ଭୁବନେଶ୍ୱର ୧୫/୦୪: ୨୦୨୧ ମସିହାରେ ପରୀକ୍ଷା ଫଳ ହୋଇଥିଲା ୯୧.୭୮% । ଏମିତି ପାଠପଢ଼ା ହେଲା ଯେ ୨୦୨୨ରେ ଫଳ ହେଲା ୮୪.୬୩% । କିନ୍ତୁ ସୁଧୁରିଲେ ନାହିଁ । ୨୦୨୩ରେ ପୁଣି ପରୀକ୍ଷା ଫଳ ଖସି ହେଲା ୮୩.୦୨% । ତଥାପି ଖାତିର ନାହିଁ । ଚୁଲିକି ଗଲାଣି ପାଠପଢ଼ା । ଏହା ହେଉଛି ପୁରୀ ସାମନ୍ତ ଚନ୍ଦ୍ରଶେଖର (ଏସ୍ସିଏସ୍) ସ୍ୱୟଂଶାସିତ ମହାବିଦ୍ୟାଳୟର ଅବସ୍ଥା । ଏକଦା ରାଜ୍ୟର ଆଗଧାଡ଼ିର କଲେଜ ମାନ୍ୟତା ପାଇଥିବା ଏସ୍ସିଏସ୍ ସ୍ୱୟଂଶାସିତ ମହାବିଦ୍ୟାଳୟ ଏବେ ତଳକୁ ତଳକୁ ଯାଉଛି ।
ଏହି କଲେଜରେ ଦିନକୁ ଦିନ ପାଠପଢ଼ାର ମାନ କମୁଛି । ଠିକ୍ ସମୟରେ କ୍ଲାସ୍ କରୁନାହାଁନ୍ତି ଅଧ୍ୟାପକ । ଇଛା ହେଲେ କ୍ଲାସ୍ କରୁଛନ୍ତି ନହେଲେ ହ୍ୱାଟସ୍ଆପ୍ ଗ୍ରୁପ୍ରେ ମେସେଜ୍ ଦେଇ କ୍ଲାସ୍ ସସ୍ପେଣ୍ଡ । ଏମିତିରେ ବି ଆବଶ୍ୟକ ଅନୁସାରେ ଅଧ୍ୟାପକ ନଥିବାରେ ଅତିଥି ଅଧ୍ୟାପକଙ୍କ ଉପରେ କଲେଜ ନିର୍ଭର । ଏହାର ପ୍ରଭାବ ପିଲାଙ୍କ ଉପରେ ସିଧା ସଳଖ ପଡ଼ୁଛି । ଦିନକୁ ଦିନ କଲେଜର ଫାଇନାଲ୍ ରେଜଲ୍ଟ କମିବାର ଲାଗିଛି । ଆଗରୁ ଯେତିକି ପିଲା ଫେଲ୍ ହେଉଥିଲେ ଏବେ ତା’ଠୁ ଅଧିକ ହେଉଛନ୍ତି । ପୁରୀ ସାମନ୍ତ ଚନ୍ଦ୍ରଶେଖର (ଏସ୍ସିଏସ୍) ସ୍ୱୟଂଶାସିତ ମହାବିଦ୍ୟାଳୟରେ ଏବେ ଏମିତି ପାଠପଢ଼ା ହେଉଛି । ପିଲାଙ୍କ ରେଜଲ୍ଟ ହିଁ କହୁଛି କଲେଜର ପାଠପଢ଼ାକୁ ।
ଯେଉଁ କଲେଜକୁ ନେଇ ପିଲାମାନେ ଗର୍ବ କରୁଥିଲେ ଆଜି ସେ କଲେଜ କର୍ତ୍ତୃପକ୍ଷଙ୍କ ପାଇଁ ବଦନାମ ହେବାକୁ ଯାଉଛି । ୫ବର୍ଷ ତଳେ ଯେମିତି ପାଠପଢ଼ା ହେଉଥିଲା, ତାହା ଏବେ ଦେଖିବାକୁ ମିଳୁନି । କିଏ କେତେ ବେଳେ ଆସୁ ଯାଉଛି ତାର ପତା ନାହିଁ । ଇଛା ହେଲେ କ୍ଲାସ୍ କରୁଛନ୍ତି, ନହେଲେ ନାହିଁ । ତେଣିକି ପିଲାଙ୍କ ଭବିଷ୍ୟତ ଅନ୍ଧାରକୁ ଯାଉ ସେଥିରେ କର୍ତ୍ତୃପକ୍ଷଙ୍କର ଫରକ ପଡ଼ୁନି । ଏବେ କଲେଜର ଅବସ୍ଥାକୁ ଦେଖିଲେ ଦୁଃଖ ଲାଗୁଛି । ଅବସର ନେଇଥିବା ଜଣେ ଅଧ୍ୟାପକ ଏପରି କହିଛନ୍ତି ।
