ଭୁବନେଶ୍ୱର, ୨୨।୯: ପାତ୍ରପଡ଼ା ପ୍ରାଇମ୍ ଲୋକେସନରେ ଦୁଇଟି ଦାମୀ ପ୍ଲଟ୍ । ଆଖି ତରଟିଲା ଭଳି ବଙ୍ଗଲୋ । ସହର ଭିତରେ ରହିଛି ଦୁଇଟି ରେଷ୍ଟୁରାଣ୍ଟ । ତଥାପି ଏମାନେ ଗରିବ । ଡୁମଡୁମାରେ ଏକ ଦାମୀ ଫ୍ଲାଟ୍ । କିଆ କାର୍ ବି ଅଛି । ମାଷ୍ଟରକ୍ୟାଣ୍ଟିନରେ ଅଛି ଦାମୀ ରେଷ୍ଟୁରାଣ୍ଟ । ଏମାନେ ହେଉଛନ୍ତି ଭୁବନେଶ୍ୱରରେ ଆବାସ ଯୋଜାନର ହିତାଧିକାରୀ । ଏହି ଗୋଟିଏ କି ଯୋଡ଼ିଏ ନୁହେଁ, ଏମିତି ମାଳ ମାଳ ନକଲି ହିତାଧିକାରୀ ରହିଛନ୍ତି । ବଡ଼ ବଡ଼ ଅଟ୍ଟାଳିକା ଅଛି । ଦାମୀ କାର୍ ଅଛି । ସେମାନଙ୍କ ନାଁରେ ଏକର ଏକର ଜାଗା ବି ରହିଛି । ହେଲେ ଚଞ୍ଚକତା କରି ସର୍ଭେରେ ପୂରାଇଛନ୍ତି ନିଜ ନାଁ । ରାଜୀବ ଗାନ୍ଧୀ ଆବାସ ଯୋଜନାରେ ଘର ପାଇଛନ୍ତି । ଏଭଳି ଏକ ଅନୁକମ୍ପା ଜଣାପଡ଼ିବା ପରେ ବିଏମ୍ସି ଆବାସ କେଳାଙ୍କାରୀର ଗୁମର ଖୋଲିବାରେ ଲାଗିଛି । ସବୁଠୁ ବଡ଼ ପ୍ରଶ୍ନ ଯେ, କେମିତି ମାଳ ମାଳ କୋଟିପତି ହିତାଧିକାରୀ ଆବାସ ହାତେଇଛନ୍ତି ?
ଶାନ୍ତିପଲ୍ଲୀ ଆବାସ ଯୋଜନାରେ ଏକାଧିକ ହିତାଧିକାରୀ ଜାଲ ସାର୍ଟିଫିକେଟ୍ ଦେଇ ଘର ପାଇଥିବା ଆସିଥିଲା ଅଭିଯୋଗ । ଏହାର ତର୍ଜମା କରିଥିଲା ବିଏମ୍ସି ଓ ବିଡିଏର ଏକ ସ୍ୱତନ୍ତ୍ର ଦଳ । ଯାହା ପରେ ପୁରା ଘଟଣା ସାମ୍ନାକୁ ଆସିଥିଲା । ସମ୍ପୃକ୍ତ ବ୍ୟକ୍ତି ସର୍ଭେ ସମୟରେ ନିଜକୁ ଗରିବ ଦର୍ଶାଇ ଘର ହାତେଇଛନ୍ତି । ଖାଲି ସେ ନୁହଁନ୍ତି, ତାଙ୍କର ଦୁଇ ଭାଇ ମଧ୍ୟ ଆବାସ ସର୍ଭେରେ ନାଁ ପୂରାଇଛନ୍ତି । ଶାନ୍ତିପଲ୍ଲୀ ଆବାସ ଯୋଜନାରେ ସେ ବ୍ଲକ୍-୨ ଫ୍ଲାଟ୍ ନଂ-୨ରେ ଘର ପାଇଛନ୍ତି । ଏନେଇ ଟିମ୍ ସର୍ଭେ ପରେ ଜାଣିବାକୁ ପାଇଥିଲା ଯେ, ପାତ୍ରପଡ଼ାରେ ତାଙ୍କର ୫୪ ଡିସିମିଲ୍ ଏବଂ ୬୦ ଡିସିମିଲ୍ର ଜାଗା