କୋଲକାତା, ୧୫ା୪(ଏଜେନ୍ସି): ଆଇପିଏଲ୍ ଲିଗ୍ ପର୍ଯ୍ୟାୟର ୬ରାଉଣ୍ଡ ଖେଳ ଶେଷ ହୋଇଛି । ସୀମିତ ସମୟ ମଧ୍ୟରେ ଅନେକ ରେକର୍ଡ ଭଙ୍ଗ ହୋଇ ସାରିଲାଣି । ବିଶାଳ ସ୍କୋର ଠାରୁ ଆରମ୍ଭ କରି ଆକାଶ ଚୁମ୍ବି ଛକା ଓ ନାଟକୀୟ ବିଜୟ ସବୁ ଦର୍ଶକଙ୍କ ମନ ମୋହିବାରେ ଲାଗିଛି । ଦୁଇ ମହାନ ତାରକା ବିରାଟ କୋହଲି ଓ ରୋହିତ ଶର୍ମାଙ୍କ ଶତକୀୟ ଇନିଂସ ଭାରତୀୟ କ୍ରିକେଟ୍ ପ୍ରେମୀଙ୍କୁ ମତୁଆଲା କରିଥିବାବେଳେ ରିଷଭ ପନ୍ତ, ମହେନ୍ଦ୍ର ସିଂହ ଧୋନିଙ୍କ ଭଳି ପ୍ରିୟ ଖେଳାଳିଙ୍କ ପ୍ରଦର୍ଶନ ଆଇପିଏଲ୍ର ରୋମାଞ୍ଚକୁ ଶିଖରରେ ପହଞ୍ଚାଇ ଦେଇଛି । ମାତ୍ର ଏତେ ସବୁ ଆନନ୍ଦ ମଧ୍ୟରେ କିଛି ତାରକା ଖେଳାଳିଙ୍କ ନୈରାଶ୍ୟଜନକ ପ୍ରଦର୍ଶନ ଦଳ ପାଇଁ ଚିନ୍ତାର କାରଣ ହୋଇଛି । ଗତ ନିଲାମରେ ବହୁ ଦାମରେ ବିକ୍ରି ହୋଇଥିବା କିଛି ଖେଳାଳିଙ୍କ ବିଫଳତା ଜାରି ରହିଛି ।
ଗ୍ଲେନ ମ୍ୟାକ୍ସୱେଲ୍: ଷ୍ଟାର୍ ଖେଳାଳି ମ୍ୟାକ୍ସୱେଲ୍ଙ୍କ ବିଫଳତା ରୟାଲ୍ ଚ୍ୟାଲେଞ୍ଜର୍ସ ପାଇଁ ଚିନ୍ତାର କାରଣ ହୋଇଛି । ମ୍ୟାକ୍ସୱେଲଙ୍କୁ ୧୧କୋଟି ଟଙ୍କା ମୂଲ୍ୟରେ କିଣିଥିଲା ରୟାଲ୍ ଚ୍ୟାଲେଞ୍ଜର୍ସ । ମାତ୍ର ତାଙ୍କ ବ୍ୟାଟ୍ରୁ ଏପର୍ଯ୍ୟନ୍ତ ଉପଯୋଗୀ ଇନିଂସଟିଏ ମଧ୍ୟ ଦେଖିବାକୁ ମିଳିନାହିଁ । ୬ଟି ମ୍ୟାଚ୍ରେ ସେ ଏପର୍ଯ୍ୟନ୍ତ ମାତ୍ର ୩୨ ରନ୍ କରିଛନ୍ତି । ୩ଟି ମ୍ୟାଚ୍ରେ ସେ ଖାତା ଖୋଲିପାରି ନାହାନ୍ତି । ଗତ ଦିନିକିଆ ବିଶ୍ୱକପ୍ରେ ମ୍ୟାକ୍ସୱେଲ୍ ଆଫଗାନିସ୍ତାନ ବିପକ୍ଷରେ ମ୍ୟାଚ୍ ବିଜୟୀ ଦ୍ୱିଶତକୀୟ ଇନିଂସ ଖେଳିଥିଲେ । ଏହି ବିଜୟ ଫଳରେ ଅଷ୍ଟ୍ରେଲିଆ ନକ୍ ଆଉଟ୍କୁ ଉନ୍ନୀତ ହୋଇଥିଲା ଓ ପରେ ଚାମ୍ପିଅନ୍ ହୋଇଥିଲା । ମ୍ୟାକ୍ସୱେଲ୍ ଏହି ଇନିଂସ ବଳରେ ଅଗଣିତ ପ୍ରଶଂସକ ସୃଷ୍ଟି କରିଥିଲେ । ଦର୍ଶକ ଏଥର ଆଇପିଏଲ୍ରେ ତାଙ୍କ ବ୍ୟାଟିଂ ଦେଖିବାକୁ ଅପେକ୍ଷା କରିଥିଲେ । ମାତ୍ର ତାଙ୍କ ବିଫଳତା ରୟାଲ୍ ଚ୍ୟାଲେଞ୍ଜର୍ସ ପାଇଁ ଚିନ୍ତାର କାରଣ ହୋଇଛି ।
