ନୂଆଦିଲ୍ଲୀ,୨୬/୦୯: ଇଟାଲି ପ୍ରଧାନମନ୍ତ୍ରୀ ଜର୍ଜିଆ ମେଲୋନି ଓ ଅରବପତି ଏଲନ ମସ୍କଙ୍କୁ ନେଇ ଚର୍ଚ୍ଚା । ଉଭୟଙ୍କ ଡେଟିଂକୁ ନେଇ ସୋସିଆଲ ମିଡିଆରେ ଉଠିଛି ଗୁଜବ । ନିକଟରେ ଯୋଗ ଦେଇଥିବା ଏକ କାର୍ଯ୍ୟକ୍ରମରେ ଦୁହିଁଙ୍କର ଏକ ଫଟୋ ଭାଇରାଲ ହେବା ପରଠୁ ସେମାନେ ପରସ୍ପରକୁ ଡେଟ୍‌ କରୁଥିବା ନେଇ ଚର୍ଚ୍ଚା ଜୋର ଧରିଛି । ଗତ ମଙ୍ଗଳବାର ନ୍ୟୁୟର୍କରେ ଅନୁଷ୍ଠିତ ଏକ ସମାରୋହରେ ମସ୍କ ଓ ମେଲୋନି ଯୋଗ ଦେଇଥିଲେ । ଏ ଅବସରରେ ମସ୍କ ମେଲୋନିଙ୍କୁ ଖୁବ୍‌ ପ୍ରଶଂସା କରିଥିଲେ । କାର୍ଯ୍ୟକ୍ରମରେ ମସ୍କ ମେଲୋନିଙ୍କୁ ଆଟ୍‌ଲାଣ୍ଟିକ୍‌ କାଉନ୍‌ସିଲ ଗ୍ଲୋବାଲ ସିଟିଜେନ୍‌ ସମ୍ମାନ ପ୍ରଦାନ କରିଥିଲେ । 

ଏଥିସହିତ କହିଥିଲେ ‘ବାହ୍ୟ ସୌନ୍ଦର୍ଯ୍ୟ ତୁଳନାରେ ଆନ୍ତରିକ ସୌନ୍ଦର୍ଯ୍ୟର ଅଧିକାରିଣୀ ଭାବେ ଜଣେ ସୁନ୍ଦର ବ୍ୟକ୍ତିତ୍ୱଙ୍କୁ ସମ୍ମାନିତ କରିବା ବାସ୍ତବରେ ସମ୍ମାନାସ୍ପଦ । ଜର୍ଜିଆ ମେଲୋନିଙ୍କୁ ମୁଁ ପ୍ରଶଂସା କରେ । ଇଟାଲିର ପ୍ରଧାନମନ୍ତ୍ରୀ ଭାବେ ସେ ଉଲ୍ଲେଖଯୋଗ୍ୟ କାର୍ଯ୍ୟ କରିଛନ୍ତି । ସେ ଏଭଳି ଜଣେ ବ୍ୟକ୍ତିତ୍ୱ ଯିଏ ସଚ୍ଚୋଟ ଓ ସତ୍ୟବାଦୀ, ଯାହା ରାଜନେତାଙ୍କ ବିଷୟରେ ସର୍ବଦା କୁହାଯାଇ ନ ଥାଏ ।’ ମସ୍କଙ୍କର ପ୍ରଶଂସା ନିମନ୍ତେ ମେଲୋନି ସୋସିଆଲ ମିଡିଆ ପ୍ଲାଟ୍‌ଫର୍ମ ଏକ୍ସରେ ତାଙ୍କୁ ଧନ୍ୟବାଦ ଜଣାଇଛନ୍ତି । ଏହା ପରେ ଟେସ୍‌ଲା ଫ୍ୟାନ୍‌ କ୍ଲବ୍‌ ମସ୍କ ଓ ମେଲୋନିଙ୍କର ଏକ ଫଟୋ ପୋଷ୍ଟ୍‌ କରି ଲେଖିଲା ‘ଆପଣ ଭାବୁଛନ୍ତି କି ସେମାନେ ଡେଟ୍‌ କରିବେ?’ ୫୩ ବର୍ଷୀୟ ଅରବପତି ମସ୍କ ଏହି ପୋଷ୍ଟ୍‌ର ପ୍ରତିକ୍ରିୟାରେ ଲେଖିଛନ୍ତି ‘ଆମେ ଡେଟିଂ କରୁନାହୁଁ ।’ ଗଣମାଧ୍ୟମର ରିପୋର୍ଟ ଅନୁସାରେ, ୟୁରୋପୀୟ ସଂଘ ପ୍ରତି ଦୃଢ଼ ସମର୍ଥନ ପାଇଁ ମେଲୋନିଙ୍କୁ ଏହି ସମ୍ମାନରେ ସମ୍ମାନିତ କରାଯାଇଛି । ଜାତିସଂଘ ସାଧାରଣ ସଭାର ବାର୍ଷିକ ଉଚ୍ଚ ସ୍ତରୀୟ ବୈଠକ ନିମନ୍ତେ ଯୋଗ ଦେଇଥିବା ୧୯୦ରୁ ଅଧିକ ଦେଶର ନେତାଙ୍କ ସହିତ ମେଲୋନି ନ୍ୟୁୟର୍କରେ ଯୋଗ ଦେଇଥିଲେ ।