ଭୁବନେଶ୍ୱର,୧୫/୦୪: କେବଳ ରାଷ୍ଟ୍ରୀୟ ଶୈକ୍ଷିକ ଅନୁସନ୍ଧାନ ଓ ପ୍ରଶିକ୍ଷଣ ପରିଷଦ (ଏନ୍ସିଇଆର୍ଟି) ଓ ରାଜ୍ୟ ଶିକ୍ଷା ଗବେଷଣା ଏବଂ ତାଲିମ ପ୍ରତିଷ୍ଠାନ (ଏସ୍ସିଇଆର୍ଟି) ଦ୍ୱାରା ପ୍ରକାଶିତ ପୁସ୍ତକଗୁଡିକୁ ଘରୋଇ ସ୍କୁଲ୍ ପିଲା କିଣିବେ । ଏହାବାଦ୍ ଅନ୍ୟ କୌଣସି ପ୍ରକାଶକଙ୍କ ପୁସ୍ତକ କିଣିବା ପାଇଁ ପିଲାମାନଙ୍କୁ ସ୍କୁଲ ବାଧ୍ୟ କରିପାରିବେ ନାହିଁ । ସେହିପରି ଘରୋଇ ସ୍କୁଲ୍ଗୁଡିକ ମଧ୍ୟ ସେମାନଙ୍କ ସ୍କୁଲ୍ ଫି କମାଇବେ ବୋଲି ଜାତୀୟ ଶିଶୁ ଅଧିକାର ସୁରକ୍ଷା ଆୟୋଗ (ଏନ୍ସିପିସିଆର୍) ନିର୍ଦ୍ଦେଶ ଦେଇଛନ୍ତି ।
ଏନ୍ସିପିସିଆର୍ ପକ୍ଷରୁ ସମସ୍ତ ରାଜ୍ୟର ଗଣଶିକ୍ଷା ବିଭାଗ ପ୍ରମୁଖ ସଚିବଙ୍କୁ କରାଯାଇଥିବା ଚିଠିରେ ଉଲ୍ଲେଖ ରହିଛି ଯେ, ଘରୋଇ ସ୍କୁଲ୍ ପିଲାଙ୍କୁ ଅନ୍ୟ ପ୍ରକାଶକଙ୍କ ବହି କିଣିବାକୁ ବାଧ୍ୟ କରିବା ଏକ ଅପରାଧ । ଗୁଣାତ୍ମକ ଶିକ୍ଷା ହେଉଛି ପିଲାଙ୍କର ଅଧିକାର । ଆର୍ଟିଇ ଆକ୍ଟ ୨୦୦୯ ଧାରା ୨୯ ଅନୁଯାୟୀ, ସମସ୍ତଙ୍କୁ ସମାନ ଗୁଣାତ୍ମକ ଶିକ୍ଷା ଦିଆଯିବ । ଏହାଦ୍ୱାରା ସ୍କୁଲ୍ରେ ପିଲାଙ୍କ ମଧ୍ୟରେ ସମାନତା ରହିବ । ସେହିପରି ଏନ୍ସିଇଆର୍ଟି ଏବଂ ଏସ୍ସିଇଆର୍ଟି ପାଠ୍ୟପୁସ୍ତକ ଦର ହ୍ରାସ କରିବେ । ପିଲାଙ୍କ ବ୍ୟାଗ୍ ଯେପରି ହାଲୁକା ହେବ ସେଥିଲାଗି ମଧ୍ୟ ପଦକ୍ଷେପ ନେବାକୁ କୁହାଯାଇଛି ।
ଏହି ଚିଠିକୁ ସମସ୍ତ ରାଜ୍ୟର ଗଣଶିକ୍ଷା ବିଭାଗ ଓ ଘରୋଇ ସ୍କୁଲଗୁଡିକ ନିଜ ୱେବ୍ସାଇଟ୍ରେ ଅପ୍ଲୋଡ୍ କରିବେ । ଏଥିସହ ସମସ୍ତ ଅଭିଭାବକଙ୍କୁ ମଧ୍ୟ ଏହି ଚିଠି ପ୍ରଦାନ କରାଯିବ । ଏନ୍ସିପିସିଆର୍ର ଅଧ୍ୟକ୍ଷା ପ୍ରିୟଙ୍କା କାନୁନ୍ଗୋ ଗଣମାଧ୍ୟମକୁ କହିଛନ୍ତି, ସାରାଦେଶର ବିଭିନ୍ନ ଘରୋଇ ସ୍କୁଲ୍ ପକ୍ଷରୁ ଅଭିଯୋଗ ଆସିବା ପରେ ଏପରି ପଦକ୍ଷେପ ନିଆଯାଇଛି । କୌଣସି ଘରୋଇ ସ୍କୁଲ୍ କର୍ତ୍ତୃପକ୍ଷ ଏନ୍ସିଇଆର୍ଟି କିମ୍ବା ଏସ୍ସିଇଆର୍ଟି ପାଠ୍ୟପୁସ୍ତକ ବ୍ୟତୀତ ଅନ୍ୟ ପୁସ୍ତକ କିଣିବାକୁ ବାଧ୍ୟ କଲେ ସେହି ସ୍କୁଲ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ।
