ପୁରୀ, ୦୩/୦୪ : ପୁରୀ ଜିଲ୍ଲା ପ୍ରଶାସନର ଅଧୀକୃତ ୱେବ୍ସାଇଟ୍ ୫ ଦିନ ହେବ ଅଚଳ ହୋଇରହିଛି । କାହିଁକି ଖୋଲୁନାହିଁ ଏହି କାରଣ ଅସ୍ପଷ୍ଟ ବୋଲି ପ୍ରଦର୍ଶିତ ହେଉଛି । ଏହି ୱେବ୍ସାଇଟ୍ ଯୋଗେ ପୁରୀ ସଂପର୍କିତ ତଥ୍ୟ ସହ ଟେଣ୍ଡର, ନୋଟିସ୍ ଏବଂ ଅନ୍ୟାନ୍ୟ ସୂଚନା ପ୍ରଦାନ କରାଯାଇଥାଏ । ୱେବ୍ସାଇଟ୍ ଖୋଲୁନଥିବାରୁ ଜିଲ୍ଲାରେ ଡିଜିଟାଲ୍ ସେବା ବାଧାପ୍ରାପ୍ତ ହୋଇଛି । ୨ ସପ୍ତାହ ତଳେ ଏହି ୱେବ୍ସାଇଟକୁ ବିକଶିତ କରାଯାଇଥିଲା । ଏହାର ବ୍ୟାକ୍ଗ୍ରାଉଣ୍ଡ ଏବଂ ଅନ୍ୟ ଡିଜାଇନ୍ରେ ପରିବର୍ତ୍ତନ ଅଣାଯାଇଥିଲା । ଏହାସହ ୱେବ୍ସାଇଟ୍ରେ କେତେକ ତଥ୍ୟ ମଧ୍ୟ ଅପ୍ଡେଟ୍ କରାଯାଇଥିଲା ।
ପୁରୀ ସଂପର୍କିତ ନୂତନ ଫଟୋ ୱେବ୍ସାଇଟ୍ରେ ଅପ୍ଲୋଡ୍ ହୋଇଥିଲା । ପୁରୀ ଏକ ପର୍ଯ୍ୟଟନସ୍ଥଳୀ ହୋଇଥିବାରୁ ବାହାରୁ ଆସୁଥିବା ପର୍ଯ୍ୟଟକ ଏହି ୱେବ୍ସାଇଟରୁ ପୁରୀ ସଂପର୍କିତ ବିଭିନ୍ନ ତଥ୍ୟ ସହ ପର୍ଯ୍ୟଟନସ୍ଥଳୀ ସଂପର୍କରେ ଜାଣିପାରୁଥିଲେ । ହେଲେ ୱେବ୍ସାଇଟ୍ ଅଚଳ ଥିବାରୁ ଏହି ସମସ୍ତ ସେବା ବାଧାପ୍ରାପ୍ତ ହୋଇଛି । ସେପଟେ ସୋସିଆଲ୍ ମିଡିଆ ‘ଏକ୍ସ’ରେ ପୁରୀ ପ୍ରଶାସନର ଆକାଉଣ୍ଟର ନାମ ପରିବର୍ତ୍ତନ କରାଯାଇଛି । ପୂର୍ବରୁ ଏହାର ନାମ ‘କଲେକ୍ଟର ପୁରୀ’ ଥିବା ବେଳେ ଏବେ ଏହାର ନାମ ‘ଡିଷ୍ଟ୍ରିକ୍ଟ ଇଲେକ୍ସନ ଅଫିସର’ ରହିଛି । ନିର୍ବାଚନକୁ ଦୃଷ୍ଟିରେ ରଖି ଏହି ପରିବର୍ତ୍ତନ ହୋଇଛି । ଏହି ଆକାଉଣ୍ଟରେ ନିର୍ବାଚନ ସଂପର୍କିତ ଗୁରୁତ୍ୱପୂର୍ଣ୍ଣ ତଥ୍ୟଗୁଡ଼ିକୁ ପୋଷ୍ଟ କରାଯିବା ସହ ଭୋଟର ସଚେତନତା ତଥ୍ୟ ପ୍ରଦାନ ହେଉଛି । ଏହାସହ ଜିଲ୍ଲା ପ୍ରଶାସନର ଏକ୍ସ ଆକାଉଣ୍ଟର ପ୍ରୋଫାଇଲ ଫଟୋ ଏବଂ କଭର୍ ଫଟୋ ମଧ୍ୟ ବଦଳାଯାଇଛି ।
