ଭୁବନେଶ୍ୱର, ୦୯/୦୯: ଆସନ୍ତା ଡିସେମ୍ବର ସୁଦ୍ଧା ଉଭୟ ହରିଶଙ୍କର ଓ  ନୃସିଂହନାଥ ପୀଠର ଉନ୍ନତିକରଣ ଓ ସୌନ୍ଦର୍ଯ୍ୟକରଣ ସମାପ୍ତ ହେବ । ଏଠାରେ  ପାର୍କିଂ, ଶୌଚାଳୟ, ମାର୍କେଟ କମ୍ପେ୍ଲକ୍ସ, ପାନୀୟ ଜଳ, ସ୍ଥାନୀୟ ଦୋକାନୀମାନଙ୍କ  ପାଇଁ ଆଧୁନିକ ଶୈଳୀରେ ଦୋକାନ ଗୃହ ନିର୍ମାଣ ଆଦି କାର୍ଯ୍ୟ ଡିସେମ୍ବର ସୁଦ୍ଧା ଶେଷ  କରିବାକୁ ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା ଅସିତ ତ୍ରିପାଠୀ ନିର୍ଦ୍ଦେଶ ଦେଇଛନ୍ତି  ।  ନିକଟରେ ବଲାଙ୍ଗୀର ଜିଲ୍ଲା ଗସ୍ତ କରି  ୫-"ଟି' ସଚିବ ଭି. କେ. ପାଣ୍ଡିଆନ୍‌  ହରିଶଙ୍କର ପୀଠର ଉନ୍ନତିକରଣକୁ ନେଇ  ପ୍ରତିଶ୍ରୁତି ଦେଇଥିଲେ । ଏହାର ସଫଳ  ରୂପାୟନକୁ ନେଇ ରାଜ୍ୟ ସରକାର ତତ୍ପରତା  ଦେଖାଇଛନ୍ତି । 

ଶୁକ୍ରବାର ଖାରବେଳ ଭବନ ସମ୍ମିଳନୀ କକ୍ଷରେ ରାଜ୍ୟରେ ପର୍ଯ୍ୟଟନର ଅଭିବୃଦ୍ଧି ଓ ଭିତ୍ତିଭୂମି ବିକାଶ ଉପରେ  ଅନୁଷ୍ଠିତ ଏକ ସମୀକ୍ଷା ବୈଠକରେ ଅଧ୍ୟକ୍ଷତା କରି ଶ୍ରୀ ତ୍ରିପାଠୀ ବିଭିନ୍ନ ପ୍ରକଳ୍ପଗୁଡ଼ିକର  ତୁରନ୍ତ ରୂପାୟନ ଉପରେ ଗୁରୁତ୍ୱ ଦେଇଛନ୍ତି  । ସମ୍ବଲପୁର ଜିଲ୍ଲାରେ ହୀରାକୁଦ ବୋଟ୍‌  କ୍ଲବ୍‌ କାର୍ଯ୍ୟ ଖୁବ୍‌ଶୀଘ୍ର ଆରମ୍ଭ କରାଯିବ । ହୀରାକୁଦ ଜଳଭଣ୍ଡାରରେ ମାସକ ମଧ୍ୟରେ  ପର୍ଯ୍ୟଟନ ବିଭାଗ ପକ୍ଷରୁ ଏକ ବଡ଼ କ୍ରୁଜ୍‌ କାର୍ଯ୍ୟକାରୀ କରାଯିବ । ଉପକୂଳ ଓଡ଼ିଶାରେ ଥିବା  ଗୋପାଳପୁର, ଚାନ୍ଦିପୁର, ତଳସାରି, ପାରାଦ୍ୱୀପ ଓ ସୋନାପୁର ଇତ୍ୟାଦି ବେଳାଭୂମିରେ  ପ୍ରାୟ ୧୫ଟି ଅସ୍ଥାୟୀ ଗୃହ(ବିଚ୍‌ ସ୍ୟାକ) ନିର୍ମାଣ କରାଯିବ । ଏସବୁ ସ୍ଥାନରେ ବସିବା  ପାଇଁ ସ୍ଥାନ, ଶୌଚାଳୟ, ମାର୍କେଟ କମ୍ପେ୍ଲକ୍ସ ଓ ପାର୍କିଂ ଇତ୍ୟାଦି ନିର୍ମାଣ କରାଯିବା ନେଇ  ବୈଠକରେ ଆଲୋଚନା କରାଯାଇଥିଲା । ରାଜ୍ୟର ସମୁଦ୍ର କୂଳବର୍ତ୍ତୀ ସହରଗୁଡ଼ିକୁ ଗୋଆ ଢାଞ୍ଚାରେ ଗଢ଼ି ତୋଳିବାକୁ ଅତ୍ୟାଧୁନିକ ପ୍ରକଳ୍ପମାନ ପରିକଳ୍ପିତ ହୋଇଛି ଏବଂ ଏଗୁଡ଼ିକ  ସରକାରୀ-ଘରୋଇ ଭାଗିଦାରୀରେ ସଂପୂର୍ଣ୍ଣ କରିବାକୁ ବୈଠକରେ ନିଷ୍ପତ୍ତି ନିଆଯାଇଛି ।