ମାଲକାନଗିରି, ୩୦/୮ : ମାଲକାନଗିରି ଜିଲ୍ଲା ଖଇରପୁଟ ବ୍ଲକସ୍ଥ ମୁଦୁଲିପଡା ବଣ୍ଡା ଘାଟିର ଆଦିମ ବଣ୍ଡା ଜନଜାତି ସମ୍ପ୍ରଦାୟର ଯୁବକ ମଙ୍ଗଳା ମୁଦୁଲି ଡାକ୍ତରୀ ପାଠ ପଢିବା ପାଇଁ ନିଟ ପରୀକ୍ଷାରେ ଭଲ ରାଙ୍କ ରଖି ସଫଳ ହୋଇଥିବାରୁ ତାଙ୍କୁ ମାଲକାନଗିରି ବିଧାୟକ ନରସିଂହ ମାଡକାମୀ ଭେଟି ଶୁଭେଛା ଜଣାଇଛନ୍ତି । 

ଏଭଳି କୃତିତ୍ୱ ହାସଲ କରିଥିବା ଡାକ୍ତର ଛାତ୍ର ମଙ୍ଗଳାଙ୍କୁ ଭୁବନେଶ୍ବରରେ ଭେଟି ଶୁଭେଚ୍ଛା ଜଣାଇବା ସହ ଆଗାମୀ ଦିନରେ ସେ ଜଣେ ଉତ୍ତମ ଡାକ୍ତର ହୋଇ ନିଜ ଅଞ୍ଚଳର ଓ ଜିଲ୍ଲାର ନାମ ରଖିବା ପାଇଁ ବିଧାୟକ ଶ୍ରୀ ମାଡକାମୀ ତାଙ୍କୁ ଉତ୍ସାହିତ କରିଥିଲେ । 

ତେବେ କେବଳ ଏତିକି ନୁହେଁ ବଣ୍ଡା ଯୁବକ ମଙ୍ଗଳାର ଆଗାମୀ ଦିନରେ ପାଠ ପଢାରେ ସହଯୋଗ କରିବା ସହ ଖର୍ଚ୍ଚ ବହନ କରିବେ ବୋଲି ମାଲକାନଗିରି ବିଧାୟକ ଶ୍ରୀ ମାଡକାମୀ ପ୍ରତିଶ୍ରୁତି ଦେଇଛନ୍ତି । ଗୁରୁବାର ବଣ୍ଡା ଡାକ୍ତର ଛାତ୍ର ମଙ୍ଗଳାଙ୍କୁ ଭୁବନେଶ୍ୱରଠାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଲାପଟପ ଉପହାର ସହ ତାଙ୍କ ଉଜ୍ଜ୍ବଳ ଭବିଷ୍ୟତ କାମନା କରି ପୁଷ୍ପ ଗୁଚ୍ଛ ଓ ଉତ୍ତରୀୟ ପ୍ରଦାନ କରି ସମ୍ବର୍ଦ୍ଧିତ କରିଥିଲେ ।