କାବୁଲ,୦୪/୧୧: ୨୦୨୧ ଅଗଷ୍ଟ ୧୫ରେ ଆଫଗାନିସ୍ତାନକୁ ତାଲିବାନ୍ କବ୍ଜା କରିବା ପରଠାରୁ ସେଠାରେ ସ୍ୱାସ୍ଥ୍ୟ ସେବା ଭୁଶୁଡ଼ି ପଡ଼ିଛି । ‘ରେଡିଓ ଫ୍ରି ୟୁରୋପ’ ରିପୋର୍ଟ ଅନୁସାରେ ଆଫଗାନିସ୍ତାନରେ ଅନେକ ହସ୍ପିଟାଲରେ ଚିକିତ୍ସା ପାଇଁ ଆବଶ୍ୟକ ଉପକରଣର ଘୋର ଅଭାବ ରହିଛି । ଏପରିକି ରୋଗୀ ସାଧାରଣ ରୋଗର ଔଷଧ ପାଇବାରୁ ମଧ୍ୟ ବଞ୍ଚିତ ହେଉଛନ୍ତି । ଏପରି ସ୍ଥିତିରେ ଅନେକ ଡାକ୍ତରଖାନାରେ ରୋଗୀଙ୍କୁ ଔଷଧ ନାଁରେ ଅଫିମ ଦିଆଯାଉଥିବା ଜଣାଯାଇଛି ।
ଆଫଗାନିସ୍ତାନର ଜନସଂଖ୍ୟା ପ୍ରାୟ ୪ କୋଟି ହୋଇଥିବା ସେମାନଙ୍କ ମଧ୍ୟରୁ ୧୦%ରୁ ଊଦ୍ଧ୍ୱର୍ ଡ୍ରଗ୍ସ ଅଭ୍ୟାସକାରୀ । ତାଲିବାନ୍ ଅଫିମ ଉତ୍ପାଦନ ଉପରେ ରୋକ ଲଗାଇବାକୁ ଘୋଷଣା କରିଥିଲେ ହେଁ ବାସ୍ତବରେ କିନ୍ତୁ ସେଠାରେ ଅଫିମ ଚାଷ ବୃଦ୍ଧି ପାଇଛି । ରିପୋର୍ଟ ଅନୁସାରେ, ଆଫଗାନିସ୍ତାନର ଗ୍ରାମାଞ୍ଚଳରେ ଥିବା ହସ୍ପିଟାଲଗୁଡ଼ିକର ଅବସ୍ଥା ଅତ୍ୟନ୍ତ ଖରାପ ରହିଛି । ସେଠାରେ ଥଣ୍ଡା, ଜ୍ୱର, କାଶ, ନିଦ ନ ହେବା ଆଦି ପାଇଁ ମଧ୍ୟ ଲୋକଙ୍କୁ ଅଫିମ ଦିଆଯାଉଛି । ଫଳରେ ଲୋକ ନ ଚାହିଁ ବି ଅଫିମ ସେବନ କରୁଛନ୍ତି ।
ଏଥିଯୋଗୁ ସେଠାରେ ଡ୍ରଗ୍ସ ସେବନକାରୀଙ୍କ ସଂଖ୍ୟା ବଢ଼ୁଛି । ଯଦି ଏହା ଉପରେ ରୋକ ଲଗା ନ ଯାଏ ତେବେ ଆଫଗାନିସ୍ତାନରେ ଡ୍ରଗ୍ସ ନିଶା ମହାମାରୀ ଭଳି ବ୍ୟାପିଯିବ ଏବଂ ତାହାକୁ ରୋକିବା କଷ୍ଟକର ହୋଇପଡ଼ିବ ବୋଲି ସ୍ୱାସ୍ଥ୍ୟ ବିଶେଷଜ୍ଞମାନେ ଚିନ୍ତା ପ୍ରକଟ କରିଛନ୍ତି । ସେପଟେ ଆଫଗାନିସ୍ତାନରେ ତାଲିବାନ ସରକାରକୁ ଅଧିକାଂଶ ଦେଶ ମାନ୍ୟତା ଦେଇ ନ ଥିବାରୁ ଆଫଗାନିସ୍ତାନକୁ ଆର୍ଥିକ ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି । ଏଥିଯୋଗୁ ସ୍ୱାସ୍ଥ୍ୟ କ୍ଷେତ୍ର ମଧ୍ୟ ପ୍ରଭାବିତ ହେଉଛି ।
