ନୂଆଦିଲ୍ଲୀ: ମଙ୍ଗଳବାର ବିଳମ୍ବିତ ରାତିରେ ପାକିସ୍ତାନର ଖୈବର ପଖତୁନଖଓ୍ବାରେ ଏକ ବଡ ଧରଣର ବସ୍ ଦୁର୍ଘଟଣା ଘଟିଛି । ଗଭୀର ଖାଇ ଭିତରକୁ ଏକ ଯାତ୍ରୀବାହୀ ବସ୍ ଖସି ପଡିବାରୁ ଅତି କମରେ ୧୦ ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି । ଏଥିସହ ୧୫ ରୁ ଅଧିକ ଲୋକ ଆହତ ହୋଇଛନ୍ତି । ପୋଲିସ କହିଛି ଯେ ବସ୍ଟି ବହୁତ ଦ୍ରୁତ ଗତିରେ ଯାଉଥିଲା । ଏହି ସମୟରେ ଡ୍ରାଇଭର ଏକ ମୋଡ଼ରେ ନିୟନ୍ତ୍ରଣ ହରାଇ ବସିଥିଲେ, ଫଳରେ ବସଟି ଖାଲରେ ପଡ଼ିଯାଇଥିଲା।
କୁହାଯାଉଛି ଯେ ଏହି ବସ୍ ହରିପୁର ଜିଲ୍ଲାର ଖାନପୁରର ଏକ ପାହାଡୀ ଗାଁ ଆଡକୁ ଯାଉଥିଲା । ବାଟରେ ତାରନାୱା ଠାରେ ଏକ ଦୁର୍ଘଟଣାର ସମ୍ମୁଖୀନ ହୋଇଛି । ମୃତକଙ୍କ ମଧ୍ୟରେ ପୁରୁଷ, ମହିଳା ଏବଂ ଶିଶୁ ମଧ୍ୟ ଅଛନ୍ତି । ବସଟି ଖାଲରେ ପଡ଼ିଯିବାର ଖବର ପାଇବା ମାତ୍ରେ ଉଦ୍ଧାରକାରୀ ଦଳକୁ ଘଟଣାସ୍ଥଳକୁ ପଠାଯାଇଥିଲା। ଆହତମାନଙ୍କୁ ସ୍ଥାନୀୟ ଲୋକଙ୍କ ସହାୟତାରେ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି।