ସୋର/ଖଣ୍ତାପଡ଼ା, ୩୦/୧୧; ବାହାନଗା ବ୍ଲକ କଲ୍ୟାଣୀ ପଞ୍ଚାୟତ ଭିଲ୍ଲା ଗ୍ରାମର ଜଣେ ନବମ ଶ୍ରେଣୀ ଛାତ୍ରୀଙ୍କୁ ଏକ ତରଫା ପ୍ରେମ ନିବେଦନ କରି ବିଫଳ ହୋଇ ଗୁରୁବାର ପୂର୍ବାହ୍ନରେ ଛାତ୍ରୀ ଏବଂ ତାଙ୍କ ବାପାଙ୍କୁ ଜଣେ ନାବାଳକ ଆକ୍ରମଣ କରିଛି। ଏହି ଘଟଣାରେ ପୁଲିସ ନାବାଳକକୁ ଥାନାରେ ଅଟକ ରଖିଛି। 

ଭିଲ୍ଲା ଗ୍ରାମର ଜଣେ ନାବାଳିକା ନବମ ଶ୍ରେଣୀରେ ପାଠ ପଢ଼ନ୍ତି। ଗୁରୁବାର ସକାଳେ ଛାତ୍ରୀ ଜଣଙ୍କ ସ୍କୁଲକୁ ଯାଉଥିବା ବେଳେ ତାଳପଦା ଗ୍ରାମର ଜଣେ ନାବାଳକ ତାଙ୍କୁ ଏକ ତରଫା ପ୍ରେମ ନିବେଦନ କରିବା ସହିତ କମେଣ୍ଟ ମାରିଥିଲେ। ନାବାଳିକା ଜଣଙ୍କ ଏହାକୁ ବିରୋଧ କରିଥିଲେ। ନାବାଳକ ଜଣଙ୍କ ତାଙ୍କୁ ହାତରେ ପିନ୍ଧିଥିବା ଏକ ଲୁହା ବଳାରେ ମାଡ଼ ମାରିଥିଲେ। ଖବର ପାଇ ନାବାଳିକାଙ୍କ ବାପା ଘଟଣା ସ୍ଥଳରେ ପହଂଚିବା ପରେ ନାବାଳକ ଏବଂ ଅନ୍ୟମାନେ ତାଙ୍କୁ ମଧ୍ୟ ଉକ୍ତ ବଳାରେ ମାଡ଼ ମାରିଥିଲେ। ଫଳରେ ନାବାଳିକା ଏବଂ ତାଙ୍କ ବାପାଙ୍କ ମୁଣ୍ଡ ଫାଟିବା ସହିତ ଆହତ ହୋଇଥିଲେ। ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ଗୋପାଳପୁର ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରୁ ଚିକିତ୍ସିତ ହୋଇ ନାବାଳିକାଙ୍କ ବାପା ଥାନାରେ ଅଭିଯୋଗ କରିବା ପରେ ପୁଲିସ ସମ୍ପୃକ୍ତ ନାବାଳକକୁ ଥାନାରେ ଅଟକ ରଖି ଘଟଣାର ତଦନ୍ତ ଆରମ୍ଭ କରିଛି।

ଆହୁରି ପଢନ୍ତୁ : ମାତିଛନ୍ତି ବାଇକ ଲୁଟେରା : ଭଦ୍ର ବେଶରେ ଆସିଲେ, ଘର ମୁହଁରୁ ଚୋରି କରି ନେଇଗଲେ ବାଇକ୍