ନୂଆଦିଲ୍ଲୀ, ୨୯/୦୧ : ପରୀକ୍ଷା ପେ ଚର୍ଚ୍ଚାର ସପ୍ତମ ସଂସ୍କରଣରେ ଛାତ୍ରଛାତ୍ରୀଙ୍କୁ ସମ୍ବୋଧନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଆଜି ଭାରତ ମଣ୍ଡପମରେ ଦିନ ୧୧ଟା ବେଳେ ଆୟୋଜିତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଛାତ୍ରଛାତ୍ରୀ ଶିକ୍ଷକ ଶିକ୍ଷୟିତ୍ରୀ ଏବଂ ଅଭିଭାବକମାନଙ୍କୁ ସମ୍ବୋଧନ କରିବା ସହିତ ସେମାନଙ୍କ ସହ ସିଧାସଳଖ କଥା ହେବେ। ଆସନ୍ତା ବୋର୍ଡ ପରୀକ୍ଷାରେ ଛାତ୍ରଛାତ୍ରୀ ଚାପମୁକ୍ତ ହୋଇ କିଭଳି ପରୀକ୍ଷାର ସମ୍ମୁଖୀନ କରିବେ ତାହା  ଉପରେ ପରାମର୍ଶ ଦେବେ ପ୍ରଧାନମନ୍ତ୍ରୀ।

ସୂଚନାନୁଯାୟୀ, ଚଳିତ ବର୍ଷ ପାଖାପାଖି ୪ ହଜାର ଛାତ୍ରଛାତ୍ରୀ ପ୍ରଧାନମନ୍ତ୍ରୀଙ୍କ ସହିତ କଥା ହେବେ। ଏହି କାର୍ଯ୍ୟକ୍ରମରେ ସାମିଲ ହେବା ପାଇଁ ରେକର୍ଡ ସଂଖ୍ୟକ ୨. ୨୬ କୋଟି ଜଣ ମାଇଁ ଗଭ୍ ଆପରେ ପଞ୍ଜୀକରଣ କରିଛନ୍ତି। ମାଇଁ ଗଭ ଆପ୍ ରେ ହୋଇଥିବା ଏକ ପରୀକ୍ଷା ମାଧ୍ୟମରେ ପିଲାମାନଙ୍କୁ ସିଧାସଳଖ ଏହି କାର୍ଯ୍ୟକ୍ରମରେ ଯୋଗ ଦେବା ଲାଗି ଚୟନ କରାଯାଇଛି। ସେହିପରି ଟିଭି ଓ ଇଣ୍ଟରନେଟ ମାଧ୍ୟମରେ ପିଲାମାନେ ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମରେ ଯୋଡ଼ି ହୋଇ ପାରିବେ।