ଭୁବନେଶ୍ୱର,୧୪/୦୯: ଓଡ଼ିଶା ଏଫ୍ସି ଚଳିତ ଆଇଏସ୍ଏଲ୍-୧୧ରେ କଳିଙ୍ଗ ଷ୍ଟାଡିୟମରୁ ସିଜନ ଆରମ୍ଭ କରିବାକୁ ଯାଉଛି । ଶନିବାର ଦଳ ପ୍ରଥମ ଘରୋଇ ମ୍ୟାଚ୍ରେ ଚେନ୍ନାଇନ ଏଫ୍ସିକୁ ଭେଟିବ। ମ୍ୟାଚ୍ ଅପରାହ୍ଣ ୫ଟାରୁ ଆରମ୍ଭ ହେବ । ଗତ ସଂସ୍କରଣରେ ଓଡ଼ିଶା ଉନ୍ନତ ପ୍ରଦର୍ଶନ କରିଥିଲା। ଶେଷରେ ସେମି ଫାଇନାଲରୁ ଦଳ ବିଦାୟ ନେଇଥିଲା। ଗ୍ରୁପ୍ ପର୍ଯ୍ୟାୟରେ ଚତୁର୍ଥ ସ୍ଥାନରେ ରହି ନକ୍ ଆଉଟ୍କୁ ଉନ୍ନୀତ ହୋଇଥିଲା । କୋଚ୍ ସର୍ଜିଓ ଲୋବେରାଙ୍କ ନେତୃତ୍ୱରେ ଦଳ ଭଲ ପ୍ରଦର୍ଶନ କରିଥିଲା। ଚଳିତ ସିଜନରେ ମଧ୍ୟ ଲୋବେରା ଦଳ ସହ ରହିଛନ୍ତି । ଏଥର ଦଳ ପୂର୍ବାପେକ୍ଷା ଆହୁରି ଭଲ ପ୍ରଦର୍ଶନ କରିବାକୁ ନେଇ ଜୋରଦାର ପ୍ରସ୍ତୁତି ମଧ୍ୟ କରିଛି ।
ଚେନ୍ନାଇନ ଏଫ୍ସି ଗତ ସଂସ୍କରଣରେ ଗ୍ରୁପ୍ରେ ଷଷ୍ଠ ସ୍ଥାନରେ ରହି ନକ୍ ଆଉଟ୍ରେ ପ୍ରବେଶ କରିଥିଲା । ମାତ୍ର ଗୋଆ ଠାରୁ ପରାଜିତ ହୋଇ ଦଳ ବିଦାୟ ନେଇଥିଲା । ଉଭୟ ଦଳ ଏଥର ସିଜନ ଆରମ୍ଭରୁ ଭଲ ପ୍ରଦର୍ଶନ କରିବା ନେଇ ଲକ୍ଷ୍ୟ ରଖିଛନ୍ତି । ଘରୋଇ ଗ୍ରାଉଣ୍ଡରେ ଓଡ଼ିଶା ଏଫ୍ସି ବେଶ ଶକ୍ତିଶାଳୀ । ପୂର୍ବରୁ ଦଳ ଚେନ୍ନାଇନକୁ ତା’ର ୩ଟି ଯାକ ଘରୋଇ ମ୍ୟାଚ୍ରେ ପରାଜିତ କରିଛି । ତେଣୁ ଏଥର ମଧ୍ୟ ଦଳ ବିଜୟ ପାଇଁ ଦାବିଦାର ରହିଛି ।
ଓଡ଼ିଶା ଏଫ୍ସି କୋଚ୍ ଲୋବେରା କହିଛନ୍ତି, ‘୨୦୧୭ରୁ ଆଇଏସ୍ଏଲ୍ ସହ ରହି ଆସିଛି । ପ୍ରତି ବର୍ଷ ଲିଗରେ ଉନ୍ନତି ଘଟୁଛି । ପ୍ରତି ଦଳ ପ୍ରତି ସଂସ୍କରଣରେ ଶ୍ରେଷ୍ଠ ପ୍ରଦର୍ଶନ କରୁଛନ୍ତି । ଭଲ ଭଲ ବିଦେଶୀ ଖେଳାଳି ଆସୁଛନ୍ତି । ଭାରତୀୟ ଖେଳାଳିମାନେ ମଧ୍ୟ ଭଲ ପ୍ରଦର୍ଶନ କରୁଛନ୍ତି । ତେଣୁ ପ୍ରତ୍ୟେକ ମ୍ୟାଚ୍ ଚିତାକର୍ଷକ ହେଉଛି । ମୁଁ ଭାବୁଛି ଏ ସିଜନ ମଧ୍ୟ ଆମ ପାଇଁ ଚମକପ୍ରଦ ରହିବ । ଏକାଧିକ ଶକ୍ତିଶାଳୀ ଦଳ ଏଥର ରହିଛନ୍ତି । ଆଶା ସେମାନଙ୍କ ବିପକ୍ଷରେ ଆମେ ଆମର ଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରୟାସ କରିବୁ ।’