ଆନରିଚ ନର୍ଜ: ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଖେଳୁଥିବା ଦକ୍ଷିଣ ଆଫ୍ରିକାର ଏହି ଫାଷ୍ଟ ବୋଲର ଏପର୍ଯ୍ୟନ୍ତ ସଫଳ ହେଇପାରି ନାହାନ୍ତି । ସେ ଏପର୍ଯ୍ୟନ୍ତ ୪ଟି ମ୍ୟାଚ୍ ଖେଳି ୬ଟି ୱିକେଟ୍ ନେଇଛନ୍ତି ଓ ପ୍ରଦାନ କରିଛନ୍ତି ୨୧୫ ରନ୍ । ତାଙ୍କ ବିଫଳତା ଯୋଗୁଁ ଦିଲ୍ଲୀ କ୍ୟାପିଟାଲ୍ସ ପରାଜୟର ସାମ୍ନା କରିଛି । ନର୍ଜଙ୍କୁ ୬.୫କୋଟି ଟଙ୍କା ମୂଲ୍ୟରେ କିଣିଥିଲା ଦିଲ୍ଲୀ କ୍ୟାପିଟାଲ୍ସ । ମାତ୍ର ସେ ଏହାର ମୂଲ୍ୟ ରଖିନାହାନ୍ତି ।
କାମେରନ ଗ୍ରୀନ: ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ୧୭.୫କୋଟି ଟଙ୍କା ମୂଲ୍ୟରେ କାମେରନ ଗ୍ରୀନଙ୍କୁ ମୁମ୍ବାଇ ଇଣ୍ଡିଆନ୍ସ ଠାରୁ ଟ୍ରେଡ୍ କରିଥିଲା । ସେ ମଧ୍ୟ ଦକ୍ଷତା ମୁତାବକ ପ୍ରଦର୍ଶନ କରିବାରେ ବିଫଳ ହୋଇଛନ୍ତି । ୫ଟି ମ୍ୟାଚ୍ରେ ସେ ୬୮ ରନ୍ ସଂଗ୍ରହ କରିଛନ୍ତି । ତାଙ୍କ ପ୍ରଦର୍ଶନ ରୟାଲ୍ ଚ୍ୟାଲେଞ୍ଜର୍ସ ଦଳକୁ ପ୍ରଭାବିତ କରିଛି ।
ଜନି ବେୟାରଷ୍ଟୋ: ବେୟାରଷ୍ଟୋ ମଧ୍ୟ ପଞ୍ଜାବ କିଙ୍ଗ୍ସକୁ ନିରାଶ କରିଛନ୍ତି । ସେ ଇତି ମଧ୍ୟରେ ୬ଟି ମ୍ୟାଚ୍ ଖେଳି ମାତ୍ର ୯୬ ରନ୍ ସଂଗ୍ରହ କରିଛନ୍ତି । ଲକ୍ଷେ୍ନø ସୁପରଜାଏଣ୍ଟ୍ସ ବିପକ୍ଷରେ ୪୨ ରନ୍ର ଏକ ଇନିଂସ ଖେଳିଥିଲେ । ବାକି ମ୍ୟାଚ୍ ଗୁଡ଼ିକରେ ସେ ବିଫଳ ହୋଇଛନ୍ତି । ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ୯ ରନ୍ କରିଥିବାବେଳେ ରୟାଲ ଚ୍ୟାଲେଞ୍ଜର୍ସ ବିପକ୍ଷରେ ୮ ରନ୍, ଗୁଜରାଟ ଟାଇଟନ୍ସ ବିପକ୍ଷରେ ୨୨ ରନ୍ ଓ ରାଜସ୍ଥାନ ରୟାଲ୍ସ ବିପକ୍ଷରେ ୧୫ ରନ୍ କରିଥିଲେ । ସନରାଇଜର୍ସ ବିପକ୍ଷରେ ସେ ଖାତା ଖୋଲିପାରି ନଥିଲେ ।
ଦେବଦତ୍ତ ପାଡ଼ିକଲ: ଦେବଦତ୍ତ ପାଡ଼ିକଲ ଗତ ବର୍ଷ ରାଜସ୍ଥାନ ରୟାଲ୍ସ ପକ୍ଷରୁ ଖେଳିଥିଲେ । ତାଙ୍କୁ ଏଥର ଲକ୍ଷ୍ନୌ ସୁପରଜାଏଣ୍ଟ୍ସ ୭.୭୫ କୋଟି ଟଙ୍କାରେ ଟ୍ରେଡ୍ କରିଥିଲା । ସେ ମଧ୍ୟ ଦକ୍ଷତା ମୁତାବକ ପ୍ରଦର୍ଶନ କରିବାରେ ବିଫଳ ହୋଇଛନ୍ତି । ୫ଟି ମ୍ୟାଚ୍ ଖେଳି ସେ ୨୫ ରନ୍ ସଂଗ୍ରହ କରିଛନ୍ତି । ଏପର୍ଯ୍ୟନ୍ତ ସେ ଦୁଇ ଅଙ୍କରେ ପହଞ୍ଚି ପାରିନାହାନ୍ତି । ରାଜସ୍ଥାନ ରୟାଲ୍ସ ବିପକ୍ଷ ପ୍ରଥମ ମ୍ୟାଚ୍ରେ ସେ ଖାତା ଖୋଲିବାରେ ବିଫଳ ହୋଇଥିଲେ । ଏହାପରେ ସେ ପଞ୍ଜାବ କିଙ୍ଗ୍ସ ବିପକ୍ଷରେ ୯, ରୟାଲ୍ ଚ୍ୟାଲେଞ୍ଜର୍ସ ବିପକ୍ଷରେ ୬, ଗୁଜରାଟ ଟାଇଟନ୍ସ ବିପକ୍ଷରେ ୭ ଓ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ୩ ରନ୍ କରିଥିଲେ ।