କଟକ, ୨୯/୦୫ : ନିର୍ବାଚନ ବେଳେ ସୋସିଆଲ୍ ମିଡିଆରେ ମିଛ, ବିଭ୍ରାନ୍ତିକର ଓ ଆପତ୍ତିଜନକ ପୋଷ୍ଟ ଉପରେ ନଜର ରଖିବା ରଖିବା ପାଇଁ ରାଜ୍ୟ ପୁଲିସର ସୋସିଆଲ୍ ମିଡିଆ ମନିଟରିଂ ସେଲ୍ ତରଫରୁ ‘ସାଇବର ପାଟ୍ରୋଲିଂ’ କରାଯାଇ ଏଯାବତ ୪୨୦ଟି ଆପତ୍ତିଜନ ପୋଷ୍ଟ ହଟାଯାଇଛି । ଫେସ୍ବୁକ୍, ଇନ୍ଷ୍ଟାଗ୍ରାମ୍, ଏକ୍ସ (ଟୁଇଟର) ଓ ୟୁଟ୍ୟୁବ୍ ଭଳି ସୋସିଆଲ୍ ମିଡିଆ ପ୍ଲାଟ୍ଫର୍ମରୁ ଏହି ପୋଷ୍ଟଗୁଡ଼ିକ ଡିଲେଟ୍ କରାଯାଇଛି । ଏସବୁ ପ୍ଲାଟ୍ଫର୍ମରେ ପୋଷ୍ଟ ହୋଇଥିବା ପ୍ରାୟ ୧୩୫୫ଟି ପୋଷ୍ଟ ନେଇ ଆପତ୍ତି ରହିଥିଲା । ଯେଉଁଥିରୁ ୪୨୦ ପୋଷ୍ଟ ହଟାଯାଇଛି । ସବୁଠାରୁ ଅଧିକ ଫେସ୍ବୁକ୍ରେ ୭୮୮ଟି ପୋଷ୍ଟ ନେଇ ଆପତ୍ତି ଉଠିଥିଲା । ଯାହାକୁ ହଟାଇବା ପାଇଁ ଫେସ୍ବୁକ୍ କର୍ତ୍ତୃପକ୍ଷଙ୍କ ପାଖକୁ ରାଜ୍ୟ କ୍ରାଇମବ୍ରାଞ୍ଚ ପକ୍ଷରୁ ତଥ୍ୟ ପଠାଯାଇଥିଲା । ତନ୍ମଧ୍ୟରୁ ୨୫୬ଟି ପୋଷ୍ଟ କିମ୍ବା ପୁରା ଆକାଉଣ୍ଟକୁ ଫେସ୍ବୁକ୍ରୁ ହଟାଇ ଦିଆଯାଇଛି ।
ସେହିପରି ଇନ୍ଷ୍ଟାଗ୍ରାମ୍ରେ ୪୭୧ଟି ଆପତ୍ତିଜନକ ପୋଷ୍ଟକୁ ଡିଲେଟ୍ କରିବା ପାଇଁ ପୁଲିସ ପକ୍ଷରୁ କର୍ତ୍ତୃପକ୍ଷଙ୍କୁ ଅନୁରୋଧ କରାଯାଇଥିଲା । ତନ୍ମଧ୍ୟରୁ ଇନ୍ଷ୍ଟାଗ୍ରାମ୍ ସଂସ୍ଥା ୧୫୪ଟି ପୋଷ୍ଟକୁ ସଂପୂର୍ଣ୍ଣ ସୋସିଆଲ୍ ମିଡିଆରୁ ହଟାଇଛି । ଏହି କ୍ରମରେ ୟୁଟ୍ୟୁବ୍ରେ ମୋଟ୍ ୯୬ଟି ଆପତ୍ତିଜନ ଭିଡିଓ ରହିଥିବା ଓ ତାହାକୁ ଡିଲେଟ୍ କରିବାକୁ କ୍ରାଇମବ୍ରାଞ୍ଚ୍ ଗୁଗଲ୍ ପାଖକୁ ଅନୁରୋଧ ପଠାଇଥିଲା । ଏସବୁ ଭିଡିଓକୁ ଯାଞ୍ଚ୍ କରିବା ପରେ ୯ଟି ଭିଡିଓକୁ ୟୁଟ୍ୟୁବ୍ରୁ ହଟାଯାଇଛି । ଏଥିସହିତ ରାଜ୍ୟର ସମସ୍ତ ଜିଲ୍ଲା ପୁଲିସ ସହ ରାଜ୍ୟ କ୍ରାଇମବ୍ରାଞ୍ଚ୍ରେ ଗଠିତ ‘ସୋସିଆଲ୍ ମିଡିଆ ସେଲ୍’ ମୋଟ୍ ୯୫୦ଟି ବିଭିନ୍ନ ସୋସିଆଲ୍ ମିଡିଆ ଆକାଉଣ୍ଟ ଉପରେ ନଜର ରଖିଛି ।
ଏସବୁ ଆକାଉଣ୍ଟରେ ବହୁ ସମୟରେ ଆପତ୍ତିଜନକ ପୋଷ୍ଟ ହେଉଥିବାରୁ ତାହା ଉପରେ କଡ଼ା ପାଟ୍ରୋଲିଂ କରାଯାଉଛି । ଏହି ପାଟ୍ରୋଲିଂରେ ବହୁ ଆଇଟି ପ୍ରଫେସନାଲ୍ ମଧ୍ୟ ପୁଲିସକୁ ସହଯୋଗ କରୁଛନ୍ତି । ଏହା ମଧ୍ୟରେ ଆପତ୍ତିଜନକ ପୋଷ୍ଟ କରିବା ଓ ସୋସିଆଲ୍ ମିଡିଆରେ କାହାକୁ ସିଧାସଳଖ ସମ୍ମାନହାନୀ କରିବା ଘଟଣାରେ ବିଭିନ୍ନ ଜିଲ୍ଲା ପୁଲିସ ୫ଟି ମାମଲା ରୁଜୁ କରିସାରିଛି । ଅନ୍ୟପଟେ ସୋସିଆଲ୍ ମିଡିଆକୁ କୌଣସି ପ୍ରକାର ଅସ୍ତ୍ର ଭାବେ ବ୍ୟବହାର ନକରିବାକୁ ରାଜ୍ୟ ପୁଲିସର କ୍ରାଇମବ୍ରାଞ୍ଚ୍ ସାଧାରଣ ନାଗରିକଙ୍କୁ ଅନୁରୋଧ କରିଛି । ଯଦି କେହି ସୋସିଆଲ୍ ମିଡିଆକୁ ମନ୍ଦ ଉଦ୍ଦେଶ୍ୟରେ ବ୍ୟବହାର କରେ ତାହାଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କ୍ରାଇମବ୍ରାଞ୍ଚ୍ ଚେତାଇ ଦେଇଛି ।
