କାଶୀପୁର- କାଶୀପୁର ବ୍ଲକ ଟିକିରି ଆବାସିକ ବିଦ୍ୟାଳୟର ଦଶମ ଶ୍ରେଣୀ ଛାତ୍ର ସୁମନ ନାଏକଙ୍କ ମୃତ୍ୟୁରେ ଆଜି ବିଭାଗ ପକ୍ଷରୁ ତଦନ୍ତ ଆରମ୍ଭ ହୋଇଛି। ଚଳିତ ମାସ ୧୮ ତାରିଖ ଗୁରୁବାରରେ ସୁମନ ନାଏକଙ୍କ ଦେହ ଖରାପ ହେବାରୁ ବିଦ୍ୟାଳୟ କର୍ତ୍ତୃପକ୍ଷ ପ୍ରାଥମିକ ଚିକିତ୍ସା କରାଇବା ପରେ ଘରକୁ ପଠାଇ ଦେଇଥିଲେ।
ତେବେ ଗତକାଲି ଛାତ୍ର ସୁମନ ନାଏକଙ୍କ ମୃତ୍ୟୁ ହୋଇଥିବା ଜଣା ପଡ଼ିଛି। ଛାତ୍ର ସୁମନଙ୍କ ମୃତ୍ୟୁକୁ ନେଇ ଆଜି ଅପରାହ୍ନରେ ଡିଡବ୍ଲ୍ୟୁଓ ରାୟଗଡା ସହିତ ଶିକ୍ଷା ବିଭାଗର ଡ଼ିଇଓ ବସନ୍ତ କୁମାର ନାୟକ, କାଶୀପୁର ବିଇଓ ଦୀପ୍ତି ମୟୀ ସିଂ ପ୍ରମୁଖ ବିଦ୍ୟାଳୟରେ ପହଞ୍ଚି କେଉଁ ପରିସ୍ଥିତିରେ ଛାତ୍ରଙ୍କ ମୃତ୍ୟୁ ହୋଇଛି, ଏ ସମ୍ପର୍କରେ ତଦନ୍ତ ଆରମ୍ଭ କରିଛନ୍ତି।
ଟିକିରି ଉଚ୍ଚ ମାଧ୍ୟମିକ ବିଦ୍ୟାଳୟ ପରିସରରେ ଥିବା ହଷ୍ଟେଲରେ ରହି ପାଠ ପଢୁ ଥିବା କୁଚେଇପଦର ପଞ୍ଚାୟତ ତୁଜେର ଗ୍ରାମର ସୁମନ ନାଏକକୁ ଜ୍ଵର ହେବାରୁ ଗୁରୁବାର ସକାଳେ ସ୍ଥାନୀୟ ଟିକିରି ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରକୁ ନିଆ ଯାଇଥିଲା। ଚିକିତ୍ସା ଅବହେଳାରୁ ଛାତ୍ରଙ୍କ ମୃତ୍ୟୁ ଅଭିଯୋଗ ସମ୍ପର୍କରେ ଡିଡବ୍ଲ୍ୟୁଓଙ୍କୁ ପଚରା ଯିବାରୁ ତଦନ୍ତ ପରେ ଘଟଣା ସମ୍ପର୍କରେ ଜଣାପଡ଼ିବ, ଏଥିପାଇଁ ଦାୟୀ ଶିକ୍ଷକ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।