ମୁମ୍ବାଇ ୧୧/୦୬: ନରେନ୍ଦ୍ର ମୋଦି ତୃତୀୟ ଥର ପାଇଁ ଭାରତର ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ଗତ ରବିବାର ସନ୍ଧ୍ୟା ୭ଟା ୧୫ରେ ରାଷ୍ଟ୍ରପତି ଭବନରେ ଆୟୋଜିତ ଭବ୍ୟ ସମାରୋହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୋଦିଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ଏହି ଭବ୍ୟ ସମାରୋହରେ ମୋଦିଙ୍କ ସମେତ ୭୧ ଜଣ ସଦସ୍ୟ ତାଙ୍କ ମନ୍ତ୍ରିମଣ୍ଡଳରେ ସ୍ଥାନ ପାଇଛନ୍ତି । ଏ ଅବସରରେ ବହୁ ବିଦେଶୀ ରାଷ୍ଟ୍ରାଧ୍ୟକ୍ଷ, ମାନ୍ୟଗଣ୍ୟ ବ୍ୟକ୍ତି, ଉଦ୍ୟୋଗପତି ଓ ସିନେ ତାରକା ଯୋଗ ଦେଇଥିଲେ । କିନ୍ତୁ ବିନା ଆମନ୍ତ୍ରଣରେ ଜଣେ ଅତିଥିଙ୍କୁ ଦେଖିବାକୁ ମିଳିଛି ରାଷ୍ଟ୍ରପତି ଭବନରେ । ତାଙ୍କ ଉପସ୍ଥିତିକୁ କ୍ୟାମେରାରେ କଏଦ କରାଯାଇଛି । ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।
ଗତ ରବିବାର ଶପଥ ଗ୍ରହଣ ଉତ୍ସବରେ ବିଜେପି ସାଂସଦ ଦୁର୍ଗା ଦାସ ଶପଥ ପାଠ କରିବା ପରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଅଭିବାଦନ ଜଣାଉଥିଲେ । ଠିକ୍ ଏହି ସମୟରେ ତାଙ୍କ ପଛରେ ଏକ ଜନ୍ତୁ ଯାଉଥିବା ଦେଖାଗଲା । ଏହି ଦୃଶ୍ୟ କ୍ୟାମେରାରେ କଏଦ ହେବା ପରେ ତାକୁ ନେଇ ଇଣ୍ଟରନେଟ୍ରେ ଚର୍ଚ୍ଚା ଜୋର ଧରିଛି । ଜନ୍ତୁର ଲମ୍ବା ଲାଞ୍ଜ ଓ ଚାଲିରୁ ତାହା ଚିତାବାଘ ବୋଲି ଜଣାପଡୁଛି । ସୋସିଆଲ ମିଡିଆ ୟୁଜର ବି ଏହାକୁ ଚିତାବାଘ ବୋଲି ଅନୁମାନ କହୁଛନ୍ତି ।
Can you spot something unusual happening here?
— Sneha Mordani (@snehamordani) June 10, 2024
An animal, allegedly a leopard, was spotted walking at the Rashtrapati Bhavan.
This happened when MP Durga Das was carrying out official procedures on stage. pic.twitter.com/GcH8buYFPF
ତେବେ ରାଷ୍ଟ୍ରପତି ଭବନରେ ଏଭଳି ଭୟଙ୍କର ଜନ୍ତୁ ଖୋଲାରେ ବୁଲିବାର ଦୃଶ୍ୟ ଅନେକଙ୍କୁ ଦ୍ୱନ୍ଦ୍ୱରେ ପକାଇଥିବା ବେଳେ ଭିଡିଓକୁ ନେଇ ଦିଲ୍ଲୀ ପୁଲିସର ଔପଚାରିକ ବୟାନ ସାମ୍ନାକୁ ଆସିଛି । ଏଥିରେ ସ୍ପଷ୍ଟ ହୋଇଛି ‘ରାଷ୍ଟ୍ରପତି ଭବନରେ କୌଣସି ଜଙ୍ଗଲି ଜନ୍ତୁ ନାହାନ୍ତି । ତାହା ଏକ ପୋଷା ବିଲେଇର ଦୃଶ୍ୟ । ରାଷ୍ଟ୍ରପତି ଭବନରେ କେବଳ ପୋଷା କୁକୁର ନୁହେଁ, ବିଲେଇ ମଧ୍ୟ ଅଛନ୍ତି । ଭିଡିଓକୁ ନେଇ ଭାଇରାଲ ହେଉଥିବା ତଥ୍ୟରେ ଆଦୌ ସତ୍ୟତା ନାହିଁ । ଏଭଳି ଗୁଜବ ଉପରେ ଧ୍ୟାନ ଦିଅନ୍ତୁ ନାହିଁ ।’
