ନୂଆଦିଲ୍ଲୀ: ଋଷ ୟୁକ୍ରେନ ଉପରେ କ୍ରମାଗତ ଭାବରେ ଘାତକ ଆକ୍ରମଣ କରୁଛି। ସୋମବାର-ମଙ୍ଗଳବାର ମଧ୍ୟରାତ୍ରିରେ ଋଷ ସମଗ୍ର ୟୁକ୍ରେନକୁ କ୍ଷେପଣାସ୍ତ୍ର ଏବଂ ଡ୍ରୋନ୍ ମାଧ୍ୟମରେ ଟାର୍ଗେଟ କରିଛି । ଏହି ଆକ୍ରମଣରେ ଅତି କମରେ ଦୁଇ ଜଣଙ୍କର ମୃତ୍ୟୁ ଘଟିଛି । ଏହି ଆକ୍ରମଣ ପରେ ରାଜଧାନୀ କ୍ବିଭ୍ରେ ଗୁଳି ବିନିମୟ ଆରମ୍ଭ ହୋଇଥିଲା। ମଙ୍ଗଳବାର ଅଧିକାରୀ ମାନେ ଏ ସମ୍ପର୍କରେ ସୂଚନା ଦେଇଛନ୍ତି । ଏହାର ଗୋଟିଏ ଦିନ ପୂର୍ବରୁ ଋଷ ୟୁକ୍ରେନର ଶକ୍ତି କାରଖାନାକୁ ଟାର୍ଗେଟ କରିଥିଲା । ତେବେ ଋଷର ଏହି ଆକ୍ରମଣକୁ ୟୁକ୍ରେନ ରାଷ୍ଟ୍ରପତି ଭେଲୋଡିମିର ଜେଲେନସ୍କି ନିନ୍ଦା କରିଥିଲେ ।
ୟୁକ୍ରେନର ଦକ୍ଷିଣୀ ଖଣି ଏବଂ ଶିଳ୍ପ ସହର କ୍ରିଭ ରିହଷ୍ଟ୍ରାକର ସାମରିକ ଶାସନ ମୁଖ୍ୟ ଅଲେକ୍ସନ୍ଦ୍ର ବିଲ୍କୁଲଙ୍କ ଅନୁଯାୟୀ ଏକ ଆବାସିକ କୋଠାକୁ ଟାର୍ଗେଟ କରାଯାଇ ଆକ୍ରମଣ ହୋଇଛି । ସୋମବାର ଋଷ ଦ୍ବାରା ହୋଇଥିବା ଏହି ଆକ୍ରମଣ ପରେ କ୍ବିଭ୍ରେ ବିଦ୍ୟୁତ୍ ଉତ୍ପାଦନ ବ୍ୟାହତ ହୋଇଛି ଏବଂ ରାତିରେ ଅତି କମରେ ପାଞ୍ଚ ଥର ଏୟାର ଷ୍ଟ୍ରାଇକ୍ ଆଲର୍ଟ ଜାରି କରାଯାଇଛି । ଆଞ୍ଚଳିକ ପ୍ରଶାସକ କହିଛନ୍ତି ଯେ, ଆମର ବାୟୁ ପ୍ରତିରକ୍ଷା ବ୍ୟବସ୍ଥା ଋଷର ସମସ୍ତ ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣକୁ ପଣ୍ଡ କରିଦେଇଛି । ହେଲେ ଏହା ଦ୍ବାରା କିଛି ସ୍ଥାନରେ ନିଆଁ ଲାଗିଯାଇଛି ।
ରାଷ୍ଟ୍ରପତି ଜେଲେନସ୍କି ସୋମବାର ଋଷର ୧୦୦ ରୁ ଅଧିକ କ୍ଷେପଣାସ୍ତ୍ର ଏବଂ ଡ୍ରୋନ୍ ଆକ୍ରମଣକୁ ଘୃଣ୍ୟ ବୋଲି କହିଛନ୍ତି । ସେ କହିଛନ୍ତି ଯେ ଏହି ଆକ୍ରମଣରେ ସର୍ବସାଧାରଣ ଭିତ୍ତିଭୁମି କ୍ଷତିଗ୍ରସ୍ତ ହୋଇଛି ଏବଂ ଦେଶର ଅଧିକାଂଶ ସ୍ଥାନକୁ ଟାର୍ଗେଟ କରାଯାଇଛି ।
