ପ୍ରୟାଗରାଜ : ଜଣେ ବ୍ୟକ୍ତିଙ୍କ ଜୀବନ ମୃତ୍ୟୁ ମୁଖରୁ ଫେରି ଆସିଛି। ଯାହାକି ସେ ଅଳ୍ପକେ ବର୍ତ୍ତି ଯାଇଛନ୍ତି। ଏମିତି ଏକ ଆଶ୍ଚର୍ଯ୍ୟକର ଖବର ଉତ୍ତର ପ୍ରଦେଶର ପ୍ରୟାଗରାଜରୁ ସାମନାକୁ ଆସିଛି। ଜଣେ ବ୍ୟକ୍ତି ରେଲୱେ ଟ୍ରାକ୍ରେ ଛତା ଲଗେଇ ନିଘୋଡ଼ ନିଦରେ ଶୋଇ ଯାଇଥିଲେ। ସୌଭାଗ୍ୟର କଥା ଏହା କି, ଲୋକଟି ଟ୍ରାକ୍ରେ ଶୋଇ ଥିବାର ଲୋକୋ ପାଇଲଟ ଦେଖି ଟ୍ରେନ୍ର ବ୍ରେକ୍ ମାରି ଦେଇଥିଲେ। ଯାହା ଫଳରେ ଲୋକଟିର ଜୀବନ ବଞ୍ଚି ଯାଇଥିଲା।
ସୋସିଆଲ ମିଡ଼ିଆରେ ଏକ ଭିଡ଼ିଓ ଖୁବ୍ ଜୋରରେ ଭାଇରାଲ ହେଉଛି। ଏଥିରେ ଦେଖିବାକୁ ମିଳୁଛି ଗୋଟିଏ ଟ୍ରେନ୍ ଠିଆ ହୋଇଛି ଏବଂ ଏହା ସାମନାରେ ଜଣେ ବ୍ୟକ୍ତି ଛତା ଲଗେଇ ଶୋଇବାର ନଜର ଆସୁଛି। ଲୋକୋ ପାଇଲଟ ତାଙ୍କୁ ନିଦରୁ ଉଠାଇ ଟ୍ରେନ୍କୁ ଆଗକୁ ନେଉଛନ୍ତି। ଏହାକୁ ନେଇ ସୋସିଆଲ ମିଡ଼ିଆରେ ଖୁବ୍ ପ୍ରତିକ୍ରିୟା ଆସୁଛି। ଲୋକେ ଭିଡ଼ିଓ ସେୟାର କରି ବିଭିନ୍ନ ପ୍ରକାରର ପ୍ରଶ୍ନ କରୁଛନ୍ତି । କହୁଛନ୍ତି ଟ୍ରେନ୍ର ଟ୍ରାକ୍ ମଝିରେ ଏତେ ଆରାମରେ କିଏ ଶୋଇପାରେ ? ଏହି ବ୍ୟକ୍ତିଙ୍କୁ ଜୀବନ ପ୍ରତି ଟିକିଏ ବି ଚିନ୍ତା ନାହିଁ।
ଲାଇଭ୍ ହିନ୍ଦୁସ୍ତାନୀରେ ପ୍ରକାଶିତ ରିପୋର୍ଟ ମୁତାବିକ ,ଏହି ଭାଇରାଲ ଭିଡ଼ିଓ ପ୍ରୟାଗରାଜର ମଉଆଇମା ରେଲୱେ କ୍ରସିଂ ପାଖର ଥିବା କୁହାଯାଉଛି। ଗୁରୁବାର ଦ୍ୱିପ୍ରହରରେ ଏକ ଟ୍ରେନ୍ ପ୍ରୟାଗରାଜରୁ ମଉଆଇମା ମଧ୍ୟ ଦେଇ ପ୍ରତାପଗଡ଼ ଅଭିମୁଖେ ଯାଉଥିଲା। ଯେବେ ଟ୍ରେନ୍ ରେଲୱେ କ୍ରସିଂ ପାଖ ଦେଇ ଫ୍ଲାଇଓଭର ପାଖରେ ପହଞ୍ଚିଲା ତ ଲୋକୋ ପାଇଲଟ ଜଣେ ବ୍ୟକ୍ତିଙ୍କୁ ଟ୍ରାକ୍ରେ ଶୋଇ ଥିବାର ଦେଖି ଥିଲେ। ଡ୍ରାଇଭର ସମୟ ପୂର୍ବରୁ ଟ୍ରେନ୍ ରୋକି ତାଙ୍କ ପାଖରେ ପହଞ୍ଚି ଗଲେ। ସେଠାରେ ବ୍ୟକ୍ତି ଜଣଙ୍କ କାମରେ କ୍ଲାନ୍ତ ହୋଇ ରେଲୱେ ଟ୍ରାକ୍ରେ ତଉଲିଆ ବିଛେଇ ଛତା ଲଗେଇ ଶୋଇ ଯାଇ ଥିଲେ।
ଡ୍ରାଇଭର ତାଙ୍କୁ ଟ୍ରାକ୍ରୁ ଉଠାଇ ଥିଲେ। ତାପରେ ଟ୍ରେନ୍ ନେଇ ଚାଲି ଯାଇ ଥିଲେ। ସେପଟେ ଏହି ମାମଲାରେ ମଉଆଇମା ରେଲୱେ ଷ୍ଟେସନ ଅଧିକ୍ଷକଙ୍କର କହିବା ହେଲା କି, ତାଙ୍କୁ ଏହି ମାମଲାରେ କୌଣସି ସୂଚନା ନାହିଁ। ଏହାସହ ରେଲୱେ ଟ୍ରାକ୍ରେ ଶୋଇଥିବା ବ୍ୟକ୍ତିଙ୍କର ମଧ୍ୟ ପରିଚୟ ମିଳି ନାହିଁ।
