ପ୍ୟାରିସ୍,୦୬/୦୮: ପୁରୁଷ ବର୍ଗ ପୋଲ ଭଲ୍ଟ ଇଭେଣ୍ଟରେ ସ୍ୱିଡେନ ଷ୍ଟାର୍ ମୋଣ୍ଡୋ ଡୁପ୍ଲାଣ୍ଟିସ୍ ଉଭୟ ବିଶ୍ୱ ରେକର୍ଡ ଓ ଅଲିମ୍ପିକ୍ସ ରେକର୍ଡ ଭାଙ୍ଗ କରିବା ସହ ସ୍ୱର୍ଣ୍ଣ ପଦକ ହାସଲ କରି ଇତିହାସ ରଚିଛନ୍ତି । ସେ ୬.୨୫ମିଟର ଉଚ୍ଚ ଜମ୍ପ କରିଥିଲେ । ୟୁଏସଏର ସାମ କେଣ୍ଡ୍ରିକ୍ସ ୫.୯୫ମିଟର ଜମ୍ପ ସହ ରୌପ୍ୟ ଓ ଗ୍ରୀସ୍ର ଏମାନଏଲ କାରାଲିସ୍(୫.୯୦ମିଟର) ବ୍ରୋଞ୍ଜ ପଦକ ଜିତିଥିଲେ ।
ପୂର୍ବରୁ ଡୁପ୍ଲାଣ୍ଟିସ ୮ ଥର ବିଶ୍ୱ ରେକର୍ଡ ଭାଙ୍ଗି ସାରିଥିଲେ । କେବଳ ଅଲିମ୍ପିକ୍ସ ରେକର୍ଡ ବାକି ରହିଯାଇଥିଲା । ୬.୦୦ ମିଟର ଉଚ୍ଚ ଜମ୍ପ ପରେ ଡୁପ୍ଲାଣ୍ଟିସ୍ଙ୍କ ସ୍ୱର୍ଣ୍ଣ ପଦକ ପକ୍କା ହୋଇ ସାରିଥିଲା । ଏଥର ସେ ଅଲିମ୍ପିକ୍ସ ରେକର୍ଡ ଭାଙ୍ଗିବାକୁ ନିଷ୍ପତ୍ତି ନେଇଥିଲେ । ଅବଶ୍ୟ ଏଥିପାଇଁ ତାଙ୍କୁ ପରିଶ୍ରମ କରିବାକୁ ପଡ଼ିନଥିଲା । ସେ ୬.୧୦ମିଟର ଚୟନ କରିଥିଲେ ଓ ପ୍ରଥମ ପ୍ରୟାସରେ ସେ ଏହି ଉଚ୍ଚତା ଅତିକ୍ରମ କରିଥିଲେ । ପୂର୍ବରୁ ବ୍ରାଜିଲ୍ର ଥିଆଗୋ ବାଜ୍ଙ୍କ ନାମରେ ଅଲିମ୍ପିକ୍ସ ରେକର୍ଡ ରହିଥିଲା । ୨୦୧୬ ରିଓ ଅଲିମ୍ପିକ୍ସରେ ସେ ୬.୦୩ ମିଟର ଜମ୍ପ କରି ଏହି ରେକର୍ଡ କରିଥିଲେ ।
ଏଥର ଷ୍ଟେଡ ଡି ଫ୍ରାନ୍ସରେ ଉପସ୍ଥିତ ୮୦,୦୦୦ ଦର୍ଶକ ଡୁପ୍ଲାଣ୍ଟିସ୍ଙ୍କୁ ଉତ୍ସାହିତ କରିଥିଲେ । ଦର୍ଶକ ତାଙ୍କ ଠାରୁ ଚାହୁଁଥିଲେ ଆଉ ଏକ ନୂଆ ବିଶ୍ୱ ରେକର୍ଡ । ଶେଷରେ ଡୁପ୍ଲାଣ୍ଟିସ୍ ୬.୨୫ମିଟର ଚୟନ କରିଥିଲେ । ତାଙ୍କର ପ୍ରଥମ ପ୍ରୟାସ ବିଫଳ ହୋଇଥିଲା । କିଛି ସମୟରେ ବିଶ୍ରାମ ନେଇ ସେ ଦ୍ୱିତୀୟ ଜମ୍ପ କରିଥିଲେ । ଏଥର ତାଙ୍କ ଡାହାଣ ଆଣ୍ଠୁ ବାର୍ରେ ବାଜିଥିଲା ଓ ନାଲି ଆଲୋକ ଜଳି ଉଠିଥିଲା । ହାତରେ ବାକିଥିଲା ଶେଷ ସୁଯୋଗ । ଦର୍ଶକଙ୍କ ସମେତ ସାଥୀ ପ୍ରତିଯୋଗୀମାନେ ମଧ୍ୟ ତାଙ୍କୁ ଉତ୍ସାହିତ କରିବାରେ ଲଗି ପଡ଼ିଥିଲେ । କିଛି ସମୟ ବିଶ୍ରାମ ଏବଂ ଆଉ କିଛି ସମୟ ୱାର୍ମ ଅପ୍ । ସେତେବେଳକୁ ଷ୍ଟାଡିୟମ୍ରେ ଉପସ୍ଥିତ ସବୁ ଦର୍ଶକ ଧୈର୍ଯ୍ୟର ସହ ତାଙ୍କ ତୃତୀୟ ଜମ୍ପକୁ ଅପେକ୍ଷା କରି ରହିଥିଲେ ।
