ବୌଦ୍ଧ, ୧୭/୦୨ : ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଭିଜିଲାନ୍ସ ହାତରେ ବନ୍ଧା ହୋଇ ଜେଲ ଗଲେ ବୌଦ୍ଧ ଜିଲ୍ଲାର RTO ବସନ୍ତ କୁମାର ମହାପାତ୍ର। ଯାହାକୁ ନେଇ ଜିଲ୍ଲାରେ ଏବେ ଖୁସିର ମହୋଲ ଦେଖିବାକୁ ମିଳିଛି । ପରିବହନ କାର୍ଯ୍ୟାଳୟ ଆଗରେ ବାଜା ବଜାଇ ଖୁସିରେ ନାଚିଲେ ଡ୍ରାଇଭରଙ୍କ ସମେତ ବିଭିନ୍ନ ସଙ୍ଗଠନ ।
ସୂଚନାନୁଯାୟୀ, ଶୁକ୍ରବାର ବୌଦ୍ଧ RTO ବସନ୍ତ ମହାପାତ୍ର ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଗିରଫ ହୋଇ ଜେଲ ଯାଇଛନ୍ତି। ତାଙ୍କ ନାଁରେ କୋଟି କୋଟି ଟଙ୍କାର ସମ୍ପତ୍ତି ମିଳିଛି। ବସନ୍ତ ମହାପାତ୍ର ବୌଦ୍ଧକୁ ଆସିବା ଦିନ ଠାରୁ ହିଁ ବିବାଦରେ ରହିଆସିଥିବା ବେଳେ ତାଙ୍କୁ ବଦଳି କରିବା ପାଇଁ ଜିଲ୍ଲାପାଳଙ୍କ ନିକଟରେ ଦାବି ଆପତ୍ତି କରିଥିଲେ ଅନେକ ସଙ୍ଗଠନ । କାରଣ ଜିଲ୍ଲାରେ RTO ବାବୁଙ୍କର ଚାଲିଥିଲା ହିଟଲରି ଶାସନ । ଦିନରେ ସଚ୍ଚୋଟ ପଣିଆ ଏବଂ ନିୟମ କାନୁନ ଦେଖାଉଥିବା ବାବୁ ରାତିରେ ଭାଙ୍ଗୁଥିଲେ ସମସ୍ତ ନିୟମ । ଫାଇନ କାଟିବା ନାଁ ନେଇ ଗାଡିରୁ ଆଦାୟ କରନ୍ତି ଲକ୍ଷ ଲକ୍ଷ ଟଙ୍କା । ଲାଇସେନ୍ସ କରାଇବା ନାଁରେ ନେଉଥିଲେ ହଜାର ହଜାର ଟଙ୍କା । ସେଥିରୁ ଆୟ କରିଥିଲେ କୋଟି କୋଟି ଟଙ୍କା ଏବଂ କିଣିଥିଲେ ଦାମୀ ଦାମୀ ଫ୍ଲାଟ୍ ।
ଏ ଖବର ପ୍ରଘଟ ହେବା ପରେ ଜିଲ୍ଲାର ବିଭିନ୍ନ ସଙ୍ଗଠନ ଖୁସି ବ୍ୟକ୍ତ କରିଛନ୍ତି । ସ୍ଥିତି ଏଭଳି ହୋଇଛି ଜିଲ୍ଲାର ଡ୍ରାଇଭର ସଙ୍ଘ ଓ ସାମାଜିକ ସୁରକ୍ଷା ପରିଷଦ ପରିବହନ କାର୍ଯ୍ୟାଳୟ ସମ୍ମୁଖରେ ବାଜା ବଜାଇ ନିଜ ଖୁସି ଜାହିର କରିଛନ୍ତି।