କୋଲକାତା,୦୪/୦୨: ପଶ୍ଚିମବଙ୍ଗ ଉପକୂଳରେ ପ୍ରଥମଥର ପାଇଁ ମିସାଇଲ ଟେଷ୍ଟିଂ କରିବାକୁ ଯାଉଛି ଡିଆରଡିଓ (ଭାରତୀୟ ପ୍ରତିରକ୍ଷା ଗବେଷଣା ଓ ଉନ୍ନୟନ ସଙ୍ଗଠନ) । ଚଳିତମାସ ଶେଷ କିମ୍ବା ଆସନ୍ତା ମାର୍ଚ୍ଚ ପ୍ରଥମ ସପ୍ତାହରେ ପଶ୍ଚିମବଙ୍ଗର ଦୀଘା ଉପକୂଳରେ ନିର୍ମିତ ପରୀକ୍ଷଣ କେନ୍ଦ୍ରରୁ ଏହି ମିସାଇଲ ଟେଷ୍ଟ କରାଯିବ ।
ସାଧାରଣତଃ ଡିଆରଡିଓ ମିସାଇଲ ଟେଷ୍ଟିଂ ପାଇଁ ବାଲେଶ୍ୱର ଜିଲ୍ଲା ଚାନ୍ଦିପୁରସ୍ଥିତ ଆଇଟିଆର କିମ୍ବା ଭଦ୍ରକ ଜିଲ୍ଲାର ଅବଦୁଲ କଲାମ ଦ୍ୱୀପରେ ଥିବା ପରୀକ୍ଷଣ ଘାଟିକୁ ବ୍ୟବହାର କରିଥାଏ । ତେବେ ଦୀଘାରେ ମିସାଇଲ ପରୀକ୍ଷା ସମୟରେ ବାଲେଶ୍ୱର ଜିଲ୍ଲାରୁ ମଧ୍ୟ ଏକ ମିସାଇଲ ପରୀକ୍ଷା କରାଯିବ । ପ୍ରକୃତରେ ଡିଆରଡିଓ ବୈଜ୍ଞାନିକମାନେ ଜାଣିବାକୁ ଚାହୁଁଛନ୍ତି କି ଉଭୟ ମିସାଇଲ ବାଟରେ ପରସ୍ପରକୁ ଭେଟିବା ପରେ ଏକାଠି ସମାନ୍ତରାଲ ଭାବେ ଯିବେ ନା ଭିନ୍ନ ଭିନ୍ନ ରାସ୍ତାରେ ଯିବେ । ଏଥରୁ ଜଣାପଡିବ କି ଭାରତର ମିସାଇଲ ଡିଫେନ୍ସ ସିଷ୍ଟମର କେତେ ଅଗ୍ରଗତି ହୋଇପାରିବ ।
ପଶ୍ଚିମବଙ୍ଗ ହଳଦିଆ ଜିଲ୍ଲାପାଳ ତନବୀର ଅଫଜଲଙ୍କ ସୂଚନା ଅନୁସାରେ ଡିଆରଡିଓ ପକ୍ଷରୁ ହେଉଥିବା ମିସାଇଲ ପରୀକ୍ଷଣ କେନ୍ଦ୍ର ପ୍ରତିଷ୍ଠା କରିବା ଲାଗି ରାଜ୍ୟ ସରକାର ପୂର୍ବରୁ ଜମି ଦେଇସାରିଛନ୍ତି । ସେଠାରେ ଏବେ ନିର୍ମାଣ କାର୍ଯ୍ୟ ଜାରି ରହିଛି । ସେହିଭଳି ମିସାଇଲ କେନ୍ଦ୍ର ପର୍ଯ୍ୟନ୍ତ ରାସ୍ତା ନିର୍ମାଣରେ ମଧ୍ୟ ରାଜ୍ୟ ସରକାର ସହଯୋଗ କରୁଛନ୍ତି । କିଛିଦିନ ତଳେ ତଟରକ୍ଷୀ ବାହିନୀ ଆଇଜି ଇକ୍ବାଲ ସିଂହ ଚୌହାନ ହଳଦିଆ ଗସ୍ତରେ ଆସିଥିଲେ ।
ସେତେବେଳେ ସେ କହିଥିଲେ କି ତଟରକ୍ଷୀ ବାହିନୀ ପଶ୍ଚିମବଙ୍ଗ ଏବଂ ଓଡ଼ିଶାରେ ୨ଟି ଲେଖାଏ ରାଡାର ଷ୍ଟେସନ ପ୍ରତିଷ୍ଠା କରୁଛି । ପଶ୍ଚିମବଙ୍ଗର ଫ୍ରେଞ୍ଚଗନ ଓ ଜୁନପୁଟରେ ରାଡାର ଷ୍ଟେସନ କାମ ଦ୍ରୁତଗତିରେ ଆଗେଇ ଚାଲିଛି । ଆସନ୍ତା ଅଗଷ୍ଟ ସୁଦ୍ଧାର ଏହାର ନିର୍ମାଣ କାର୍ଯ୍ୟ ଶେଷ ହେବ । ପ୍ରାୟ ୨ ଦଶକ ତଳେ ପୂର୍ବ ମେଦିନପୁର ଜିଲ୍ଲା ହରିପୁର ଠାରେ ଏକ ଆଣବିକ ଶକ୍ତି କେନ୍ଦ୍ର ପ୍ରତିଷ୍ଠା କରିବାକୁ ଯୋଜନା ହୋଇଥିଲା । କିନ୍ତୁ ସ୍ଥାନୀୟ ଲୋକଙ୍କ ପ୍ରବଳ ବିରୋଧ ଯୋଗୁ ତାହା ସମ୍ଭବ ହୋଇପାରି ନଥିଲା । ହେଲେ ବର୍ତ୍ତମାନ ସେହି ହରିପୁର ନିକଟ ଜୁନପୁଟ ଠାରେ ମିସାଇଲ ପ୍ରକ୍ଷେପଣ କେନ୍ଦ୍ର ପ୍ରତିଷ୍ଠା କରାଯାଉଛି ।
