ପୁରୀ,୦୪/୧୨: ନାବାଳିକାକୁ ଦୁଷ୍କର୍ମ କରି ବନ୍ଧାହେଲେ ଜଣେ ଜେଲ୍‌ ଫେରନ୍ତା ବାବାଜୀ । ଅଭିଯୁକ୍ତ ବାବାଜୀ ଜଣକ ବଳିଆପଣ୍ଡା ଥାନା ଅଧୀନ ରାଘବମହାରାଜ୍‌ ଲେନ୍‌ର ଅଭୟ ଦାସ  (୫୦) । ଜଣେ ନାବାଳିକାକୁ ଦୁଷ୍କର୍ମ  କରି ଗର୍ଭବତୀ କରିବା ଅଭିଯୋଗରେ ବଳିଆପଣ୍ଡା ଥାନା ପୁଲିସ ତାକୁ ଗିରଫ  କରିଛି । ରବିବାର ତାକୁ କୋର୍ଟ ଚାଲାଣ  କରାଯାଇଛି । ଜାମିନ୍‌ ନାମଞ୍ଜୁର ହେବାରୁ ତାକୁ ଜେଲ୍‌ ପଠାଇ ଦିଆଯାଇଛି । 

ଅଭିଯୋଗ ହୋଇଛି ଯେ, ୧୭ ବର୍ଷିୟା ନାବାଳିକାକୁ ଅଭୟ ଭୟଭୀତ କରାଇଥିଲା । ଶାରୀରୀକ ସମ୍ପର୍କ ନରଖିଲେ ପରିବାର ଲୋକଙ୍କୁ ହତ୍ୟା କରିବ ବୋଲି ଧମକ ଦେଇଥିଲା । ୫୦ ବର୍ଷିୟ ବାବାଜୀ ଜଣକ ନାବାଳିକାକୁ ଦୀର୍ଘଦିନ ଧରି ଦୁଷ୍କର୍ମ କରି ଆସୁଥିଲେ ବୋଲି ଅଭିଯୋଗ ହୋଇଛି । ନାବାଳିକା ଏବେ ୯ ମାସର ଗର୍ଭବତୀ ।  ଏ ସମ୍ପର୍କରେ ନାବାଳିକାର ପରିବାର ଲୋକେ କେହି ଜାଣି ପାରିନଥିଲେ । ଜଣାପଡ଼ିବା ପରେ ଏନେଇ ଥାନାରେ  ଏତଲା ଦେଇଥିଲେ ପରିବାର ଲୋକେ । ପୁଲିସ ଏହି ଅଭିଯୋଗକୁ ଭିତ୍ତି କରି ଦଫା ୩୭୬, ୫୦୬ ଆଇପିସି  ଓ ୬ ପୋକ୍‌ସୋ ଆକ୍ଟ ବଳରେ ମାମଲା  (୧୮୬/୨୬) ରୁଜୁ କରିଥିଲା । ପୂର୍ବରୁ  ଅଭୟ ଜଣେ ବ୍ୟକ୍ତିଙ୍କୁ ଗରମ ତେଲ  ଫିଙ୍ଗି ହତ୍ୟା ଉଦ୍ୟମ କରିଥିବା ପୁଲିସ  କହିଛି । ଏହି ମାମଲାରେ ସେ ଜେଲ୍‌  ଯାଇ ଜାମିନ୍‌ରେ ଫେରିଥିଲା ବୋଲି  କହିଛନ୍ତି ଆଇଆଇସି ସସ୍ମିତା ବେହେରା ।