ନୂଆଦିଲ୍ଲୀ ୧୧/୦୫: ଆମ ଦେଶରେ ଜାତୀୟ ପ୍ରଯୁକ୍ତିବିଦ୍ୟା ଦିବସର ଗୁରୁତ୍ୱପୂର୍ଣ୍ଣ ଐତିହାସିକ ମହତ୍ତ୍ୱ ରହିଛି । ଭାରତର ବୈଷୟିକ ଅଗ୍ରଗତିର ଉପଲବ୍ଧି ଭାବେ ଏହି ଦିବସ ପାଳିତ ହୋଇଆସୁଛି । ୧୯୯୮ ମସିହା, ମେ ୧୧ରେ ଦେଶ ରାଜସ୍ଥାନର ପୋଖରାନଠାରେ ପରମାଣୁ ଅସ୍ତ୍ରର ସଫଳତାପୂର୍ବକ ପରୀକ୍ଷଣ କରିଥିଲା । ତେଣୁ ଦେଶର ବୈଜ୍ଞାନିକମାନଙ୍କ କଠିନ ପରିଶ୍ରମ ଓ ଉପଲବ୍ଧିକୁ ସମ୍ମାନ ଜଣାଇବା ପାଇଁ ୧୯୯୯ ମସିହାରେ ତତ୍‌କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଆଜିର ଦିନକୁ ଜାତୀୟ ପ୍ରଯୁକ୍ତିବିଦ୍ୟା ଦିବସ ଭାବେ ପାଳନ କରିବାକୁ ଘୋଷଣା କରିଥିଲେ । 

ଏହି ଦିବସରେ ସ୍କୁଲ, କଲେଜରେ ବିଜ୍ଞାନ ପ୍ରଦର୍ଶନୀମାନ ଆୟୋଜନ କରାଯାଇଥାଏ । ବିଜ୍ଞାନ ଓ ପ୍ରଯୁକ୍ତିବିଦ୍ୟାର ଗୁରୁତ୍ୱ ପ୍ରତି ଲୋକମାନଙ୍କ ମଧ୍ୟରେ ବିଶେଷ କରି ଯୁବବର୍ଗଙ୍କ ମଧ୍ୟରେ ସଚେତନତା ସୃଷ୍ଟି କରିବା ଏହି ଦିବସ ପାଳନର ଉଦ୍ଦେଶ୍ୟ । ଚଳିତବର୍ଷ ଏହି ଦିବସର ବିଷୟବସ୍ତୁ ରହିଛି ‘ସ୍କୁଲରୁ ଷ୍ଟାର୍ଟଅପ୍‌ଯାଏ: ନବସୃଜନ ଲାଗି ଯୁବ ମାନସିକତାକୁ ପ୍ରଜ୍ଜ୍ୱଳିତ କରିବା ।’