ଭୁବନେଶ୍ୱର, ୦୭/୦୮ : ପୂରା ଆଧୁନିକ । କିନ୍ତୁ ଝଲକ ପାରମ୍ପରିକ ହସ୍ତତନ୍ତର । କୁର୍ତ୍ତୀଠୁ ଆରମ୍ଭକରି କ୍ରବ୍‌ ଟପ୍‌, ସ୍ରଗ, ୱାନପିସ୍‌, ଜମ୍ପ୍‌ସୁଟ୍‌ ଭଳି ଅତ୍ୟାଧୁନିକ ବସ୍ତ୍ରରେ ଭରିରହିଛି ହସ୍ତତନ୍ତର ଛିଟା । କେବଳ ପୋଷାକ କାହିଁକି ମହିଳାମାନେ ବ୍ୟବହାର କରୁଥିବା ଅଳଙ୍କାର, ଭ୍ୟାନିଟି ବ୍ୟାଗ, ବେଲ୍ଟ ଭଳି ବିଭିନ୍ନ ପ୍ରକାର ସାମଗ୍ରୀରେ ହସ୍ତତନ୍ତ ଦେଖିବାକୁ ମିଳୁଛି । ପାରମ୍ପରିକ ବସ୍ତ୍ର ରୂପେ ଖ୍ୟାତିଲାଭ କରିଥିବା ହସ୍ତତନ୍ତ ଏବେ ଫ୍ୟାସନ ବଜାରରେ ଆସ୍ଥାନ ଜମାଇଲାଣି । ଯୁବପିଢିମାନଙ୍କର ମଧ୍ୟ ଏହା ପାଲଟିଛି ପ୍ରଥମ ପସନ୍ଦ ।  ପୂର୍ବରୁ ହସ୍ତତନ୍ତ କହିଲେ ଆମେ କେବଳ ଶାଢି କିମ୍ବା କେତକ ପାରମ୍ପରିକ ପୋଷାକକୁ ବୁଝୁଥିଲୁ । ଯେଉଁଥିରେ ଆଧୁନିକତା ରହୁନଥିଲା । ହେଲେ ବର୍ତ୍ତମାନ ଅଧୁନିକତା ତାଳରେ ହସ୍ତତନ୍ତ ନିଜର ରୂପ ବଦଳେଇଛି । ଫ୍ୟାସନେବଲ ପୋଷାକ ପିନ୍ଧିବାକୁ ପସନ୍ଦ କରୁଥିବା ଆଜିର ଯୁବପିଢିଙ୍କ ପାଇଁ ହସ୍ତତନ୍ତ ଆଣିଦେଇଛି ବିଭିନ୍ନ ପ୍ରକାର ସାମଗ୍ରୀ । କେବଳ ମହିଳା ନୁହନ୍ତି, ପୁରଷମାନେ ମଧ୍ୟ ହସ୍ତତନ୍ତ ଫ୍ୟାସନରେ ପଛରେ ନାହାନ୍ତି । ସେମାନଙ୍କ ପାଇଁ ମଧ୍ୟ କୋଟ୍‌, କୁର୍ତ୍ତା, ଟି-ସାର୍ଟ, ବେଲ୍ଟ, ଟୋପି ଭଳି ବିଭିନ୍ନ ପ୍ରକାର ସାମଗ୍ରୀ ବଜାରରେ ଚାହିଦା ସାଉଁଟୁଛି । 

ହସ୍ତତନ୍ତ କେବଳ ପୋଷକରେ ସିମୀତ ନାହିଁ । ବିଭିନ୍ନ ଅଳଙ୍କାର, ଚୁଡ଼ି, ହାର, ମୁଦି, ବ୍ରେସ୍‌ଲେଟ୍‌, ଆଙ୍କ୍‌ଲେଟ୍‌, ଭ୍ୟାନିଟି ବ୍ୟାଗ୍‌, କ୍ଲିପ୍‌, ହେୟାର ବ୍ୟାଣ୍ଡ ଭଳି ସାମଗ୍ରୀରେ ଏହା ଉପଲବ୍ଧ । ଓଡ଼ିଆ ବୁଣାକାରଙ୍କ ହାତତିଆରି ବସ୍ତ୍ର ପିନ୍ଧିବାକୁ ଯୁବପିଢି ବେଶ୍‌ ପସନ୍ଦ କରୁଛନ୍ତି । ବର୍ତ୍ତମାନ ଅନେକ ଯୁବପିଢି ଏହି ହସ୍ତତନ୍ତ ପୋଷାକ ତିଆରି କରି ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ବରାଦ ଅନୁଯାୟୀ ସେମାନେ ହସ୍ତତନ୍ତରେ ବିଭିନ୍ନ ପ୍ରକାର ପୋଷାକ ତଥା ଶାଢି ପ୍ରସ୍ତୁତ କରୁଛନ୍ତି । ଅନ୍ୟପକ୍ଷରେ ଅନ୍‌ଲାଇନ୍‌ ସପିଙ୍ଗ୍‌ ଆପ୍‌ ଏବଂ ଇଷ୍ଟାଗ୍ରାମ୍‌ରୁ ଯୁବପିଢି ହସ୍ତତନ୍ତର ଏହି ସାମଗ୍ରୀଗୁଡ଼ିକୁ ଅଧିକ କିଣୁଛନ୍ତି । କାରଣ ଦୋକାନ ତୁଳନାରେ ଏଠାରେ ଅଧିକ ଆକର୍ଷଣୀୟ ଓ କମ୍‌ ମୂଲ୍ୟରେ ପୋଷାକ ମିଳୁଛି ।