ଭୁବନେଶ୍ୱର, ୧୭।୩: ଆସନ୍ତା ସାଧାରଣ ନିର୍ବାଚନକୁ ଦୃଷ୍ଟିରେ ରଖି କେନ୍ଦ୍ରୀୟ ନିର୍ବାଚନ ଆୟୋଗ ଆଦର୍ଶ ଆଚରଣ ବିଧି ଲାଗୁ କରିଛନ୍ତି । ଏହା ଲାଗୁ ହେବା ପରେ ନିୟମ ଅନୁସାରେ ଓଡ଼ିଶା ସରକାରଙ୍କ ବିଭିନ୍ନ ବିଭାଗୀୟ ୱେବ୍‌ସାଇଟ୍‌ ସହ ଯେତେ ସରକାରୀ ୱେବ୍‌ସାଇଟ୍‌ ରହିଛି ସବୁଠି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫଟୋ ହଟାଇ ଦିଆଯାଇଛି । ସେହି ସ୍ଥାନରେ ଓଡ଼ିଶା ଶାସନ ଲେଖାଥିବା ସରକାରଙ୍କ ପ୍ରତୀକକୁ ସ୍ଥାନିତ କରାଯାଇଛି ।

ସେହିପରି ସରକାରୀ ସୋସିଆଲ୍‌ ମିଡିଆ ସାଇଟରୁ ମଧ୍ୟ ମୁଖ୍ୟମନ୍ତ୍ରୀଙ୍କ ଫଟୋ ହଟାଇ ଦିଆଯାଇଛି । ବିଶେଷକରି ‘ଏକ୍ସ’, ଇନ୍‌ଷ୍ଟାଗ୍ରାମ୍‌, ଫେସ୍‌ବୁକ୍‌ରେ ଯେଉଁ ଯେଉଁ ଆକାଉଣ୍ଟରେ ମୁଖ୍ୟମନ୍ତ୍ରୀଙ୍କ ଫଟୋ ଥିଲା ସେଠି ଏହି ପ୍ରତୀକକୁ ସ୍ଥାନିତ କରାଯାଇଛି । ଶନିବାର କେନ୍ଦ୍ରୀୟ ନିର୍ବାଚନ ଆୟୋଗ ନିର୍ବାଚନୀ ତାରିଖ ଘୋଷଣା କରିବା ପୂର୍ବରୁ ସବୁ ସାଇଟ୍‌ରୁ ମୁଖ୍ୟମନ୍ତ୍ରୀଙ୍କ ଫଟୋ ହଟାଇ ଦିଆଯାଇଥିଲା ।