ଡେଲାୱେର,୨୩/୦୯ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସର୍ଭିକାଲ କ୍ୟାନ୍ସର ସହ ଲଢ଼ୁଥିବା ଦେଶଗୁଡ଼ିକ ପାଇଁ ୭.୫ ନିୟୁତ ଡଲାରର ସହାୟତା ଘୋଷଣା କରିଛନ୍ତି । ଏଥିରେ ନମୁନା ଓ ନିଦାନ ଉପକରଣ ଏବଂ ଟିକା ଡୋଜ୍ ସାମିଲ ରହିଛି । ଭାରତ ‘ଗାଭି’ ଓ ‘କ୍ୱାଡ୍’ ପଦକ୍ଷେପ ସ୍ୱରୂପ ଭାରତ-ପ୍ରଶାନ୍ତ ମହାସାଗର ଅଞ୍ଚଳ ପାଇଁ ୪ କୋଟି ଟିକା ଡୋଜ୍ ଯୋଗାଇବ ।
ଆମେରିକାର ଡେଲାୱେର ପ୍ରଦେଶରେ ରବିବାର କ୍ୱାଡ୍ ରାଷ୍ଟ୍ର ପକ୍ଷରୁ ଅନୁଷ୍ଠିତ ‘କ୍ୟାନ୍ସର ମୁନ୍ସଟ୍’ କାର୍ଯ୍ୟକ୍ରମରେ ଉଦ୍ବୋଧନ ବେଳେ ପ୍ରଧାନମନ୍ତ୍ରୀ ମୋଦି ଏହି ଘୋଷଣା କରିଛନ୍ତି । କାର୍ଯ୍ୟକ୍ରମରେ ମୋଦି ବୈଶ୍ୱିକ ସ୍ୱାସ୍ଥ୍ୟସେବା ପ୍ରତି ଭାରତର ପ୍ରତିବଦ୍ଧତା ନେଇ ଆଲୋକପାତ କରିଥିଲେ । ସର୍ଭିକାଲ୍ କ୍ୟାନ୍ସର ବିରୋଧରେ ଲଢ଼ିବା ନେଇ ଭାରତର ବିଭିନ୍ନ ପଦକ୍ଷେପ ବାବଦରେ ଚର୍ଚ୍ଚା କରିଥିଲେ ।
ସେ କହିଥିଲେ, କ୍ୟାନ୍ସର ବୋଝକୁ କମାଇବା ପାଇଁ ନିରାକରଣ, ସ୍କ୍ରିନିଂ, ନିଦାନ ଏବଂ ଉପଚାରକୁ ନେଇ ଏକକ ଦୃଷ୍ଟିକୋଣ ରହିବା ଜରୁରି ।ସର୍ଭିକାଲ୍ କ୍ୟାନ୍ସର ବିରୋଧରେ ଲଢ଼ିବା ପାଇଁ ଭାରତ ନିଜର ଏକ ଟିକା ବିକଶିତ କରିଛି । ଆର୍ଟିଫିସିଆଲ୍ ଇଣ୍ଟେଲିଜେନ୍ସ ସହାୟତାରେ ନୂଆ ଉପଚାର ପ୍ରୋଟୋକଲ୍ କାର୍ଯ୍ୟକାରୀ କରୁଛି । କ୍ୟାନ୍ସର ମୁନ୍ସଟ୍ କାର୍ଯ୍ୟକ୍ରମ ଆୟୋଜନ ଲାଗି ମୋଦି ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କୁ ପ୍ରଶଂସା କରିଥିଲେ । କହିଥିଲେ, ଶସ୍ତା, ସୁଲଭ ଏବଂ ଗୁଣଯୁକ୍ତ ସ୍ୱାସ୍ଥ୍ୟସେବା ପ୍ରଦାନ ଲାଗି ଏହା ଆମର ମିଳିତ ସଂକଳ୍ପକୁ ଦର୍ଶାଉଛି ।
ଉଲ୍ଲେଖଯୋଗ୍ୟ, କ୍ୟାନ୍ସର ମୁନ୍ସଟ୍ ପଦକ୍ଷେପ ହେଉଛି ହ୍ୱାଇଟ୍ ହାଉସ୍ର ମାନସ ସନ୍ତାନ । ଏଥିରେ କ୍ୟାନ୍ସର ପ୍ରତିକାରରେ ପ୍ରଗତିକୁ ପ୍ରୋତ୍ସାହିତ ଲାଗି ବିଭିନ୍ନ ଅଞ୍ଚଳ ମଧ୍ୟରେ ସହଯୋଗ ବୃଦ୍ଧି ନିମନ୍ତେ ଲକ୍ଷ୍ୟ ରହିଛି ।
