ନୂଆଦିଲ୍ଲୀ, ୯।୦୨: ମଣିଷ ନିଜର ଆବଶ୍ୟକତା ପୂରଣ କରିବାକୁ ଚାକିରି କରେ । ତେଣୁ ଆଜି ଯାଏ କେବଳ ମଣିଷମାନେ ହିଁ ଚାକିରି କରୁଥିବାର ଦେଖାଯାଏ । ସେହିଭଳି ଟେକ୍ନୋଲୋଜିର ବ୍ୟବହାର ଫଳରେ ବର୍ତ୍ତମାନ କିଛି ସ୍ଥାନରେ ରୋବର୍ଟ ମଧ୍ୟ କାମ କରୁଥିବାର ଦେଖାଯାଉଛି । କିନ୍ତୁ, କୌଣସି ପଶୁ ଚାକିରି କରୁଥିବାର ବୋଧହୁଏ କେବେ ଶୁଣିନଥିବେ । ଜାଣି ଆଶ୍ଚର୍ଯ୍ୟ ହେବେ ଏକ ଏଭଳି କମ୍ପାନୀ ଯିଏ କୁକୁରକୁ ଚାକିରିରେ ନିୟୋଜିତ କରିଛି, ସେ ପୁଣି ଦରମା ସହିତ । ତେବେ କେଉଁ କମ୍ପାନୀ ଏହି କୁକୁରକୁ ଚାକିରି ଦେଇଛି ? କେଉଁ କାମ ପାଇଁ ସେ ନିଯୁକ୍ତ ହୋଇଛି ? କମ୍ପାନୀରେ କୁକୁରକୁ ଦରମା କେତେ ? ସେ ବିଷୟରେ ଆସନ୍ତୁ ଜାଣିବା ।
ଚୀନ୍ରେ ରହିଛି ଏହି କମ୍ପାନୀ । କମ୍ପାନୀରେ କୁକୁରକୁ ସୁରକ୍ଷା କ୍ୟାପଟେନ୍ ଭାବରେ ନିଯୁକ୍ତ କରାଯାଇଛି । ଏହାର ପ୍ରତିବଦଳରେ କୁକୁରର ମାସକୁ ଦରମା ୩ ହଜାର ୟୁଆନ୍ ଅର୍ଥାତ୍, ୩୫ ହଜାର ଟଙ୍କା । କେବଳ ଏତିକି ନୁହେଁ, କାମରେ ଅବହେଳା ହେଲେ କୁକୁରର ଦରମା ମଧ୍ୟ କାଟିଦିଆଯାଏ । ଏହି କୁକୁରର ନାଁ ହେଲା ‘ବିଗ୍ ବିୟୁଟି’ । ଚୀନ୍ର ଗୁଆଙ୍ଗଡୋଙ୍ଗ ପ୍ରାନ୍ତର ପୋଷା ପଶୁଙ୍କ ଲାଗି ଦ୍ରବ୍ୟ ଉତ୍ପାଦନ କରୁଥିବା ଏକ କମ୍ପାନୀ ବିୟୁଟିକୁ ଚାକିରିରେ ନିୟୋଜିତ କରିଛି । ବର୍ତ୍ତମାନ ବେକାରୀଙ୍କ ସଂଖ୍ୟା କ୍ରମଶଃ ବୃଦ୍ଧି ପାଉଥିବା ବେଳେ ଏହି କୁକୁରକୁ ଚାକିରିରେ ରଖି ଦରମା ଦିଆଯାଉଛି । ଏହି କୁକୁର ସାଧାରଣ ଚାକିରିଆଠୁ ଅଧିକ ବେତନ ପାଉଛି ।
ଭଲ ଦରମା ମିଳିବା ସହ ଏହି କମ୍ପାନୀରେ ତାକୁ ଭଲ ଖାଦ୍ୟ ମଧ୍ୟ ଦିଆଯାଏ । ବିୟୁଟି ସହ ଅନ୍ୟ କେତେକ କୁକୁର ମଧ୍ୟ ଏହି କମ୍ପାନୀରେ ଚାକିରି କରିଛନ୍ତି । ହେଲେ ସେମାନଙ୍କୁ କୌଣସି ପ୍ରକାର ବେତନ ମିଳୁନାହିଁ । ସେମାନେ ସମସ୍ତେ ବିୟୁଟି ଅଣ୍ଡରରେ କାମ କରନ୍ତି । ବିୟୁଟି ଏହି କମ୍ପାନୀରେ ୭ ବର୍ଷ ହେଲା କାମ କରିଆସୁଛି । ପ୍ରକୃତ କଥା ହେଲା ବିୟୁଟିର ମାଲିକ ଡୋରେମନ୍ ଏହି କମ୍ପାନୀରେ କାମ କରୁଥିଲେ, ଯାହାଙ୍କର ଏବେ ଦେହାନ୍ତ ହୋଇସାରିଛି । ତେଣୁ ତାଙ୍କ ଜାଗାରେ ବିୟୁଟିକୁ ଚାକିରିରେ ରଖାଗଲା । ବିୟୁଟି କମ୍ପାନୀର ମୁଖ୍ୟ ଦ୍ୱାରରେ ନଜର ରଖିବା ସହ ମୂଷା ଧରିବା କାମ କରେ ।