ଭୁବନେଶ୍ୱର,୨୯/୦୩: ବହୁଚର୍ଚ୍ଚିତ ନବ ଦାସ ହତ୍ୟା ମାମଲାକୁ ଜାତୀୟ ମାନବ ଅଧିକାର ଆୟୋଗ (ଏନ୍ଏଚ୍ଆର୍ସି) ଗୁରୁତ୍ୱର ସହ ନେଇଛନ୍ତି । ମାମଲାର ତଦନ୍ତରେ ଓଡିଶା ପୁଲିସ ହେଳା କରୁଥିବା ଦର୍ଶାଇ ଆୟୋଗ କ୍ଷୋଭ ପ୍ରକାଶ କରିଛନ୍ତି । ମାମଲାର ପୁଙ୍ଖାନୁପୁଙ୍ଖ ତଦନ୍ତ କରି ରିପୋର୍ଟ ତଲବ ପାଇଁ ପୁଲିସ ମହାନିର୍ଦ୍ଦେଶକ (ଡିଜିପି)ଙ୍କୁ ନିର୍ଦ୍ଦେଶ ଦେଇଛନ୍ତି ।
ନ୍ୟାୟ ପାଇଁ ଲଢ଼େଇ ପରିବାର ତରଫରୁ ସଭାପତି ସୁବ୍ରତ ଦାଶ ଏହି ହତ୍ୟାକାଣ୍ଡ ସମୟରେ ଏନେଇ ଏନ୍ଏଚ୍ଆର୍ସିରେ ଏକ ପିଟିସନ ଦାଖଲ କରିଥିଲେ । ସେତେବେଳେ ୮ ସପ୍ତାହ ମଧ୍ୟରେ ମାମଲାର ତଦନ୍ତ ଓ କାର୍ଯ୍ୟାନୁଷ୍ଠାନ ରିପୋର୍ଟ ଦାଖଲ ପାଇଁ ତତ୍କାଳୀନ ପୁଲିସ ଡିଜିଙ୍କୁ ଏନ୍ଏଚ୍ଆର୍ସି ନିର୍ଦ୍ଦେଶ ଦେଇଥିଲେ । ହେଲେ ପୁଲିସ ପକ୍ଷରୁ କୌଣସି ରିପୋର୍ଟ ଦାଖଲ ହେଲାନି । ଗତ ଜାନୁଆରୀ ୨୯ରେ ଶ୍ରୀ ଦାଶ ଏନ୍ଏଚ୍ଆର୍ସିରେ ଆଉ ଏକ ଅପିଲ୍ କରିଥିଲେ । ମାମଲାର ୧୦ଟି ଦିଗରେ ସମ୍ବେଦନଶୀଳ ତଥ୍ୟ ଉଲ୍ଲେଖ କରି ନିରପେକ୍ଷ ତଦନ୍ତ ହେଉନଥିବା ଆୟୋଗଙ୍କୁ ଅଭିଯୋଗ କରିଥିଲେ। ହତ୍ୟାର କାରଣ ରହସ୍ୟରେ ଥିବା ଦର୍ଶାଇବା ସହ ଆୟୋଗଙ୍କ ଏକ ସ୍ୱତନ୍ତ୍ର ଟିମ୍ ଦ୍ୱାରା ମାମଲାର ତଦନ୍ତ ପାଇଁ ଆବେଦନ କରିଥିଲେ।
ଆୟୋଗ ଉକ୍ତ ଅପିଲ୍ର ଶୁଣାଣି କରି ପୁଲିସ ଡିଜିଙ୍କୁ ନିର୍ଦ୍ଦେଶ ଦେଇଛନ୍ତି, ମାମଲାର ପୁଙ୍ଖାନୁପୁଙ୍ଖ ତଦନ୍ତ କରାଯାଉ । ହତ୍ୟାର କାରଣ ଖୋଜାଯାଉ । ଏସବୁର ବିସ୍ତୁତ ରିପୋର୍ଟ ଆୟୋଗଙ୍କ ସହ ଅଭିଯୋଗକାରୀଙ୍କୁ ଦିଆଯାଉ ।ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ନେଇ ରିପୋର୍ଟରେ ଉଲ୍ଲେଖ କରିବାକୁ ଆୟୋଗ ନିର୍ଦ୍ଦେଶ ଦେଇଛନ୍ତି ।