ରହିଛି । ସେହିପରି ଡୁମଡୁମାରେ ରହିଛି ଏକ ଦାମୀ ଫ୍ଲାଟ୍ ଏବଂ ଏକ କିଆ କାର୍ ମଧ୍ୟ ତାଙ୍କର ରହିଛି । ଖାଲି ସେତିକି ନୁହେଁ ମାଷ୍ଟରକ୍ୟାଣ୍ଟିନରେ ଦାମୀ ରେଷ୍ଟୁରାଣ୍ଟ ବି ଅଛି । ବିଏମ୍ସି ହାତରେ ଲାଗିଛି ଏହାର ସମ୍ପୂର୍ଣ୍ଣ ବିବରଣୀ । ଚନ୍ଦ୍ରଶେଖରପୁର ନୀଳମାଧବ ଆବାସ ପ୍ରକଳ୍ପରେ ଅନ୍ୟ ଜଣେ ଘର ହାତେଇଛନ୍ତି । ତାଙ୍କର ମଧ୍ୟ ଦାରୁଠେଙ୍ଗରେ ଜାଗା ରହିଛି । ଏହି ଘଟଣା ସାମନାକୁ ଆସିବା ପରେ ବିଡିଏ ଓ ବିଏମ୍ସି ପକ୍ଷରୁ ମିଳିତ ଯାଞ୍ଚ କରି ନୋଟିସ୍ କରାଯାଇଥିଲା । ଏନେଇ ଘର ମାଲିକ ସନ୍ତୋଷଜନକ ଉତ୍ତର ନ ରଖିବାରୁ ବିଏମ୍ସି ଆବଣ୍ଟନକୁ ବାତିଲ କରିଛି । ଏହା ସହ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ଅଣ୍ଟା ଭିଡ଼ିଛି ।
ତେବେ ଭୁବନେଶ୍ୱରରେ ଆବାସ ଯୋଜାନରେ ରହିଛି ଏଭଳି ଏକାଧିକ ମାମଲା । ସର୍ଭେ ସମୟରେ କିପରି ଘଟଣା ପଦାକୁ ଆସୁନି ? ଆବାସ ଯୋଜାନରେ ଗଫଲାତି ଚାଲିଛି କି ? ଏନେଇ ସାଧାରଣରେ ବୋଲି ପ୍ରଶ୍ନ ଉଠିଛି । ପୂର୍ବରୁ ମଧ୍ୟ ଏମିତି ଅନେକ ଅଭିଯୋଗ ଆସିଛି । ଗାଡ଼କଣ, ମଇଁଷାଖାଲ ଭଳି ପ୍ରକଳ୍ପରେ ମଧ୍ୟ ଏକାଧିକ ଘର ହାତେଇଥିବା ନେଇ ଅଭିଯୋଗ ହୋଇଥିଲା । ସହରରେ ଗରିବ ଲୋକଙ୍କୁ ଜାଗା ମିଳୁନି । ବସ୍ତିରେ ଜୀବନ କଟୁଛି । ହେଲେ ଧନୀ ହାତଉଛନ୍ତି ଆବାସ ଯୋଜାନରେ ମିଳୁଥିବା ଘର । କିଛି ତଳିଆ କର୍ମଚାରୀ ଲାଞ୍ଚ ନେଇ ସର୍ଭେରେ ନାଁ ଭର୍ତ୍ତି କରୁଛନ୍ତି । ତଳୁ ଉପର ଯାଏଁ ଲମ୍ବିଛି ଏହି କେଳେଙ୍କାରୀ । ତେବେ ଏହାକୁ ନେଇ ତର୍ଜମା ଚାଲିଥିବା ବିଏମସିର ଜଣେ ବରିଷ୍ଠ ଅଧିକାରୀ କହିଛନ୍ତି । ଏଭଳି ଜାଲ ହିତାଧିକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି ।