ଜାତିସଂଘର ଏକ ରିପୋର୍ଟ ଅନୁସାରେ, ଆଫଗାନିସ୍ତାନରେ ୪୦ ଲକ୍ଷରୁ ଅଧିକ ଲୋକ ଡ୍ରଗ୍ସ କବଳରେ ରହିଛନ୍ତି । ଏଠାରେ ବହୁ ସଂଖ୍ୟାରେ ଲୋକ ଅଫିମକୁ ଔଷଧ ମନେ କରନ୍ତି । ଆଫଗାନ୍ର ଜଣେ ସ୍ୱାସ୍ଥ୍ୟ ବିଭାଗ ଅଧିକାରୀଙ୍କ କହିବା ଅନୁସାରେ, ଅଫିମ ବ୍ୟତୀତ ଏଠାରେ ଅନ୍ୟ ପ୍ରକାରର ଡ୍ରଗ୍ସ ମଧ୍ୟ ସ୍ୱାସ୍ଥ୍ୟସେବା ପାଇଁ ବ୍ୟବହାର କରାଯାଉଛି । ଲୋକଙ୍କ ପାଖରେ ଔଷଧ ନ ଥିବାରୁ ସେମାନେ ବିକଳ୍ପ ନ ପାଇ ତାହାକୁ ସେବନ କରୁଛନ୍ତି । ଏଥିଯୋଗୁ ନିଶା ସେବନକାରୀଙ୍କ ସଂଖ୍ୟା ବଢ଼ୁଛି ।
ଆଫଗାନିସ୍ତାନରେ ଏବେ କିଛି ହାତଗଣତି ଅନ୍ତର୍ଜାତୀୟ ରିଲିଫ୍ ସଂସ୍ଥା କାମ କରୁଛନ୍ତି । ପୂର୍ବରୁ ସେମାନଙ୍କୁ ଯେଉଁ ପାଣ୍ଠି ମିଳୁଥିଲା ତାଲିବାନ୍ ଶାସନକୁ ଆସିବା ପରେ ତାହା ବନ୍ଦ ହୋଇଯାଇଛି । ଜାତିସଂଘ ୱାର୍ଲ୍ଡ ଫୁଡ୍ ପ୍ରୋଗ୍ରାମ ମଧ୍ୟ ପୂର୍ବରୁ ଦେଉଥିବା ପାଣ୍ଠିକୁ ଗତ ସେପ୍ଟେମ୍ବରରେ କମ୍ କରିଦେଇଛି । କାରଣ ଏହି ସଙ୍ଗଠନ ମଧ୍ୟ ପାଣ୍ଠି ପାଇପାରୁନାହିଁ । ଗତ ଅଗଷ୍ଟରେ ରେଡ୍କ୍ରସ୍ ଆଫଗାନିସ୍ତାନରୁ ନିଜ ୨୫ ହସ୍ପିଟାଲରେ ତାଲା ପକାଇଦେଇଛି । ତେଣୁ ସେଠାକାର ଲୋକଙ୍କ ଜୀବନ ଆହୁରି ଦୁର୍ବିଷହ ହୋଇଛି । ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଗତ ମାସରେ କହିଥିଲା ଯେ, ଆଫଗାନିସ୍ତାନର ସ୍ଥିତି ଏବେ ଅତ୍ୟନ୍ତ ସମ୍ବେଦନଶୀଳ ରହିଛି ।
