦୨୦ ରେ ଆରମ୍ଭ ହେବାର ଥିଲା, କିନ୍ତୁ ଏହାକୁ ଘୁଞ୍ଚାଇବାକୁ ପଡିଥିଲା। 

ରିପୋର୍ଟ ଅନୁସାରେ, କେନ୍ଦ୍ର ସରକାର ରବିବାର କହିଥିଲେ ଜନଗଣନାର ପ୍ରସ୍ତୁତି ଆରମ୍ଭ ହୋଇଯାଇଛି ଓ ଖୁବ୍ ଶୀଘ୍ର ଏହାକୁ ‌ଆରମ୍ଭ କରାଯିବ। ଟାଇମ୍ସ ଅଫ୍ ଇଣ୍ଡିଆ ସହ ଆଲୋଚନା କରି ସରକାରଙ୍କ ଜଣେ ଶୀର୍ଷ ପଦାଧିକାରୀ କହିଥିଲେ, ଜନଗଣନା କରିବାର କାମ ପୂର୍ବରୁ ଜାରି ରହିଛି। ଏ ସମ୍ପର୍କରେ ଖୁବ୍ ଶୀଘ୍ର ନିଷ୍ପତ୍ତି ନିଆଯାଇ ପାରେ।’ ସବୁଠାରୁ ଖାସ୍ କଥା ଯେ, ଗତ ବର୍ଷ ଲାଗୁ ହୋଉଥିବା ମହିଳା କୋଟା ମଧ୍ୟ ଜନଗଣନା ସହ ଯୋଡା ହୋଇ ରହିଛି।