ଭୁବନେଶ୍ୱର,୨୪/୦୫: ଭାଇ ପଠାଇଛନ୍ତି... । ତମର ଭଲ ବେପାର ରହୁଛି । ୫ ଦିଅ ନ ହେଲେ ୫୦ ପେଟି ମଦ ଦିଅ । ଯଦି ନ ଦେବ ଇଲେକ୍ସନ୍ ପରେ ଯାହା ହେବ ତମେ ସମ୍ଭାଳିବ ଆଉ... । ରାଜଧାନୀ ଓ ତାର ଉପକଣ୍ଠରେ ଥିବା ଠିପି ବନ୍ଦ ମଦ ଦୋକାନୀଙ୍କୁ ଏମିତି ଧମକ ଦେଇ ମଦ, ଟଙ୍କା ମାଗୁଛନ୍ତି ପ୍ରାର୍ଥୀଙ୍କ ସହଯୋଗୀ । ଦୋକାନୀ ମଧ୍ୟ କାନମୁଣ୍ଡ ଆଉଁସି ସେମାନଙ୍କ କୁଜି ନେତାଙ୍କ ଦାବି ମାନିଯାଉଛନ୍ତି ।
ଭୁବନେଶ୍ୱରରେ ୫୦ରୁ ଅଧିକ ଠିପି ବନ୍ଦ ମଦ ଦୋକାନ ରହିଛି । ନିର୍ବାଚନ ପାଇଁ ବିଭିନ୍ନ ଦଳର ପ୍ରାର୍ଥୀମାନେ ସେମାନଙ୍କ ନିର୍ବାଚନମଣ୍ଡଳୀରେ ଥିବା ମଦ ଦୋକାନଗୁଡିକୁ ତାଙ୍କ ଖାସ୍ ସହଯୋଗୀଙ୍କୁ ପଠାଉଛନ୍ତି । ୫ ଲକ୍ଷ ଟଙ୍କା ନ ହେଲେ ୫୦ ପେଟି ମଦ ମାଗୁଛନ୍ତି । ଦୋକାନୀ ଡରି ମରି ଟଙ୍କା ବଦଳରେ ମଦ ଦେଉଛନ୍ତି । ଯଦି କୌଣସି ଦୋକାନୀ ୩୦ ପେଟିରୁ କମ୍ ମଦ ଦେଉଛନ୍ତି ତା’ହେଲେ ପ୍ରାର୍ଥୀଙ୍କ ସହଯୋଗୀ ମଦ ନେଉ ନାହାନ୍ତି ।
ସବୁଠାରୁ ଆଶ୍ଚାର୍ଯ୍ୟ କଥା ହେଲା ଯଦି କୌଣସି ଦୋକାନୀ ଦେବାକୁ ମନା କରୁଛନ୍ତି, ଏମାନେ ଧମକ ଦେଉଛନ୍ତି ନିର୍ବାଚନ ସରିଲେ ତମ ଦୋକାନ ଆଗରେ ମହିଳାଙ୍କୁ ଲଗାଇ ଧାରଣ ଦେବୁ । ୫ ଦିନ ଧାରଣା ଦେଲେ କେତେ କ୍ଷତି ହେବ ସେତେବେଳେ ଜାଣିପାରିବ। ଭୟରେ ଦୋକାନୀମାନେ ସେମାନଙ୍କ ଦାବି ମାନି ନେଉଥିବା କିଛି ମଦ ଦୋକାନୀ କହିଛନ୍ତି।