ପୁରୀ ୨୫/୩ : ଦୋଳ ପୂର୍ଣ୍ଣିମା ଦିନ ଶ୍ରୀବିଗ୍ରହଙ୍କ ରୋଷ ହୋମ ନୀତି ସରିବା ପରେ ଠାକୁରମାନଙ୍କୁ ନୂଆ ବୋଇ ରାଣୀ ଶାଢ଼ୀ ଖଣ୍ଡୁଆ ଓ ମସ୍ତକ ତ୍ରୟରେ ଗଭା ଲାଗି କରାଯାଏ । ଖଇ , କୋରା , ଶୀତଳ ଭୋଗ ଆସିବ ପରେ ଦୋଳଗୋବିନ୍ଦ ମହାଜନଙ୍କ ହସ୍ତରେ ରତ୍ନସିଂହାସନ କୁ ବିଜେ କରନ୍ତି ଓ ପୂଜାପଣ୍ଡା ଦ୍ୱାରା ପଞ୍ଚ ଉପଚାର ବିଧିରେ ଭୋଗ ହୋଇଥାଏ। ତତ୍ପରେ ଦୋଳ ଗୋବିନ୍ଦ , ଶ୍ରୀଦେବୀ, ଭୂଦେବୀ ମହାପ୍ରଭୁ ଶ୍ରୀଜଗନ୍ନାଥ ଆଜ୍ଞା ମାଳ ପାଇ ରତ୍ନସିଂହାସନ ଚତୁରପର୍ଶ୍ୱରେ ୭ଥର ପ୍ରଦକ୍ଷଣ କରି ମାଜଣା ମଣ୍ଡପରେ ମହାସ୍ନାନ, ମାଜଣା ଓ ବନକ ଲାଗି ହୋଇ ତିନି ବିଗ୍ରହଙ୍କୁ ବେଶ କରାଯାଏ। ଏହାପରେ ପ୍ରସାଦ ଲାଗି , ବନ୍ଦାପନା ନୀତି ହୋଇ ବିମାନରେ ବିଜେ ହୁଅନ୍ତି। ଉକ୍ତ ବିମାନକୁ ଶ୍ରୀମନ୍ଦିର ବେଢ଼ାରେ ୭ଥର ପରିକ୍ରମା କରିବା ପରେ ସିଂହଦ୍ୱାର ଦେଇ ଦୋଳବେଦୀ ନିକଟକୁ ବିଜେ କରନ୍ତି।
ଏହି ଶୋଭାଯାତ୍ରା ରେ ଢୋଲକି, ଖୋଳ , ଗିନି, ଝାଞ୍ଜ ସହ ସଂକୀର୍ତ୍ତନ ପୂର୍ବକ ଘଣ୍ଟ , ଛତା , କାହାଳୀ ଓ ଭକ୍ତମାନଙ୍କ ହରିବୋଲ , ହୁଳହୁଳି ମଧ୍ୟରେ ବିମାନ କୁ ଦୋଳବେଦୀର ୭ ଥର ପରିକ୍ରମା କରିସାରି ଦୋଳବେଦୀ ଉପରେ ଦକ୍ଷିଣାଭିମୁଖୀ ହୋଇ ବସନ୍ତି। ଠାକୁରମାନେ ଦୋଳିରେ ଥିଲା ସମୟରେ ୩ ଧୂପ ଅନୁଷ୍ଠିତ ହୋଇଥାଏ ।ଏହି ଧୂପମାନଙ୍କରେ ଖଇ , ଶାକର , ଚଣା , ନାଡି , ବଡା , ହଂସ କେଳି ,ଆରିସା, ଓରିଆ ,କ୍ଷୀର ଇତ୍ୟାଦି ଭୋଗ ପୂଜାପଣ୍ଡାମାନଙ୍କ ଦ୍ୱାରା ଷୋଡଶ ଉପଚାରରେ ହୋଇଥାଏ। ଉକ୍ତ ଦିନ ରାତ୍ରି ରେ ବାହୁଡ଼ା ବିଜେ ସମୟରେ ପୂର୍ବପରି ୭ଥର ପ୍ରଦକ୍ଷିଣ କରିବା ପରେ ଦିଅଁ ଶ୍ରୀମନ୍ଦିର କୁ ପ୍ରତ୍ୟାବର୍ତ୍ତନ କରିଥାନ୍ତି।