କୋଲକାତା,୨୩/୦୩: ଶନିବାର ରାତିରେ ଦୁଇ ପ୍ରମୁଖ ପ୍ରତିଦ୍ୱନ୍ଦ୍ୱୀ କୋଲକାତା ନାଇଟ ରାଇଡର୍ସ ଓ ସନରାଇଜର୍ସ ହାଇଦ୍ରାବାଦ ପରସ୍ପରକୁ ଭେଟିବେ । ସମଗ୍ର କ୍ରିକେଟ୍ ପ୍ରେମୀଙ୍କ ନଜର ରହିବ ଦୁଇ ଅଷ୍ଟ୍ରେଲୀୟ ପେସ୍ ତାରକା ପ୍ୟାଟ୍ କମିନ୍ସ ଓ ମିଚେଲ ଷ୍ଟାର୍କଙ୍କ ଉପରେ । ଏଥର ଆଇପିଏଲ୍ରେ ଉଭୟ ସବୁଠୁ ଦାମୀ ଖେଳାଳି । କମିନ୍ସଙ୍କୁ ସନରାଇଜର୍ସ ୨୦.୫କୋଟି ଟଙ୍କାରେ କିଣିଛି ଓ ଅଧିନାୟକ ନିଯୁକ୍ତ କରିଛି । ସେହିପରି ନାଇଟ ରାଇଡର୍ସ ଷ୍ଟାର୍କଙ୍କୁ ୨୪.୭୫କୋଟି ଟଙ୍କା ମୂଲ୍ୟରେ କିଣି ସମସ୍ତ୍ଙ୍କୁ ଚକିତ କରିଦେଇଥିଲା । ୯ ବର୍ଷ ପରେ ଷ୍ଟାର୍କ ଆଇପିଏଲ୍ ଖେଳିବାକୁ ଯାଉଛନ୍ତି ।
ସନରାଇଜର୍ସ ଗତ ସିଜନରେ ନୈରାଶ୍ୟଜନକ ପ୍ରଦର୍ଶନ କରିଥିଲା । ଏଥର ଦଳ ବେଶ୍ ଶକ୍ତିଶାଳୀ ମନେ ହେଉଛି । କମିନ୍ସଙ୍କ ନେତୃତ୍ୱରେ ସନରାଇଜର୍ସ ଦମ୍ଦାର ପ୍ରଦର୍ଶନ କରିବ ବୋଲି କ୍ରିକେଟ୍ ପଣ୍ଡିତମାନେ ମତ ଦେଇଛନ୍ତି । ୨୦୨୩ରେ କମିନ୍ସ ଅନେକ ସଫଳତା ଅର୍ଜନ କରିଛନ୍ତି । ତାଙ୍କ ନେତୃତ୍ୱରେ ଅଷ୍ଟ୍ରେଲିଆ ଦିନିକିଆ ବିଶ୍ୱକପ୍ ଓ ବିଶ୍ୱ ଟେଷ୍ଟ ଚାମ୍ପିଅନ୍ସିପ୍ ଜିତିଥିଲା । ଏଥର ସେ ସନରାଇଜର୍ସର ଭାଗ୍ୟ ବଦଳାଇବେ ।
ନାଇଟ୍ ରାଇଡର୍ସ ମଧ୍ୟ ବେଶ୍ ସନ୍ତୁଳିତ । ଅଧିନାୟକ ଶ୍ରେୟାସ ଆୟରଙ୍କ ପ୍ରତ୍ୟାବର୍ତ୍ତନ ବ୍ୟାଟିଂ ବିଭାଗକୁ ମଜଭୁତ କରିଛି । ଏକାଦଶକୁ ନେଇ ପୂର୍ବାନୁମାନ କରିବା କଷ୍ଟକର । ତଥାପି ଭେଙ୍କଟେଶ ଆୟରଙ୍କ ସହ ଫିଲ ସଲ୍ଟ ପାଳି ଆରମ୍ଭ କରିବା ଏକ ପ୍ରକାର ନିଶ୍ଚିତ । ଆୟର, ନିତିଶ ରାଣା, ରିଙ୍କୁ ସିଂହ ଓ ଆନ୍ଦ୍ରେ ରସେଲ ମଧ୍ୟ ଭାଗ ସମ୍ଭାଳିବେ ।
ଘରୋଇ ଗ୍ରାଉଣ୍ଡ୍ରେ ଖେଳୁଥିବା ନାଇଟ ରାଇଡର୍ସର ପଲା ଭାରି ରହିବା ସ୍ୱାଭାବିକ୍ । ତଥାପି ଦର୍ଶକ ସନରାଇଜର୍ସର ପ୍ରଦର୍ଶନ ଉପରେ ନଜର ରଖିବେ । କାରଣ ଦଳରେ ଟ୍ରେଭିସ୍ ହେଡ୍, ଆଡେନ ମାରକ୍ରମ, ହେନରିକ କ୍ଲାସେନଙ୍କ ଭଳି ବିସ୍ଫୋରକ ବ୍ୟାଟର ରହିଛନ୍ତି ।
ସମ୍ଭାବ୍ୟ
ନାଇଟ୍ ରାଇଡର୍ସ ଏକାଦଶ: ଭେଙ୍କଟେଶ ଆୟର, ଫିଲ ସଲ୍ଟ, ଶ୍ରେୟାସ ଆୟର(ଅଧିନାୟକ), ନିତିଶ ରାଣା, ରିଙ୍କୁ ସିଂହ, ଆନ୍ଦ୍ରେ ରସେଲ, ରମଣଦୀପ ସିଂହ, ସୁନିଲ ନରାଏନ, ମିଚେଲ ଷ୍ଟାର୍କ, ହର୍ଷିତ ରାଣା, ବରୁଣ ଚକ୍ରବର୍ତ୍ତୀ ।
ସନରାଇଜର୍ସ ଏକାଦଶ: ଅଭିଷେକ ଶର୍ମା/ମୟଙ୍କ ଅଗରୱାଲ୍, ଟ୍ରେଭିସ ହେଡ୍, ରାହୁଲ ତ୍ରିପାଠୀ, ଆଡେନ ମାରକ୍ରମ, ହେନରିକ କ୍ଲାସେନ, ଅବଦୁଲ ସମଦ, ୱାସିଂଟନ ସୁନ୍ଦର, ପ୍ୟାଟ୍ କମିନ୍ସ(ଅଧିନାୟକ), ଭୁବନେଶ୍ୱର କୁମାର, ମୟଙ୍କ ମାର୍କଣ୍ଡେ, ଉମ୍ରାନ ମଲିକ ।