ଭଲ୍ଟ ସହ ଡୁପା୍ଲଣ୍ଟିସ୍ ରନ୍ ଅପ୍ ନେଇଥିଲେ । ଷ୍ଟାଡିୟମ୍ କମ୍ପି ଉଠିଥିଲା । ଏଥର ସଫଳ ହୋଇଥିଲା ଡୁପ୍ଲାଣ୍ଟିସ୍ଙ୍କ ଶେଷ ପ୍ରୟାସ । ସେ ସଫଳତାର ସହ ୬.୨୫ମିଟର ଅତିକ୍ରମ କରିଥିଲେ । ଇତିହାସରେ ଲିପିବଦ୍ଧ ହୋଇଥିଲା ଡୁପ୍ଲାଣ୍ଟିସ୍ଙ୍କ ନାମ ।
ଗତ ଏପ୍ରିଲରେ ଅନୁଷ୍ଠିତ ଜିଆମେନ ଡାଏମଣ୍ଡ ଲିଗ୍ରେ ସେ ୬.୨୪ମିଟର ଜମ୍ପ କରିଥିଲେ । ପୂର୍ବରୁ ସେ ୩ ଥର ବିଶ୍ୱଚାମ୍ପିଅନ୍ସିପ୍ରେ ସ୍ୱର୍ଣ୍ଣ ପଦକ ହାସଲ କରିସାରିଥିଲେ । ଟୋକିଓ ଅଲିମ୍ପିକ୍ସରେ ମଧ୍ୟ ସେ ସ୍ୱର୍ଣ୍ଣ ଜିତିଥିଲେ । ପ୍ୟାରିସ୍ରେ ମଧ୍ୟ ତାଙ୍କ ଟକ୍କର ଦେବା ଭଳି କେହି ପ୍ରତିଦ୍ୱନ୍ଦ୍ୱୀ ନଥିଲେ । ତେଣୁ ଦର୍ଶକ ତାଙ୍କ ଠାରୁ ନୂଆ ବିଶ୍ୱ ରେକର୍ଡ ଆଶା ରଖିଥିଲେ । ଟୋକିଓ ଅଲିମ୍ପିକ୍ସରେ ପାଦ ଦେବା ପୂର୍ବରୁ ସେ ବିଶ୍ୱ ରେକର୍ଡ ଭାଙ୍ଗି ସାରିଥିଲେ । ୨୦୨୦ ଫେବ୍ରୁଆରୀ ୪ ତାରିଖରେ ସେ ପ୍ରଥମେ ୬.୦୦ ମିଟର ଉଚ୍ଚ ଜମ୍ପ କରିଥିଲେ । ୪ଦିନ ପରେ ସେ ୬.୧୭ମିଟର ଜମ୍ପ କରି ୬ବର୍ଷ ତଳର ବିଶ୍ୱ ରେକର୍ଡ ଭାଙ୍ଗିଥିଲେ । ପୂର୍ବରୁ ଫ୍ରାନ୍ସର ଫ୍ରାନ୍ସର ରିନାଉଡ୍ ଲାଭେଲିନି (୬.୧୬ମିଟର)ଙ୍କ ନାମରେ ବିଶ୍ୱ ରେକର୍ଡ ରହିଥିଲା । ଲାଭେଲିନିଙ୍କ ରେକର୍ଡ ଭାଙ୍ଗିବା ଦିନଠୁ ଡୁପ୍ଲାଣ୍ଟିସ ଆଉ ବିଫଳ ହୋଇନାହାନ୍ତି । ଫେବ୍ରୁଆରୀ ୧୫ ତାରିଖରେ ସେ ଗ୍ଲାସଗୋରେ ୬.୧୮ମିଟର ଜମ୍ପ କରିଥିଲେ । ୨୦୨୦ ମାର୍ଚ୍ଚରେ ସେ ନିଜ ରେକର୍ଡକୁ ୨ଥର ଭାଙ୍ଗିଥିଲେ । ୭ତାରିଖରେ ସେ ବେଲଗ୍ରେଡ୍ରେ ୬.୧୯ମିଟର ଜମ୍ପ କରିଥିଲେ ଓ ୨୦ ତାରିଖରେ ୬.୨୦ମିଟର ଜମ୍ପ କରି ଚତୁର୍ଥ ଥର ବିଶ୍ୱ ରେକର୍ଡ ସ୍ଥାପନ କରିଥିଲେ ।
୨୦୨୨(ଜୁଲାଇ ୨୪ତାରିଖ) ଓରେଗନ ବିଶ୍ୱ ଚାମ୍ପିଅନସିପ୍ରେ ସେ ୬.୨୧ମିଟର ଜମ୍ପ କରିଥିଲେ । ଏହାପରେ ୨୦୨୩ ଫେବ୍ରୁଆରୀ ୨୫ ତାରିଖରେ ୬.୨୨ମିଟର, ୨୦୨୩ ସେପ୍ଟେମ୍ବରରେ ୬.୨୩ମିଟର ଜମ୍ପ କରି ସପ୍ତମ ଥର ବିଶ୍ୱ ରେକର୍ଡ ଭାଙ୍ଗିଥିଲେ ।
