ନୂଆଦିଲ୍ଲୀ, ୧୧।୯: ବିବାହ ହେଉ କିମ୍ୱା କୌଣସି ଫଙ୍କସନ୍ରେ ସାଧାରଣତଃ ଆମେ ଯୁବତୀମାନଙ୍କୁ ଦାମୀ ଦାମୀ ଲେହେଙ୍ଗା ପିନ୍ଧିଥିବାର ଦେଖିଥାଉ । ଏଥିମଧ୍ୟରୁ କନିଆର ଲେହେଙ୍ଗା ଥାଏ ସବୁଠୁ ୟୁନିକ୍ । ନିକଟରେ ଇଣ୍ଟରନେଟ୍ରେ ବେଶ୍ ଭାଇରାଲ ହେଉଛି ଏଲଇଡି ଲେହେଙ୍ଗା । ଇନଷ୍ଟାଗ୍ରାମ୍ରେ ଏହି ଲେହେଙ୍ଗାର ଫଟୋ ଓ ଭିଡିଓ ସେୟାର କରାଯାଇଛି । ଯେଉଁଥିରେ ଜଣେ ପାକିସ୍ତାନୀ କନ୍ୟା ନିଜ ହଳଦୀ ସେରିମନିରେ ଏଲଇଡି ଲେହେଙ୍ଗା ପିନ୍ଧିଥିବାର ଦେଖାଯାଉଛି । ସବୁଠୁ ଖାସ୍ କଥା ହେଉଛି, ଏହି ଲେହେଙ୍ଗାକୁ କୌଣସି ଡିଜାଇନର ନୁହଁ, ବରଂ ତାଙ୍କ ଭାବୀ ସ୍ୱାମୀ ପ୍ରସ୍ତୁତ କରିଛନ୍ତି ।
ଫଙ୍କସନ୍ରେ ତାଙ୍କ ପତ୍ନୀ ସବୁଠୁ ଅଧିକ ଚମତ୍କାର ତଥା ଉଜ୍ୱଳ ଦେଖାଯିବା ପାଇଁ ସେ ଏହି ଏଲଇଡି ଲେହେଙ୍ଗା ପ୍ରସ୍ତୁତ କରିଥିବା ଜଣାପଡ଼ିଛି । ଲେହେଙ୍ଗାଟି ଦେଖିବାକୁ ଖୁବ୍ ସୁନ୍ଦର ହୋଇଥିବା ବେଳେ ଏଥିପାଇଁ କନ୍ୟା ଜଣକ ବେଶ୍ ଉତ୍ସାହିତ ଥିବା ଭିଡିଓରେ ଦେଖିବାକୁ ମିଳିଛି । ଏଥିସହ କନ୍ୟା ଜଣକ କହିଛନ୍ତି ହୁଏତ ଏହି ଲେହେଙ୍ଗାକୁ ଅନେକ ଲୋକ ନାପସନ୍ଦ କରିପାରନ୍ତି ଏବଂ ଥଟ୍ଟା କରିପାରନ୍ତି । କିନ୍ତୁ, ମୋ ପାଇଁ ମୋ ସ୍ୱାମୀ ପ୍ରସ୍ତୁତ କରିଥିବା ଏହି ଲେହେଙ୍ଗା ମୁଁ ଗର୍ବର ସହିତ ପିନ୍ଧିବି । କାରଣ ମୁଁ ଜାଣେ, କୌଣସି ବର ନିଜ କନ୍ୟା ପାଇଁ ଏଭଳି ପ୍ରୟାସ କରିନଥିବେ । ତେବେ ଏହି ଭିଡିଓରେ ଅନେକ ଲୋକ କମେଣ୍ଟ କରିଛନ୍ତି । କିଛି ୟୁଜର୍ସ ଏହି ଲେହେଙ୍ଗାକୁ ପସନ୍ଦ କରୁଥିବା ବେଳେ କେହି କେହି ଲେହେଙ୍ଗା ପିନ୍ଧିଥିବା ଯୁବତୀଙ୍କୁ ଟ୍ରୋଲ୍ କରିଛନ୍ତି ।
