ଭୁବନେଶ୍ୱର,୦୧/୦୬: ଅନ୍ତିମ ପର୍ଯ୍ୟାୟ ନିର୍ବାଚନରେ ନେତା ବାଛିବେ ଭୋଟର । ରାଜ୍ୟର ୬ ଲୋକସଭା ସହ ୪୨ ବିଧାନସଭା ଆସନରେ ମତଦାନ ଆରମ୍ଭ ହୋଇଛି।ଶେଷ ଦଫା ଭୋଟରେ ୪୬୦ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ଭୋଟର ।
ଶନିବାର ଶେଷ ପର୍ଯ୍ୟାୟ ଭୋଟ । ଓଡ଼ିଶାର ୬ ଲୋକସଭା ସିଟ୍ ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା ଓ ଜଗତସିଂହପୁର ଲୋକସଭା ପାଇଁ ମତଦାନ। ଏହି ଲୋକସଭା ଅନ୍ତର୍ଗତ ୪୨ ବିଧାନସଭା ପାଇଁ ମଧ୍ୟ ଭୋଟରମାନେ ନିଜ ପସନ୍ଦର ପ୍ରାର୍ଥୀଙ୍କୁ ବାଛିବେ । ଲୋକସଭା ପାଇଁ ୬୬ଜଣ ପ୍ରାର୍ଥୀ ଥିବାବେଳେ ବିଧାନସଭା ପାଇଁ ଲଢ଼ୁଛନ୍ତି ୩୯୪ ଜଣ ଯୋଦ୍ଧା । ୯୯ ଲକ୍ଷ ୬୧ ହଜାର ଭୋଟର ଏମାନଙ୍କର ଭାଗ୍ୟ ଇଭିଏମରେ ସିଲ୍ କରିବେ । ଏଥିପାଇଁ ୧୦ ହଜାର ୫୮୭ଟି ବୁଥ୍ ଓ ୨୫ଟି ଅତିରିକ୍ତ ବୁଥ୍ ବ୍ୟବସ୍ଥା କରାଯାଇଛି । ଶନିବାର ସକାଳ ୭ରୁ ମତଦାନ ପ୍ରକିୟା ଆରମ୍ଭ ହୋଇଛି। ଏହା ସନ୍ଧ୍ୟା ୬ଟା ପର୍ଯ୍ୟନ୍ତ ଚାଲିବ । ମତଦାନ ସରିବା ପରେ ସନ୍ଧ୍ୟା ୬ରୁ ଏଗ୍ଜିଟ୍ ପୋଲ ଆରମ୍ଭ ହେବ । ୪ରେ ଭୋଟଗଣତିରୁ ସ୍ପଷ୍ଟ ହେବ ଫଳ ।
ଶନିବାର ଭୋଟ ହେବାକୁ ଥିବା ଲୋକସଭା ଓ ବିଧାନସଭା ଆସନରେ ବହୁ ହେଭିୱେଟ୍ ଭାଗ୍ୟ ପରୀକ୍ଷା କରିବେ । ଲୋକସଭା ପାଇଁ ଶ୍ରୀକାନ୍ତ ଜେନା, ପ୍ରତାପ ଷଡ଼ଙ୍ଗୀ, ଲେଖାଶ୍ରୀ ସାମନ୍ତସିଂହାର, ବୈଜୟନ୍ତ ପଣ୍ଡା, ଅଂଶୁମାନ ମହାନ୍ତି, ସୁଦାମ ମାର୍ଣ୍ଡିଙ୍କ ଭଳି ପ୍ରଭାବଶାଳୀ ନେତା ଲଢ଼ୁଛନ୍ତି । ବିଧାନସଭାରେ ନିରଞ୍ଜନ ପଟ୍ଟନାୟକ, ଅତନୁ ସବ୍ୟସାଚୀ ନାୟକ, ପ୍ରତାପ କେଶରୀ ଦେବ, ଗଣେଶ୍ୱର ବେହେରା, ପ୍ରଫୁଲ୍ଲ ସାମଲ, ପ୍ରମିଳା ମଲ୍ଲିକ, ପ୍ରଶାନ୍ତ ମୁଦୁଲି, ଅରବିନ୍ଦ ମହାପାତ୍ର, ପ୍ରଭାତୀ ପରିଡ଼ା, ଅରିନ୍ଦମ ରାୟ ପ୍ରମୁଖଙ୍କ ଆସନ ଉପରେ ସଭିଙ୍କ ନଜର ରହିଛି ।
ଶେଷ ପର୍ଯ୍ୟାୟ ମତଦାନରେ ୧୪୦୦ରୁ ଅଧିକ ବୁଥ୍ ସମ୍ପୂର୍ଣ୍ଣ ରୂପେ ମହିଳା କର୍ମଚାରୀଙ୍କ ଦ୍ୱାରା ପରିଚାଳିତ କରୁଛନ୍ତି । ଏହି ପର୍ଯ୍ୟାୟରେ ପ୍ରାୟ ୭୨ ହଜାର ପୋଲିଂ କର୍ମଚାରୀ ନିୟୋଜିତ ହୋଇଛନ୍ତି । ନିର୍ବାଚନକୁ ଶାନ୍ତି ଶୃଙ୍ଖଳାର ସହ ସମାପ୍ତ କରିବାକୁ ସବୁପ୍ରକାର ପ୍ରସ୍ତୁତି ସରିଛି । ୪୨ଟି ନିର୍ବାଚନମଣ୍ଡଳୀରେ ଭୋଟ ପାଇଁ ମୋଟ ୧୨୫ କମ୍ପାନି ସଶସ୍ତ୍ର କେନ୍ଦ୍ରୀୟ ବାହିନୀ ନିୟୋଜିତ ହୋଇଛନ୍ତି । ଅଂଶୁଘାତ ମୁକାବିଲା ପାଇଁ ପ୍ରତି ପୋଲିଂ ଷ୍ଟେସନରେ ଆବଶ୍ୟକୀୟ ଔଷଧ, ଓଆରଏସ୍ ରଖାଯିବ । ବୁଥରେ ପିଇବା ପାଣି, ଶୌଚାଳୟ ଓ ଛାଇ ଆଦି ସର୍ବନିମ୍ନ ବ୍ୟବସ୍ଥା ସୁନିଶ୍ଚିତ କରାଯାଇଛି ।
