ଭୁବନେଶ୍ବର,୨୬।୬ : ରାଜଧାନୀ ଭୁବନେଶ୍ବରେ ବୁଧବାର ମଧ୍ୟାହ୍ନରେ ପ୍ରବଳ ବର୍ଷା । ଅପରାହ୍ନ ଗୋଟାଏରୁ ଘଡଘଡି ସହ ବର୍ଷା ଆରମ୍ଭ ହୋଇଥିଲା। ପ୍ରବଳ ବର୍ଷାରେ ବେହାଲ ଭୁବନେଶ୍ବର। ରାଜଧାନୀ ରାଜରାସ୍ତାରେ ପାଣି ଲହଡୀ ମାରିଥିଲା।  ଭୁବନେଶ୍ବରରେ  ଜଳବନ୍ଦୀ ସ୍ଥିତି ସୃଷ୍ଟି ହୋଇଥିଲା। ରାସ୍ତାରେ ପାଣି ଜମି ରହିଥିବାରୁ   ଗାଡି ଚଳାଚଳ ବାଧାପ୍ରାପ୍ତ ହୋଇଥିଲା।

ପ୍ରବଳ ବର୍ଷାରେ  ଇସ୍କନ ଛକ ନିକଟରେ ଆଣ୍ଠୁଏ ଉଚ୍ଚର ପାଣି ଜମି ରହିଥିଲା। ଇସ୍କନ ଛକରେ ଜମି ରହିଥିବା ବର୍ଷା ପାଣିରେ ଏକ ବସ ଫସି ରହିଥିଲା।   ଏପେଟ ସିଆରପିରୁ ଫାୟାର ଷ୍ଟେସନ ଛକ ରାସ୍ତାରେ ଅନୁରୂପ ଅବସ୍ଥା।  ବର୍ଷା ଜଳ ନିଷ୍କାସନ ହୋଇ ନ ପାରି ଆଣ୍ଠୁଏ ଉଚ୍ଚର ପାଣି ଜମି ରହିଥିଲା। ବିଶେଷ କରି ବର୍ଷା ଛାଡିବା ପରେ ପରିସ୍ଥିତି ଅଣାୟତ ହୋଇ ପଡିଥିଲା। ରାଜଧାନୀର ଅଧିକାଂଶ ରାସ୍ତାରେ ଟ୍ରାଫିକ ଜାମ ହୋଇଥିଲା। ଜାତୀୟ ରାଜପଥରେ ପାଣି ଜମିବା ଯୋଗୁ ଗାଡି ଚଳାଚଳ ବାଧାପ୍ରାପ୍ତ ହୋଇଥିଲା। ସିଆରପି ଛକରୁ ଫାୟାର ଷ୍ଟେସନ ଛକ ରାସ୍ତାରେ ବର୍ଷା ଜଳ ଜମିବାରୁ ଲୋକମାନଙ୍କ ବାଇକରେ ପାଣି ପଶିଯାଇଥିଲା। ସେହିପରି ଏହି ରାସ୍ତାରେ ଟ୍ରାଫିକ ଜାମ ଯୋଗୁ ଲୋକମାନେ ଘଣ୍ଟା ଘଣ୍ଟା ଧରି ଟ୍ରାଫିକ ଜାମରେ ଫସି ରହିଥିଲେ।