ନୂଆଦିଲ୍ଲୀ,୩୧/୦୮: ଦେଶରେ ବାଘଗୁଡ଼ିକର ମୃତ୍ୟୁକୁ ନେଇ ସମୟକ୍ରମେ ନୂଆ ନୂଆ ତଥ୍ୟ ଆସିବାକୁ ଯାଉଛି। ମଧ୍ୟପ୍ରଦେଶ ଏବଂ ମହାରାଷ୍ଟ୍ରରେ ସର୍ବାଧିକ ବାଘ ମୃତ୍ୟୁ ଘଟିଥିବା ଏକ ରିପୋର୍ଟରେ ପ୍ରକାଶ ପାଇଛି। ଗତ ବର୍ଷ ହୋଇଥିବା ୧୮୧ ବାଘ ମୃତ୍ୟୁ ମଧ୍ୟରୁ ପ୍ରାୟ ଅଧା ଏହି ଦୁଇଟି ରାଜ୍ୟରେ ଘଟିଥିଲା। ମଧ୍ୟପ୍ରଦେଶରେ ୪୩ ଟି ଏବଂ ମହାରାଷ୍ଟ୍ରରେ ୪୫ ଟି ବାଘଙ୍କ ମୃତ୍ୟୁ ରେକର୍ଡ କରାଯାଇଛି। ଏହା ପରେ ଉତ୍ତରାଖଣ୍ଡରେ (୨୧), ତାମିଲନାଡୁ (୧୫), କେରଳ (୧୪), କର୍ଣ୍ଣାଟକ (୧୨) ଏବଂ ଆସାମରେ ୧୦ ବାଘଙ୍କ ଜୀବନ ଯାଇଛି। 

୨୦୨୩ ରେ ଜୀବନ ହରାଇଥିବା ୧୮୧ ଟି ବାଘ ମଧ୍ୟରୁ କେବଳ ୪୪ ଜଣ ପ୍ରାକୃତିକ କାରଣରୁ ଜୀବନ ହରାଇଥିଲେ। ଏଥିସହିତ ଶିକାରୀମାନଙ୍କ ଦ୍ବାରା ୯ଟି ବାଘ ପ୍ରାଣ ହରାଇଥିଲେ। ଏନଟିସିଏ ଅର୍ଥାତ୍‌ ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ ଏହାର ରିପୋର୍ଟରେ କହିଛି ଯେ, ୧୧୫ ଟି ବାଘଙ୍କ ମୃତ୍ୟୁର କାରଣକୁ ନେଇ ଅନୁସନ୍ଧାନ କରାଯାଉଛି। ୭ଟି ବାଘର ଅସ୍ବାଭାବିକ ଭାବେ ମୃତ୍ୟୁ ହୋଇଥିବାବେଳେ ୬ଟିର ହୃଦଘାତ ଯୋଗୁଁ ମୃତ୍ୟୁ ଘଟିଛି।

ଚଳିତ ବର୍ଷ ୧ ଜାନୁଆରୀ ୧୨ ଏପ୍ରିଲ ମଧ୍ୟରେ ଦେଶରେ ୪୭ ଟି ବାଘଙ୍କର ମୃତ୍ୟୁ ଘଟିଛି। ସେଥିମଧ୍ୟରୁ ୧୭ଟି ମଧ୍ୟପ୍ରଦେଶରେ ଏବଂ ୧୧ଟି ମହାରାଷ୍ଟ୍ରରେ ଜୀବନ ହରାଇଛନ୍ତି। ଏହାର ଅର୍ଥ ହେଉଛି ମୋଟ ମୃତ୍ୟୁର ୫୦% ରୁ ଅଧିକ କେବଳ ଏହି ଦୁଇଟି ରାଜ୍ୟରୁ ଆସିଛି। କର୍ଣ୍ଣାଟକରେ ୬ ଟି ବାଘ, ଉତ୍ତରପ୍ରଦେଶରେ ତିନୋଟି, ରାଜସ୍ଥାନ, କେରଳ, ତେଲେଙ୍ଗାନା ଏବଂ ଉତ୍ତରପ୍ରଦେଶରେ ଦୁଇଟି ଲେଖାଏଁ ଏବଂ ଛତିଶଗଡ ଏବଂ ଓଡିଶାରେ ଗୋଟିଏ ଲେଖାଏଁ ବାଘର ଜୀବନ ଯାଇଛି। 

ସବୁ ବାଘମାନଙ୍କର ମୃତ୍ୟୁର କାରଣ ଅନୁସନ୍ଧାନ କରାଯାଉଛି ବୋଲି ଏନଟିସିଏ କହିଛି। ଜଷ୍ଟିସ ସଞ୍ଜୀବ ଖାନ୍ନାଙ୍କ ନେତୃତ୍ୱରେ ଏକ ଖଣ୍ଡପୀଠ ସମ୍ମୁଖରେ ଏହି ରିପୋର୍ଟ ଉପସ୍ଥାପନ କରି ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭାଟି କହିଛନ୍ତି ଯେ 'ଏନଟିସିଏର ପରାମର୍ଶରେ ରାଜ୍ୟମାନେ ବାଘ ସଂଖ୍ୟାକୁ ସୁରକ୍ଷା ଦେବା ପାଇଁ ଅନେକ କଠୋର ପଦକ୍ଷେପ ନେଇଛନ୍ତି। ତଥାପି ପ୍ରାକୃତିକ, ଅସ୍ବାଭାବିକ ଓ ମନୁଷ୍ୟକୃତ ବାଘ ମୃତ୍ୟୁକୁ ନେଇ ଚିନ୍ତା ଜୋର।