ମୁମ୍ବାଇ,୧୦/୦୫: କେରଳର ବରିଷ୍ଠ ଫିଲ୍ମ ନିର୍ମାତା ତଥା ନିର୍ଦ୍ଦେଶକ ସଙ୍ଗୀତ ଶିବନଙ୍କର ଦେହାନ୍ତ ଘଟିଛି । ତାଙ୍କୁ ୬୫ ବର୍ଷ ବୟସ ହୋଇଥିଲା । ସେ କିଛିଦିନ ହେଲା ପରିସ୍ରା ସଂକ୍ରମଣରେ ପୀଡିତ ଥାଇ ମୁମ୍ବାଇର କୋକିଳା ବେନ ଧିରୁଭାଇ ଅମ୍ବାନି ହସ୍ପିଟାଲରେ ଚିକିତ୍ସିତ ହେଉଥିଲେ । ଚିକିତ୍ସାଧୀନ ଅବସ୍ଥାରେ ବୁଧବାର ହୃଦ୍‌ଘାତରେ ତାଙ୍କର ମୃତ୍ୟୁ ଘଟିଛି । 

ଗୁରୁବାର ଅପରାହ୍ନ ୪ଟାରେ ମୁମ୍ବାଇର ଓଶିୱାରା ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି । ମୋହନଲାଲଙ୍କ ସହ ସେ ଅନେକ ମାଲାୟାଲମ ଫିଲ୍ମ କରିଛନ୍ତି । ଏଥିସହ ସେ ଜୋର, କ୍ୟା କୁଲ୍‌ ହୈ ହମ୍‌, ୟମଲା ପଗଲା ଦିୱାନା-୨, ଅପନା ସପନା ମନି ମନି ଭଳି ଅନେକ ହିନ୍ଦୀ ଫିଲ୍ମର ନିର୍ଦ୍ଦେଶନା ଦେଇଛନ୍ତି । ସଙ୍ଗୀତ ଶିବନ ହେଉଛନ୍ତି ବିଶିଷ୍ଟ ଫଟୋଗ୍ରାଫର ତଥା ସିନେମାଟୋଗ୍ରାଫର ଶିବନଙ୍କ ବଡପୁଅ । ତାଙ୍କ ପରଲୋକରେ ବହୁ କଳାକାର ଶୋକ ପ୍ରକାଶ କରିଛନ୍ତି ।