ନୂଆଦିଲ୍ଲୀ,୧୮।୯: ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନ୍ ଋଷ ଗସ୍ତରୁ ନିଜ ଦେଶକୁ ଫେରିଛନ୍ତି।  କିମ୍ ଜୋଙ୍ଗ ଫେରିବାର ଦିନକ ପରେ ଚୀନ୍‌ର ବୈଦେଶିକ ମନ୍ତ୍ରୀ ଓ୍ବାଙ୍ଗ ୟି ଚାରିଦିନର ଯାତ୍ରାରେ ସୋମବାର ଋଷ ପହଞ୍ଚିଛନ୍ତି। ଏହି ସମୟରେ ଚୀନ୍‌ର ବୈଦେଶିକ ମନ୍ତ୍ରୀ ଓ ଋଷର ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭଙ୍କ ଭିତରେ ୟୁକ୍ରେନ୍ ଯୁଦ୍ଧ ଉପରେ ଚର୍ଚ୍ଚା ହେବାର ଆଶଙ୍କା ରହିଛି। ଆଶା ରହିଛି ଯେ, ଦୁଇ ଦେଶର ନେତା ପାରସ୍ପାରିକ୍ ରାଜନୈତିକ ବିଶ୍ବାସକୁ ଗଭୀର କରିବା ଦିଗରେ ଦ୍ବିପାକ୍ଷିକ ଆଲୋଚନା କରିବେ। ଚୀନ୍‌ର ବୈଦେଶିକ ମନ୍ତ୍ରଣାଳୟର ଏକ ବୟାନ ଅନୁସାରେ, ଓ୍ବାଙ୍ଗ ୧୮ ରୁ ୨୧ ସେପ୍ଟେମ୍ବର ପର୍ଯ୍ୟନ୍ତ ଋଷ ଗସ୍ତ କରିବେ।

ଗତ ସପ୍ତାହ ଋଷ ବୈଦେଶିକ ମନ୍ତ୍ରଣାଳୟର ଏକ ବୟନ ଅନୁସାରେ, ଦ୍ବିପାକ୍ଷିକ ସହଯୋଗର ବ୍ୟାପକ ପ୍ରସଙ୍ଗ ଉପରେ ଚର୍ଚ୍ଚା ପାଇଁ ଚୀନ୍ ବୈଦେଶିକ ମନ୍ତ୍ରୀ ଋଷ ବୈଦେଶିକ ମନ୍ତ୍ରୀ ଲାଭରୋଭଙ୍କୁ ଭେଟିବାର ଆଶା ରହିଛି। କୁହାଯାଇଛି ଯେ, ଦୁଇ ନେତା ୟୁକ୍ରେନ୍ ଯୁଦ୍ଧ ଓ ଏ ସମ୍ପର୍କିତ ଚୁକ୍ତି ପ୍ରସଙ୍ଗରେ ଆଲୋଚନା କରିବେ। ଚୀନ୍ ବୈଦେଶିକ ମନ୍ତ୍ରୀ ଚାରି ଦିବସୀୟ ଗସ୍ତରେ ଋଷ ରାଷ୍ଟ୍ରପତି ବ୍ଲାଦିମିର ପୁଟିନ୍‌ଙ୍କୁ ସମ୍ଭାବିତ ବେଜିଂ ଗସ୍ତ ପୂର୍ବରୁ ହେଉଛି। ଅନ୍ୟପକ୍ଷେ ଉତ୍ତର କୋରିଆର ତାନାଶାହା ଓ ପୁଟିନ୍‌ଙ୍କ ବୈଠକର ତୁରନ୍ତ ପରେ ହେଉଛି। ଏହାଦ୍ବାରା ପାଶ୍ଚାତ୍ୟ ଦେଶ ଗୁଡିକ ଭୟଭୀତ ହୋଇଛନ୍ତି।

ଆମେରିକା ପୂର୍ବରୁ ଚେତାବନୀ ଜାରି କରିଥିଲା, ପୁଟିନ୍ ଓ କିମ୍ ଜୋଙ୍ଗଙ୍କ ସାକ୍ଷାତ ପରେ ପ୍ୟୋଙ୍ଗୟାଙ୍କ ୟୁକ୍ରେନ୍ ଯୁଦ୍ଧ ପାଇଁ ମସ୍କୋକୁ ଯୁଦ୍ଧ ସାମଗ୍ରୀ ଯୋଗଇପାରେ। ଋଷରେ କିମ୍ ଜୋଙ୍ଗଙ୍କୁ ଯେଉଁଠି ରେଡ୍‌ କାର୍ପେଟ ବିଛାଇ ସ୍ବାଗତ କରାଯାଇଥିଲା, ସେଭଳି ଭବ୍ୟ ବିଦାୟ ମଧ୍ୟ ଦିଆଯାଇଥିଲ। ବିଦା ହେବା ପୂର୍ବରୁ କିମ୍ ଋଷର ବହୁ ସାମରିକ ଆଡ୍ଡାକୁ ମଧ୍ୟ ଯାଇଥିଲେ। ଏହା ଦ୍ବାରା ପାଶ୍ଚାତ୍ୟ ଦେଶର ଚିନ୍ତା ବଢି ଯାଇଛି। ଏବେ ଚୀନ୍‌ ବୈଦେଶିକ ମନ୍ତ୍ରୀଙ୍କ ଋଷ ଗସ୍ତ ଫଳରେ ପାଶ୍ଚାତ୍ୟ ଦେଶର ଆଶଙ୍କାକୁ ବଢିଛି ଯେ, ୩ ପୁରୁଣା ମିତ୍ର ୟୁକ୍ରେନ୍ ଯୁଦ୍ଧ ଆଢୁଆଳରେ କୌଣସି ଗୁପ୍ତ ଚାଲ୍‌ ଓ ଅସ୍ତ୍ର ପାଇଁ କୌଣଓି ଚୁକ୍ତି କରୁ ନାହାନ୍ତି ତ ? ଯଦି ଏଭଳି ହୁଏ ତେବେ ପୁଣିଥରେ ଦୁନିଆର ବଡ଼ ଶକ୍ତିଙ୍କ ଭିତରେ ବିବାଦ ସୃଷ୍ଟି ହୋଇପାରେ।