କଲେଜର ୩ ବର୍ଷର ରେଜଲ୍ଟ ପାଠପଢ଼ାକୁ ଦର୍ଶାଉଛି । ୨୦୨୧ରେ ପ୍ରକାଶ ପାଇଥିବା ଡିଗ୍ରୀ ଶେଷ ବର୍ଷରେ ମୋଟ ୭୩୭ ଜଣ ପିଲା ପରୀକ୍ଷା ଦେଇଥିଲେ । ଏଥିରୁ ୬୭୧ ଜଣ ପାସ୍ କରିଥିଲେ । ମାତ୍ର ୬୬ ଜଣ ଫେଲ୍ ହୋଇଥିଲେ । ଅର୍ଥାତ୍ ସେହି ବର୍ଷ ୯୧.୭୮ ପ୍ରତିଶତ ରେଜଲ୍ଟ ହୋଇଥିଲା । ୨୦୨୨ ମସିହାରେ ୭୧୬ଜଣ ପରୀକ୍ଷା ଦେଇଥିଲେ, ପାସ୍ କରିଥିଲେ ୫୮୭ । ୧୨୯ ଜଣ ଫେଲ୍ ହୋଇଥିଲେ । ଅର୍ଥାତ୍ ୨୦୨୨ ମସିହାରେ ରେଜଲ୍ଟ ହାର୍ କମି ୮୪.୬୩ ପ୍ରତିଶତ ହୋଇଥିଲା । ଗତବର୍ଷ ଅର୍ଥାତ୍ ୨୦୨୩ ମସିହାରେ ୮୩୪ଜଣ ପରୀକ୍ଷା ଦେଇଥିଲେ, ୬୯୪ଜଣ ପାସ୍ କରିଥିଲେ । ଗତବର୍ଷ ସର୍ବାଧିକ ୧୪୦ଜଣ ଫେଲ୍ ହୋଇଥିଲେ । ଅର୍ଥାତ୍ ରେଜଲ୍ଟ ପୁଣି ଖସି ଆସି ୮୩.୦୨ ପ୍ରତିଶତରେ ପହଞ୍ଚିଲା।
କଲେଜର କ୍ରମାଗତ ରେଜଲ୍ଟ କମିବାକୁ ମୁଣ୍ଡବିନ୍ଧାର କାରଣ ହୋଇଥିବା ବେଳେ ମାତ୍ର କଲେଜ କର୍ତ୍ତୃପକ୍ଷ କଣ ପାଇଁ ରେଜଲ୍ଟ କମୁଛି ତାର କୌଣସି ତର୍ଜମା କରୁନାହାଁନ୍ତି । କିପରି ଅଧ୍ୟାପକମାନେ ପାଠପଢ଼ାଇବେ ତାକୁ ନେଇ କୌଣସି ମାନସମନନ୍ଥ କରୁନାହାନ୍ତି । ଅନ୍ୟପଟେ ରେଜଲ୍ଟ କମୁଛି, ହେଲେ ଅଧ୍ୟାପକଙ୍କ ଘର ମୋହ ଛାଡ଼ୁନି । କଲେଜରେ କମ୍ ପାଠ ପଢ଼ାଉଛନ୍ତି ମାତ୍ର ଘରୋଇ କୋଚିଂ ସେଣ୍ଟରରେ ପଢ଼ାଇବାକୁ ଅଧିକ ଧ୍ୟାନ । ଏପଟେ କଲେଜର ଅଧିକାଂଶ ଅଧ୍ୟାପକ ପୁରୀରୁ ଦୂରରେ ରହୁଛନ୍ତି । କିଏ ଭୁବନେଶ୍ୱରରେ ରହୁଛି ତ ଆଉ କିଏ ବ୍ରହ୍ମପୁରରେ ରହୁଛି । ତେଣୁ ଟ୍ରେନ୍ କିମ୍ବା ବସ୍ ସମୟ ହେବା ମାତ୍ରେ ପାଠ ପଢ଼ା ହେଉ କି ନହେଉ ସିଧା କଲେଜ ଛାଡ଼ି ପଳାଉଛନ୍ତି । ଏପରିକି ଗାଡ଼ି ବିଳମ୍ବରେ ଆସିଲେ ସେଦିନର ପାଠପଢ଼ା ବାତିଲ୍ । ଏହାକୁ ଖୋଦ୍ କଲେଜ କର୍ତ୍ତୃପକ୍ଷ ସହଯୋଗ କରୁଥିବା ନେଇ ଛାତ୍ରଛାତ୍ରୀମାନେ ଅଭିଯୋଗ କରିଛନ୍ତି ।
ନିକଟରେ କଲେଜରେ ପାଠପଢ଼ା ହେଉନଥିବା ନେଇ ଅଭିଯୋଗ ହେବା ପରେ କଲେଜ କର୍ତ୍ତୃପକ୍ଷ ଏକ ବୈଠକ ଡାକିଥିଲେ । ସମସ୍ତ ଅଧ୍ୟାପକଙ୍କୁ ପୁରୀରେ ରହିବାକୁ ପରାମର୍ଶ ଦେଇଥିଲେ । କିପରି ପିଲାଙ୍କ ପାଠପଢ଼ା ହେବ ତାକୁ ଅଧିକ ଧ୍ୟାନ ଦେବାକୁ କହିଥିଲେ । ସାଢ଼େ ୭ ଘଣ୍ଟା ରହିବା ପାଇଁ ତାଗିଦ୍ ମଧ୍ୟ କରିଥିଲେ । ହେଲେ ଦିନେ ଦୁଇ ଦିନ ସମସ୍ତେ ଠିକ୍ ସମୟରେ ଆସିଥିଲେ । ହେଲେ ଏହାପରେ କିଛି ଅଧ୍ୟାପକ ଏଥିରେ ଖିଲାପ କରୁଥିବା ନେଇ ଅଭିଯୋଗ କରିଛନ୍ତି ଛାତ୍ରଛାତ୍ରୀ । ଏପରିକି ଅଧ୍ୟାପକ ମାନେ ଆସୁନଥିବାରୁ ଛାତ୍ରଛାତ୍ରୀ ମଧ୍ୟ କ୍ଲାସକୁ ଆସୁନାହାନ୍ତି ।